A Dios juez te tojol
Sbꞌit jun tic vin̈aj Asaf.
50
A Jehová, Dios Axon̈ejochi, a ix loloni. Ix yavtej ebꞌ cajan dꞌa yolyibꞌan̈qꞌuinal tic, bꞌaj sjavi cꞌu masanto bꞌaj tzꞌem cꞌu.2 A dꞌa tzalan Sion, aton chon̈abꞌ te vachꞌ yilji, ataꞌ schꞌox saquilqꞌuinal Dios.
3 Tic sja co Diosal, palta man̈ ichn̈ejoctalaj ol javoc. A dꞌa spatic yichan̈ ay jun cꞌacꞌ to satumeli yedꞌ jun chacxuxum icꞌ.
4 Ato dꞌa chaan̈ tzꞌavtaj ebꞌ aj satchaan̈ yedꞌ ebꞌ cajan dꞌa sat lum luum tic yuj Dios, yic vachꞌ syil ebꞌ schꞌolbꞌitaj schon̈abꞌ.
5 Syal Dios icha tic: Molbꞌejec e bꞌa ex vicxo, a ex eyacꞌnac jun silabꞌ dꞌayin, ayic eyacꞌannac e trato vedꞌoc, xchi.
6 A satchaan̈ schꞌoxani to a Dios Juez ton dꞌa stojolal.
7 Syalanpax Dios icha tic: Ex in chon̈abꞌ Israel, abꞌecnabꞌi, jichan ol vutej valanoch e paltail dꞌa e sat. A in Dios in, e Diosal in.
8 Maj ex in tumejlaj yuj eyofrenda tzeyacꞌtaxon dꞌayin yedꞌ nocꞌ nocꞌ tze n̈us silabꞌil dꞌayin dꞌa valtar.
9 Max in cꞌanlaj nocꞌ quelemtac vacax molbꞌil eyuuj. Malaj nocꞌ mam chiva dꞌa yol e macteꞌ tzin cꞌan dꞌayex.
10 Vicn̈ej masanil nocꞌ caltacteꞌal nocꞌ, vic pax nocꞌ molbꞌetzal nocꞌ ay dꞌa jolomtac vitz.
11 Vic masanil nocꞌ much ay dꞌa caltac teꞌ yedꞌ masanil tas tzꞌecꞌ dꞌa cal vayumtac.
12 Qꞌuinaloc ay in vejel, man̈ ol val-laj dꞌayex, yujto vic jun yolyibꞌan̈qꞌuinal tic yedꞌ masanil tas ay dꞌay.
13 ¿Tocval a sbꞌacꞌchil nocꞌ vacax tzin chiꞌa? ¿Tocval a pax schiqꞌuil nocꞌ mam chiva svuqꞌuej?
14 A silabꞌ tzin nibꞌej, to tzeyacꞌ yuj diosal dꞌayin, tzeyaqꞌuelcꞌoch tas tzeyaltej dꞌayin, a in ton ecꞌ in to dꞌa yibꞌan̈ smasanil.
15 Ayic ay eyaelal, avtejinec, ol ex in coloꞌ, a exxo ol in eyicꞌchaan̈, xchi Dios.
16 Axo dꞌa ebꞌ chuc sbꞌeybꞌal, syal Dios icha tic: ¿Toc ay eyalan eyic eyalanel in cꞌaybꞌubꞌal, ma eyalanel yabꞌixal in trato?
17 Ina to max yal-laj e cꞌool tzex in cachaꞌ, malaj yelcꞌoch in lolonel dꞌayex.
18 Ayic sja vin̈ elcꞌumtaxoni, tzex qꞌue urnaj e bꞌat yedꞌ vin̈. Te vachꞌ eyacꞌanpax yedꞌ ebꞌ scꞌulan ajmulal.
19 Palta a tas tze cꞌulej, to tze naqꞌue lolonel, max ex och vaan eyesani.
20 A dꞌa ebꞌ eyucꞌtac junn̈ej e nun yedꞌoc, tzeyal chucal lolonel dꞌa spatic ebꞌ.
21 Ayic ix e cꞌulan juntzan̈ chucal tic, malaj tas svalaꞌ. Yuj chiꞌ tze naꞌ to lajan in eyedꞌoc, palta ol valoch e mul chiꞌ dꞌa e sat, ol vil-lajoch in sat eyedꞌoc.
22 A ex tzin bꞌat satcꞌolal eyuuj tic, vachꞌocabꞌ tzꞌaj snachajel jun tic eyuuj, axo talaj tzꞌaji, ol ex in jatchitejbꞌati, man̈xalaj mach ol ex colan dꞌayin.
23 A mach tzꞌacꞌan yuj diosal dꞌayin, ay velcꞌoch dꞌa yol sat. A mach tzin cꞌanabꞌajani, ol in colcaneli, xchi Dios.