A sman̈ pensaril ebꞌ tzꞌacꞌanoch qꞌuen tumin yipoc scꞌool
Sbꞌit jun tic ebꞌ yin̈tilal vin̈aj Coré.
49
Ex anima ay dꞌa masanil yolyibꞌan̈qꞌuinal tic, scham val eyabꞌan jun lolonel tic.2 Abꞌec ex bꞌeyum yedꞌ ex mebꞌaꞌ, mach ex ay eyelcꞌochi yedꞌ ex comon anima ex.
3 Ol in lolon dꞌa jelanil, ol val juntzan̈ pensar ajaltac snachajeli.
4 Ol in maclej val vabꞌ slolonel ebꞌ jelan. Ol in bꞌitej tas ix in cꞌaybꞌej chiꞌ yedꞌ sonal teꞌ arpa.
5 ¿Tas yuj ol in xivoc ayic ol ja juntzan̈ scꞌual yaelal dꞌayin, ayic ol cꞌoch oyan ebꞌ ajcꞌool dꞌayin?
6 A ebꞌ ajcꞌol chiꞌ, a sbꞌeyumal ebꞌ syacꞌoch yipoc scꞌool, syicꞌanchaan̈ sbꞌa ebꞌ yujto man̈ jantacoc tas ay dꞌa ebꞌ.
7 Palta malaj junoc mach syal scolan yetanimail dꞌa yol yicoꞌ, ma smananel sqꞌuinal dꞌa Dios.
8-9 Max yal-laj co mananel co qꞌuinal yic vachꞌ ayon̈n̈ej eqꞌui, yic max on̈ chami, yujto max techajlaj co tupani.
10 Ina squilaꞌ to junlajan scham anima smasanil. Scham ebꞌ jelan, schampax ebꞌ man jelanoc, axo sbꞌeyumal ebꞌ, chꞌoc mach bꞌaj scani.
11 Vachꞌchom man̈ jantacoc co luum, palta nabꞌan̈ej. A bꞌaj tzon̈ mucchaji, ataꞌ ayon̈n̈ejecꞌ dꞌa masanil tiempo. Juneln̈ej ol on̈ cann̈ej taꞌ.
12 A on̈ anima on̈ tic, man̈ masaniloc tiempo ayon̈ecꞌ dꞌa yolyibꞌan̈qꞌuinal tic. Vachꞌchom yel te bꞌeyum on̈, palta tzon̈ chamn̈ej icha scham nocꞌ nocꞌ.
13 Icha pax chiꞌ tzꞌaj satel ebꞌ syipcꞌolej sbꞌa, aton ebꞌ syaloch sbꞌa vachꞌil.
14 A juntzan̈ anima chiꞌ, a chamel ayoch yilumaloc ebꞌ. A tzꞌicꞌanbꞌat ebꞌ bꞌaj smucchaj chamnac. Ayic ol sacbꞌoc, dꞌa scꞌual yic ol on̈ chꞌolbꞌitajoc, a ebꞌ anima vachꞌ spensar ol acꞌan ganar dꞌa yichan̈ ebꞌ. Cꞌojancꞌolal ol satem snivanil ebꞌ, axo bꞌaj smucchaj chamnac ol och scajnubꞌoc ebꞌ.
15 A in xo jun, a Dios ol in icꞌancanel dꞌa yol scꞌabꞌ chamel, ol in yicꞌanbꞌat yedꞌoc.
16 Ex vetanimail, man̈ eyacꞌ pensar yuj ebꞌ tzꞌoch bꞌeyumal, ebꞌ ste qꞌuechaan̈ sbꞌeyumal dꞌa spat.
17 Yuj chiꞌ man̈ e naꞌa, yujto ayic ol cham ebꞌ, malaj jabꞌoc tas ol yicꞌbꞌat ebꞌ yedꞌoc, man̈ ol bꞌatlaj sbꞌeyumal ebꞌ chiꞌ yedꞌoc.
18 Vachꞌchom te tzalajcꞌolal yic ebꞌ ayic pitzan ebꞌ, ma tzꞌalji pax vachꞌ lolonel dꞌa ebꞌ yuj ebꞌ yetanimail yuj sbꞌeyumal chiꞌ,
19 ol ja scꞌual scham ebꞌ, icha ix aj scham ebꞌ smam yicham ebꞌ, man̈xo ol yil-laj saquilqꞌuinal ebꞌ.
20 A ebꞌ anima bꞌeyum, tato max nachajel yuj ebꞌ to eqꞌuelbꞌan̈ej yecꞌ masanil tas, lajan ol aj scham ebꞌ icha tzꞌaj scham nocꞌ nocꞌ.