A svachꞌilal Sion schon̈abꞌ Dios
Sbꞌit jun tic ebꞌ yin̈tilal vin̈aj Coré.
48
A Jehová co Diosal, yelxo val nivan yelcꞌochi, smoj val yalchaj vachꞌ lolonel dꞌay dꞌa yol schon̈abꞌ, aton tzalan bꞌaj tzꞌoch ejmelal dꞌay.2 Man̈xo jantacoc svachꞌil yilji jun tzalan tic, chaan̈ ayqꞌuei. A dꞌa chon tzalan Sion tic, bꞌaj cajan Dios, a tic ay val stzalajcꞌolal masanil ebꞌ cajan dꞌa yolyibꞌan̈qꞌuinal tic. A Sion tic schon̈abꞌ Vin̈ Rey yelxo val nivan yelcꞌochi.
3 A Dios ayecꞌ dꞌa juntzan̈ palacio dꞌa tzalan Sion tic. Ojtacabꞌil to a Dios ayoch co columaloc.
4 Ix smolbꞌej sbꞌa ebꞌ vin̈ rey, ix cot n̈ililoc ebꞌ vin̈ yacꞌ oval dꞌa chon̈abꞌ Sion tic.
5 Palta ayic ix yilan jun chon̈abꞌ tic ebꞌ vin̈, ix sat scꞌool ebꞌ vin̈. Ix somchajel scꞌool ebꞌ vin̈, ix bꞌat ebꞌ vin̈ elelal.
6 Ix yamchaj ebꞌ vin̈ yuj xivelal, tzꞌibꞌxi ebꞌ vin̈ yuj yaelal, icha junoc ix ix van yalji yuneꞌ.
7 Icha tzꞌaj spojbꞌat teꞌ barco yic chon̈abꞌ Tarsis yuj oval icꞌ scot dꞌa bꞌaj sjavi cꞌu, icha chiꞌ ix aj satel ebꞌ vin̈ yuj Dios.
8 A dꞌa schon̈abꞌ Jehová co Diosal Yajal dꞌa Smasanil, ix quil val yelcꞌoch icha val albꞌilcan dꞌayon̈. A Dios ol yacꞌn̈ej stecꞌanil Jerusalén.
9 Ach co Diosal, ayic ayon̈ecꞌ dꞌa a templo, sco nacot a nivan vachꞌcꞌolal.
10 Ach co Diosal, te bꞌinajnac ach dꞌa smasanil yolyibꞌan̈qꞌuinal tic, yuj chiꞌ tzꞌalchaj vachꞌ lolonel dꞌayach. Tza bꞌo yaj masanil tas dꞌa stojolal yedꞌ a poder.
11 Ay stzalajcꞌolal ebꞌ aj Sion. Te tzalajocabꞌ ebꞌ aj Judá yujto dꞌa stojolal ix a bꞌo yaj smasanil.
12 Ecꞌan̈ec oyoyoc dꞌa spatic yichan̈ Sion, tze bꞌisani jayeꞌ storreal.
13 Scham val e sayan eyil smuroal. Schampax eyilan spat ebꞌ yajal, yic vachꞌ ol yal eyalanel yabꞌixal dꞌa ebꞌ unin manto aljoclaj.
14 A sDiosal Sion, aton co Diosal dꞌa juneln̈ej. A tzon̈ icꞌann̈ej bꞌeyoc masanto dꞌa slajvubꞌ.