A vin̈ Yajal ayecꞌ quedꞌoc
Sbꞌitej jun bꞌit tic vin̈ cuchbꞌum dꞌa bꞌit yedꞌ sjajil jun bꞌit scuchan sbꞌit ebꞌ ix cobꞌestac. Sbꞌit jun tic ebꞌ yin̈tilal vin̈aj Coré.
46
A Dios ayoch quen̈uloc, an̈ejaꞌ pax ayoch quipumaloc. A tzꞌoch quedꞌoc ayic ayon̈ dꞌa scal yaelal.2 Yuj chiꞌ max on̈ xivlaj. Vachꞌchom stzicubꞌtan̈aj lum luum tic, scot juyuljoc juntzan̈ vitz dꞌa yol aꞌ mar,
3 vachꞌchom scꞌan̈ aꞌ mar chiꞌ, sqꞌuepax chulnaj sat aꞌ, vachꞌchom stzicubꞌtan̈aj jolomtac vitz yuj yoval aꞌ, palta max on̈ xivlaj.
4 Ay jun aꞌ nivan aꞌ tzꞌacꞌan tzalaj scꞌol ebꞌ cajan dꞌa schon̈abꞌ Dios, aton bꞌaj cajan Dios ecꞌto dꞌa yibꞌan̈ smasanil.
5 A Dios ayecꞌ dꞌa schon̈abꞌ chiꞌ, yuj chiꞌ man̈ ol satel-laj. A tzꞌoch yedꞌ schon̈abꞌ chiꞌ ayic van sacbꞌi.
6 Tzꞌel yav juntzan̈ nivac chon̈abꞌ yuj oval. Ol satel juntzan̈ nación chiꞌ. Ol ulaxbꞌat lum luum tic ayic ol abꞌchaj sjaj Dios.
7 A Jehová Yajal dꞌa Smasanil, ayecꞌ quedꞌoc. A sDiosal co mam quicham Jacob, a ayoch quedꞌoc, ay paxoch quen̈uloc.
8 Ul ilec satubꞌtaquil tas ix aj satjiel ebꞌ ajcꞌol dꞌa sat luum tic yuj Jehová.
9 Slajviecꞌ oval yuuj masanto dꞌa slajvubꞌ yolyibꞌan̈qꞌuinal tic. Scan̈chajcanbꞌat sjul-labꞌ ebꞌ yuuj. A qꞌuen lanza, chocꞌ tzꞌaj qꞌuen yuuj. Syacꞌanoch scꞌacꞌal carruaje yic oval chiꞌ.
10 Syalan Dios chiꞌ dꞌa juntzan̈ nación: Actejec eyacꞌan oval. Nachajocabꞌel eyuuj to a in ton Dios in. Ol alchajel in poder dꞌa scal masanil nación dꞌa sat luum tic, xchi Dios.
11 A Jehová Yajal dꞌa Smasanil, ayecꞌ quedꞌoc. A sDiosal co mam quicham Jacob, a ayoch quedꞌoc, ay paxoch quen̈uloc.