A bꞌit yuj snupnajel vin̈ rey
Sbꞌitej jun bꞌit tic vin̈ cuchbꞌum dꞌa bꞌit ayic ay nupnajel yedꞌ sjajil jun bꞌit scuchan teꞌ xumaac. Sbꞌit jun tic ebꞌ yin̈tilal vin̈aj Coré.
45
Ay val ecꞌ vachꞌ lolonel dꞌa in pensar. Ol in bꞌitan dꞌa vin̈ rey yedꞌ juntzan̈ in lolonel chiꞌ. A in tiꞌ lajan icha stzꞌibꞌlabꞌ junoc mach te jelan stzꞌibꞌani.2 Ach rey, a achn̈ej vachꞌ ilji dꞌa yichan̈ masanil ebꞌ vin̈ vinac. Te vachꞌn̈ej tas tzalaꞌ, te jelan a loloni yujto syacꞌn̈ej svachꞌcꞌolal Dios dꞌa ibꞌan̈.
3 Acꞌoch jachan qꞌuen espada dꞌa a nan̈al, ach vinac te acꞌum oval, te bꞌinajnac ach, te ay val elcꞌochi.
4 Ixic dꞌa yibꞌan̈ nocꞌ a chej yedꞌ a poder yic tzacꞌan ganar oval, yic sbꞌoji yaj lolonel dꞌa stojolal dꞌa ebꞌ emnaquil. Nivan tastac satubꞌtac ol a cꞌulej yedꞌ ipalil.
5 Ach co reyal, a jul-labꞌ te jay sn̈iꞌ ol bꞌat chꞌapnaj dꞌa sn̈iꞌ scꞌool ebꞌ ajcꞌool. Yuj chiꞌ ol telvoc ebꞌ anima yic juntzan̈ chon̈abꞌ dꞌa scal oc.
6 Ach co Diosal, yajal ach dꞌa smasanil tiempo. Yajal ach, vachꞌn̈ej tzꞌaj a chꞌolbꞌitan tastac.
7 A val tojolal scha a cꞌool, max schalaj a cꞌool chucal. Yuj chiꞌ ix ach siqꞌuel Dios, aton a Diosal. Ix yacꞌ nivan tzalajcꞌolal dꞌayach dꞌa yichan̈ juntzan̈xo ebꞌ ay yopisio edꞌoc.
8 Tzꞌel sjabꞌ sperfumeal mirra, áloes yedꞌ teꞌ canela ayoch dꞌa a pichul. A son ay schꞌan̈al ol acꞌan tzalaj a cꞌool dꞌa a pat marfiln̈ej ayoch yelvanubꞌoc.
9 Ay ebꞌ ix yisil ebꞌ vin̈ rey dꞌa scal ebꞌ avtabꞌil uuj. A dꞌa a tzꞌey dꞌa a vachꞌ, ataꞌ ayecꞌ ix reina. A qꞌuen oro yelxo val vachꞌ ayoch dꞌa spichul ix.
10 Ach yisil rey, maclej val abꞌi, scham val abꞌan tas ol val dꞌayach. Man̈xo a na ebꞌ a cꞌabꞌ oc yedꞌ ebꞌ etchon̈abꞌ,
11 yujto a vin̈ rey chiꞌ snibꞌan svachꞌil ilji, aton vin̈ ajalil. Aqꞌuem a bꞌa dꞌa vin̈.
12 Ol yacꞌ silabꞌ ebꞌ aj Tiro dꞌayach. A ebꞌ nivac bꞌeyum, ol snibꞌej ebꞌ yoch amigooc.
13 Tic sja ix ix van yoch yetbꞌeyumoc vin̈ rey, vachꞌn̈ej yilji ix, yisil pax ix junocxo vin̈ rey. Oro ayoch yelvanubꞌoc spichul ix.
14 Vachꞌn̈ej yaj sbꞌo ix yedꞌ spichul, tzꞌicꞌjibꞌat ix dꞌa vin̈ rey. Tzacꞌanoch ebꞌ ix cobꞌestac yucꞌlevoc ix, aton ebꞌ ix yamiga ix.
15 Stzalaj ebꞌ ix sbꞌat ebꞌ ix, masanto scꞌoch ebꞌ ix dꞌa spat vin̈ rey chiꞌ.
16 Ach rey, a ebꞌ uninal ol em cꞌojan bꞌaj tzꞌemtaxon cꞌojan ebꞌ a mam icham. Ol acꞌanoch yopisio ebꞌ yic syilan masanil yol a macbꞌen tic ebꞌ.
17 A in ol vacꞌ nachajcot a bꞌi yuj masanil anima toto ol aljoc dꞌa yolyibꞌan̈qꞌuinal tic. Ol yal vachꞌ lolonel junjun chon̈abꞌ dꞌayach dꞌa masanil tiempo.