Scꞌanchaj scolval Dios
Jun bꞌit tzon̈ cꞌaybꞌani. Sbꞌit jun tic ebꞌ yin̈tilal vin̈aj Coré.
44
Ach co Diosal, ix cabꞌ a poder yujto a ebꞌ co mam quicham ix alan dꞌayon̈ tas utejnac ebꞌ dꞌa pecaꞌ.2 Yedꞌ a poder ix a pechel juntzan̈ ebꞌ chꞌoc chon̈abꞌil, ix a satancanel ebꞌ dꞌa juntzan̈ nivac chon̈abꞌ chiꞌ, axo ebꞌ co mam quicham chiꞌ ix acꞌ cajnaj dꞌa tic.
3 Man̈oc yedꞌ yip ebꞌ, man̈oc pax qꞌuen yespada ebꞌ ix yacꞌlabꞌej ayic ix yicꞌan jun luum tic ebꞌ. Maj yicꞌlaj jun luum tic ebꞌ dꞌa acꞌoj ovalil, palta yuj a poder, yuj ipalil yedꞌ yuj a vachꞌcꞌolal ix yacꞌ ganar jun oval chiꞌ ebꞌ, yujto xajan ebꞌ uuj.
4 Ach co Diosal, co Reyal ach, a ach alnac, yuj chiꞌ cacꞌnac ganar a on̈ yin̈tilal on̈ can vin̈aj Jacob tic.
5 A ach ton tzach och quedꞌoc, yuj chiꞌ scacꞌ ganar ebꞌ ajcꞌool chiꞌ. Yuj ipalil scan ebꞌ ajcꞌool chiꞌ dꞌa yalan̈ cuuj.
6 Man̈oclaj yamcꞌabꞌ yic oval scacꞌoch yipoc co cꞌool, man̈ocpaxlaj yuj qꞌuen quespada ol cacꞌ ganar oval.
7 A ebꞌ cajcꞌool schichonoch scꞌool dꞌayon̈, tzon̈ a col dꞌa yol scꞌabꞌ ebꞌ, qꞌuixvelal tzꞌajcan ebꞌ uuj.
8 An̈ej dꞌayach ol cacꞌn̈ej tzalajbꞌoc co cꞌool, a achn̈ej ol ach co bꞌitej.
9 Palta a ticnaic Mamin, ix on̈ a patiquejeli, ix on̈ acꞌanoch dꞌa qꞌuixvelal, maxtzac yal-laj a cꞌool tzach bꞌat yedꞌ ebꞌ co soldado.
10 A ach ix on̈ actejcani, yuj chiꞌ ix on̈ el lemnaj dꞌa ebꞌ cajcꞌool. A ebꞌ schichon scꞌool dꞌayon̈, ix yicꞌbꞌat ebꞌ tastac ay dꞌayon̈.
11 Ix on̈ acꞌanoch dꞌa yol scꞌabꞌ ebꞌ, icha junoc nocꞌ calnel tzꞌicꞌjibꞌat bꞌaj smiljichamoc. Ix on̈ a saclemejcanbꞌat dꞌa scal juntzan̈ nación.
12 Te yechel ix on̈ a chon̈canel a on̈ a chon̈abꞌ on̈ tic. Malaj jabꞌoc tas ix acꞌ ganar yuj bꞌaj ix on̈ a chon̈el chiꞌ.
13 Ix on̈ acꞌan bꞌuchjoc yuj ebꞌ anima cajan dꞌa juntzan̈ chon̈abꞌ dꞌa co lacꞌanil. Tzon̈ stzuntzan ebꞌ, malaj quelcꞌoch dꞌa ebꞌ.
14 Ix on̈ acꞌan bꞌuchjoc yuj ebꞌ chꞌoc chon̈abꞌil. An̈ej val yic tzon̈ yilan ebꞌ, tzon̈ ste tzetzan ebꞌ.
15 Junjun cꞌu, toxon̈ej tzon̈ te em n̈ojan yuj qꞌuixvelal.
16 Tzon̈ stzuntzan ebꞌ cajcꞌool snibꞌej on̈ yixtani. Malaj quelcꞌoch dꞌa ebꞌ.
17 Aton juntzan̈ tic scot dꞌa quibꞌan̈, vachꞌchom maj ach bꞌatcan satcꞌolal cuuj. Ina to sco cꞌanabꞌajejn̈ej a trato acꞌnac dꞌayon̈.
18 Max co nalaj ach co patiquejeli. Malaj a cꞌaybꞌubꞌal ix cactejcani.
19 Vachꞌchom icha chiꞌ, palta ichato tzon̈ actejcan dꞌa scal nocꞌ nocꞌ ay smay, ichato on̈ a macchejem bꞌaj te qꞌuicꞌqꞌuinal.
20 Ach co Diosal, qꞌuinaloc ach bꞌatcan satcꞌolal cuuj, axo dꞌa comon dios ix caqꞌuem co bꞌa,
21 ix am ilaꞌ, yujto malaj junoc tas cꞌubꞌeltac man̈ ojtacoc.
22 Palta uuj junjun rato ijan on̈ smilancham ebꞌ ajcꞌol chiꞌ, icha nocꞌ calnel tzꞌicꞌjibꞌat bꞌaj schami, icha chiꞌ tzon̈ yutej ebꞌ.
23 Mamin, ¿tas yuj ichato vaynac ach bꞌati? Ilon̈coti, man̈ on̈ a patiquejcanel dꞌa juneln̈ej.
24 ¿Tas yuj tzach bꞌat mican dꞌayon̈? ¿Tas val yuj tzon̈ bꞌatcan satcꞌolal uuj dꞌa scal co nivan yaelal tic?
25 Toxo van yel quip, maxtzac yal-laj co loloni, toxon̈ej tzon̈ ecꞌ telton dꞌa sat luum.
26 Pil ip. Cotan̈. Colon̈ eli yujto te xajan on̈ uuj.