Scꞌanchaj scolval Dios
Ayic sbꞌitan jun bꞌit tic vin̈ cuchbꞌum yic bꞌit, a yamcꞌabꞌ vajxaqueꞌ schꞌan̈al scꞌanchaji. Sbꞌit jun tic vin̈aj David.
12
Mamin Jehová, colon̈, yujto man̈xalaj ebꞌ ay elcꞌoch dꞌa sat, van satel ebꞌ tzach cꞌanabꞌajan dꞌa scal ebꞌ anima.2 Syesej ebꞌ dꞌay junjun. Dꞌa chabꞌsatil slolon ebꞌ dꞌay junjun yic slaj yixtan sbꞌa ebꞌ.
3 Mamin Jehová, satcanel juntzan̈ anima ayoch dꞌa chabꞌsatil chiꞌ yedꞌ ebꞌ syicꞌchaan̈ sbꞌa.
4 Aton ebꞌ tzꞌalani: An̈ej tato syal co loloni, cꞌocbꞌiln̈ej chiꞌ. A co tiꞌ tic ol on̈ colanoc. ¿Machto val ol yal on̈ schecani? xchi ebꞌ.
5 Axo Jehová tzꞌalani: Tzꞌixtaj val ebꞌ malaj tas syal yuuj. A ebꞌ mebꞌaꞌ tzꞌel yav ebꞌ yuj syail. Yuj chiꞌ, yovalil ol in colcanel ebꞌ stan̈van in colval, xchi Jehová.
6 A tas yalnaccan Jehová te vachꞌn̈ej. Icha val qꞌuen plata sicꞌlabꞌil stzꞌai, man̈xalaj jabꞌoc smical, uquel sn̈usji dꞌa yol cꞌacꞌ, icha chiꞌ yaj tas yalnaccani.
7 Mamin Jehová, a ach ton val tzon̈ a tan̈vej. Toxonton tzon̈ a coln̈ej dꞌa juntzan̈ anima tic.
8 Ayic schaan yabꞌ chucal ebꞌ anima, masanil bꞌaj tzꞌicꞌjichaan̈ ebꞌ chuc chiꞌ.