A vin̈ Yajal yipcꞌolal yaji
Sbꞌit jun tic vin̈aj David.
11
A Jehová svacꞌoch yipoc in cꞌool, yuj chiꞌ nabꞌan̈ej tzeyal dꞌayin: Ixic, cꞌubꞌejel a bꞌa dꞌa caltac teꞌ icha syutej sbꞌa nocꞌ much.2 Ina val ebꞌ vin̈ chuc, syacꞌ lista sjul-labꞌ ebꞌ vin̈ yic sjulvaji, ijanxocan ebꞌ vin̈ yedꞌ sjul-labꞌ chiꞌ. Dꞌa cꞌubꞌeltac sjulji ebꞌ anima vachꞌ yuj ebꞌ vin̈.
3 Tato a ebꞌ yajal axon̈ej chucal ay dꞌa spensar, ¿tasto val ol yutoc sbꞌa ebꞌ vachꞌ sbꞌeybꞌal? xe chi dꞌayin.
4 Palta ayecꞌ Jehová dꞌa stemplo to an̈ej ay yicoꞌ. A dꞌa satchaan̈, ataꞌ ay sdespacho, scham val scꞌool yilani, schꞌolbꞌitan sbꞌeybꞌal ebꞌ anima.
5 A Jehová schꞌolbꞌitan yaj ebꞌ anima vachꞌ yedꞌ ebꞌ chuc. Te yajbꞌilel ebꞌ anima comonn̈ej smacꞌvaj yuuj.
6 A ol acꞌanemta cꞌacꞌ icha val yax n̈abꞌ yedꞌ azufre ayoch scꞌacꞌal dꞌa yibꞌan̈ ebꞌ chuc. Ol yacꞌanemta jun nivan icꞌ yic stacjiel masanil tas yuuj. A ol pactzitan dꞌa ebꞌ anima, ato syalaꞌ tastac scꞌulej ebꞌ.
7 A Jehová tojol toni, scham val scꞌool yedꞌ tojolal. Yuj chiꞌ, a ebꞌ anima tojol sbꞌeybꞌal, ol yil val Dios ebꞌ.