Scꞌanchaj scolval Dios
10
Mamin Jehová, ¿tas yuj najat tzach elcani? ¿Tas yuj ichato tza cꞌubꞌejel a bꞌa ayic ay in och dꞌa syaelal?2 Syicꞌchaan̈ sbꞌa ebꞌ scꞌulan chucal, tzꞌoch ebꞌ ajcꞌolal dꞌa ebꞌ mebꞌaꞌ, palta munil a ebꞌ ol can dꞌa yol chꞌan̈ yaal ix sbꞌoem chiꞌ.
3 A ebꞌ scꞌulan chucal, syicꞌchaan̈ sbꞌa ebꞌ yedꞌ tas snibꞌejochi. Syal vachꞌ lolonel ebꞌ dꞌa ebꞌ snibꞌanoch smasanil tastac, axo dꞌayach Mamin, ton̈ej sbꞌuchvaj ebꞌ.
4 A ebꞌ chuc chiꞌ, max ach snalaj jabꞌoc ebꞌ yuj yacꞌumtaquil. A snaan ebꞌ to max il-laj tas van scꞌulan ebꞌ chiꞌ.
5 Vachꞌn̈ej tzꞌelcꞌoch masanil tas scꞌulej ebꞌ chiꞌ. Malaj yelcꞌoch jabꞌoc a cꞌaybꞌubꞌal dꞌa ebꞌ. Malaj tzꞌoch ebꞌ yajcꞌol ebꞌ chiꞌ dꞌay.
6 Snaan ebꞌ dꞌa yol yicoꞌ to malaj bꞌaqꞌuin̈ ol telvoc ebꞌ. Malaj bꞌaqꞌuin̈ ol somchajel ebꞌ yalannaji.
7 An̈ej catabꞌ lolonel syal ebꞌ, slaj yalan es ebꞌ yedꞌ tas syutej xibꞌtan ebꞌ anima. Elan̈chamel slolon ebꞌ yedꞌ yoval scꞌool yedꞌ chucal.
8 Dꞌa stitac chon̈abꞌ tzꞌem cꞌojan ebꞌ smaclan yilaꞌ mach tzꞌecꞌta. Dꞌa elcꞌaltac smilcham ebꞌ malaj smul ebꞌ. Ayn̈ejoch sat ebꞌ dꞌa ebꞌ max uji scolan sbꞌa.
9 Icha nocꞌ choj ayoch dꞌa yol sn̈aqꞌueen, icha chiꞌ syutej sbꞌa ebꞌ. Scꞌubꞌejel sbꞌa ebꞌ, smaclan ebꞌ ilbꞌajcꞌool ebꞌ. Stan̈vej val ebꞌ janicꞌ val ol yacꞌ ganar ebꞌ. Ayic syamchaj ebꞌ, tzꞌicꞌjibꞌat ebꞌ yuj ebꞌ.
10 Tzꞌem votzꞌan ebꞌ, sqꞌue jucnaj ebꞌ icha nocꞌ choj chiꞌ. A ebꞌ max yal-laj scolan sbꞌa dꞌa yol scꞌabꞌ ebꞌ, syamchaj ebꞌ yuj ebꞌ.
11 A snaan ebꞌ scꞌulan chucal chiꞌ to sbꞌatcan satcꞌolal uuj. Macan a sat yalan ebꞌ, max ujilaj ilan snaan ebꞌ.
12 Mamin Jehová, cotan̈, acꞌ ip acꞌan syaelal ebꞌ scꞌulan chucal chiꞌ. Mocabꞌ sat a cꞌool dꞌa ebꞌ ayoch dꞌa cuscꞌolal.
13 ¿Tas yuj tza cha ach spatiquejel ebꞌ scꞌulan chucal chiꞌ? A snaan ebꞌ to man̈ ol a chꞌolbꞌitejlaj yaj ebꞌ.
14 A ach val tzil schucal ebꞌ. A ach ix ilaꞌ, yuj chiꞌ ol acꞌ syaelal ebꞌ icha val smojal, icha tas scꞌulej ebꞌ. A dꞌayach syal sbꞌa ebꞌ max yal-laj scolan sbꞌa. A ach tzach colvaj dꞌa ebꞌ unin man̈xalaj smam.
15 Macꞌ qꞌuichaj scꞌabꞌ ebꞌ scꞌulan chucal chiꞌ. Acꞌ yovalil chucal scꞌulej ebꞌ chiꞌ. Tzꞌacanocabꞌ tzꞌaj stupan smul ebꞌ chiꞌ.
16 Ach Jehová, Yajal ach dꞌa masanil tiempo. A ebꞌ chꞌoc chon̈abꞌil, ol iqꞌuel ebꞌ dꞌa sat lum a luum.
17-18 Mamin Jehová, a ach ton val tzabꞌ slesal ebꞌ anima emnaquil, a ach ton val tzacꞌ yip ebꞌ. A ach ton val tzabꞌ yalan sbꞌa ebꞌ tzꞌixtaji yedꞌ ebꞌ unin man̈xalaj smam. A achton ol il tas ol ajcan ebꞌ chuc chamelbꞌa yaji, yic vachꞌ man̈xo ol xibꞌtejlaj ebꞌ emnaquil ebꞌ.