Aloj vachꞌ lolonel dꞌa Dios yuj svachꞌcꞌolal
Sbꞌitaj jun bꞌit tic icha sjajil bꞌit sbꞌitaji ayic tzꞌoch chamel. Sbꞌit jun tic vin̈aj David.
9
Mamin Jehová, dꞌa smasanil in cꞌool tzin nibꞌej sval vachꞌ lolonel dꞌayach, svalanel yabꞌixal masanil tastac satubꞌtac ix a cꞌulej.2 Ach Dios, te ecꞌ ach to dꞌa yibꞌan̈ smasanil, uuj val tzin avaj dꞌa nivan tzalajcꞌolal. In gana tzach in bꞌitej.
3 Dꞌa val ichan̈ ix bꞌatcan ebꞌ ayoch ajcꞌolal dꞌayin elelal. Ix telvi ebꞌ, ix cham ebꞌ.
4 Yajal ach dꞌa stojolal. Cꞌojan ach em dꞌa a despacho, ix a bꞌoan yaj tas ix in cꞌan dꞌayach.
5 Ix acꞌan oval yedꞌ juntzan̈ ebꞌ chꞌoc chon̈abꞌil. Ix acꞌ telvoc ebꞌ scꞌulan chucal. Ix a sucsat sbꞌi ebꞌ yic vachꞌ maxtzac nachajcot ebꞌ dꞌa bꞌaqꞌuin̈.
6 Toxo ix cham ebꞌ ajcꞌool, ix satel schon̈abꞌ ebꞌ dꞌa juneln̈ej. A ach ix a sateli, man̈xalaj junoc ix cani, yic vachꞌ maxtzac nachajcoti.
7 A achxo ach Jehová, toxonton rey ach dꞌa masanil tiempo. Cꞌojan ach em dꞌa a despacho yic tza chꞌolbꞌitan ebꞌ anima.
8 Ol a chꞌolbꞌitej yolyibꞌan̈qꞌuinal tic dꞌa vachꞌil. Ol ach och yajalil dꞌa masanil chon̈abꞌ dꞌa stojolal.
9 Ach Jehová, tza col ebꞌ tzꞌixtaji, tzacꞌ yip ebꞌ ayic ayoch ebꞌ dꞌa nivac yaelal.
10 Mamin Jehová, yipcꞌolal aj yuj ebꞌ ojtannac ach, yujto malaj bꞌaj tzactejcan ebꞌ ayic syalan sbꞌa ebꞌ dꞌayach.
11 Bꞌitanan̈ec dꞌa Jehová Cajal dꞌa Sion, alec yabꞌ ebꞌ chon̈abꞌ tastac ix scꞌulej.
12 Man̈ ton̈ejoc tzꞌiljioch ebꞌ milumcham anima yuj Dios, max bꞌatcanlaj satcꞌolal syaelal ebꞌ ayoch dꞌa ilcꞌolal yuuj.
13 Mamin Jehová, ocꞌocabꞌ a cꞌool dꞌayin, il in emta, te ya tzin ecꞌ yuj ebꞌ tzin chacaneli. Colinel dꞌa chamel.
14 Ichato val chiꞌ bꞌian, ol valan vachꞌ lolonel dꞌayach dꞌa yichan̈ ebꞌ anima dꞌa spuertail Jerusalén. Tzin tzalaji, yujto ix in a colcaneli.
15 A juntzan̈ chꞌoc chon̈abꞌil chiꞌ, ix telviem ebꞌ dꞌa yol jun olan ix sbꞌoꞌo. A yoc ebꞌ syamchaj yuj chꞌan̈ yaal ix yaqꞌuem chiꞌ.
16 Ojtacabꞌil Jehová yujto tojol syutej spactzitan tas scꞌulej anima. Munil syicꞌcot yaelal ebꞌ scꞌulan chucal dꞌa yibꞌan̈.
17 A ebꞌ scꞌulan chucal yedꞌ ebꞌ sbꞌatcan Dios satcꞌolal yuuj, ol bꞌatcan ebꞌ dꞌa chamel.
18 Man̈ masaniloc tiempo ol bꞌatcan ebꞌ mebꞌaꞌ satcꞌolal yuj Dios. Ol javoc scꞌual ol elcꞌoch tastac ayoch yipoc scꞌool ebꞌ.
19 Mamin Jehová, chꞌoxel ipalil. Mocabꞌ yicꞌchaan̈ sbꞌa ebꞌ anima dꞌayach. Icꞌcot juntzan̈ chon̈abꞌ dꞌa ichan̈, tzacꞌan syaelal ebꞌ.
20 Acꞌoch ebꞌ dꞌa xivcꞌolal. Acꞌ yojtaquejel ebꞌ to animan̈ej ebꞌ.