A stziquiquial Dios yedꞌ yopisio ebꞌ anima
Sbꞌitaj jun bꞌit tic icha sjajil bꞌit sbꞌitaji ayic stecꞌjiel yal sat teꞌ uva. Sbꞌit jun tic vin̈aj David.
8
Mamin Jehová, Cajalil ach. Te bꞌinajnac ach, te nivan elcꞌoch dꞌa sat luum tic. Icha pax chiꞌ tzꞌaj yalchaj vachꞌ lolonel dꞌayach dꞌa satchaan̈.2 A ebꞌ unin yedꞌ ebꞌ tzato chuni tzacꞌlabꞌej yic syalan ipalil ebꞌ, yic vachꞌ tzꞌem numnaj ebꞌ pit, ebꞌ ajcꞌool yajoch dꞌayach.
3 A val yic tzin qꞌue qꞌuelan dꞌa satchaan̈ bꞌobꞌil uuj, bꞌaj ay qꞌuen uj yedꞌ qꞌuen cꞌanal a bꞌonac,
4 tzin naan dꞌa yol vicoꞌ: ¿Tas val jabꞌoc quelcꞌoch a on̈ anima on̈ tic, yuj chiꞌ tzon̈ a nacoti, tzon̈ a tan̈van yuj co vachꞌiloc?
5 Ejminac ix on̈ utejcan janicꞌ dꞌa yichan̈ ebꞌ ángel ayic ix on̈ a bꞌoani, palta nivan quelcꞌoch yuj copisio ix acꞌaꞌ.
6 Ix acꞌ copisio dꞌa yibꞌan̈ tas ix a bꞌoꞌo. Ix acꞌanoch masanil tastac bꞌobꞌil uuj dꞌa yol co cꞌabꞌ.
7 Ix acꞌcanoch masanil macan̈il nocꞌ nocꞌ dꞌa yol co cꞌabꞌ: Nocꞌ calnel, nocꞌ vacax, nocꞌ cꞌultaquil nocꞌ,
8 nocꞌ much tzꞌecꞌ jen̈en̈oc dꞌa satchaan̈, nocꞌ chay ay dꞌa yol aꞌ mar yedꞌ masanil nocꞌ tzꞌecꞌ dꞌa yol a aꞌ chiꞌ.
9 Mamin Jehová, Cajalil ach. Te bꞌinajnac ach, te nivan elcꞌoch dꞌa sat luum tic.