Scꞌanchaj bꞌeycꞌolal dꞌa tojolal
Aton jun bꞌit tic ix sbꞌitej vin̈aj rey David dꞌa Jehová yuj tas ix yal vin̈aj Cus, yin̈tilal Benjamín dꞌa vin̈.
7
Mamin Jehová, ach in Diosal, a dꞌa yol a cꞌabꞌ van in sayan in colnabꞌil. Colinel dꞌa yol scꞌabꞌ ebꞌ tzin pechan bꞌeyecꞌoc.2 Tato maay, ol in scotac jecchitejbꞌat ebꞌ ayoch ajcꞌolal chiꞌ dꞌayin, icha syutej schibꞌej nocꞌ choj, yujto man̈xalaj mach ol yal in scolani.
3 Ach Jehová in Diosal, ¿tocval ix in cꞌulej icha juntzan̈ tas syal ebꞌ dꞌa in patic? ¿Tocval ay in mul dꞌa jun chiꞌ?
4 Malaj bꞌaj chuc ix vutej in cꞌool dꞌa ebꞌ vachꞌ syutej scꞌool dꞌayin. Malaj bꞌaj ix vixtej vin̈ ayoch ajcꞌolal dꞌayin vachꞌchom malaj in mul.
5 Tato ix vixtej vin̈, yacꞌocabꞌ sgana vin̈ in spechan bꞌeyecꞌoc. In yamchajocabꞌ yuj vin̈, tzin stecꞌubꞌtan̈an vin̈ masanto satel in bꞌinajnaquil.
6 Mamin Jehová, qꞌuean̈ lin̈an yedꞌ yoval a cꞌool. Elan̈cot dꞌa yichan̈ yoval scꞌool ebꞌ ayoch ajcꞌolal dꞌayin. Bꞌo yaj dꞌayin icha val a gana dꞌa stojolal.
7 Ochocabꞌ oyan juntzan̈ nación dꞌa ichan̈, tza chꞌolbꞌitan yaj ebꞌ masanto dꞌa satchaan̈ bꞌaj ay a despacho.
8 Mamin Jehová, a achton ol a chꞌolbꞌitej juntzan̈ nación. Bꞌo yaj dꞌayin icha val in vachꞌ bꞌeybꞌal yedꞌ in tojolal.
9 Ach Dios te tojol, tzil spensar yedꞌ tas tzꞌecꞌ dꞌa scꞌol junjun anima. Cꞌocbꞌilxo Mamin, satocabꞌel ebꞌ te chuc sbꞌeybꞌal chiꞌ, tzacꞌanpax stecꞌanil ebꞌ vachꞌ sbꞌeybꞌal.
10 A Dios in Columal yaji, aton ecꞌto dꞌa yibꞌan̈ smasanil, a scolan ebꞌ vachꞌ spensar.
11 A Dios Juez tojol toni, yuj chiꞌ aycot yoval dꞌa ebꞌ chuc dꞌa junjun cꞌu.
12 Tato max snalaj sbꞌa scꞌool ebꞌ, a Dios ol yacꞌoch ye yespada. Vachꞌxo yaj sjul-labꞌ bꞌaj ol sjul ebꞌ.
13 Vanxo sqꞌue scꞌacꞌal yol sjul-labꞌ chiꞌ. Vachꞌxo yaj syamcꞌabꞌ to ol och chamel yuuj.
14 Ilecnabꞌ val tas sna ebꞌ chuc dꞌa ebꞌ yetanimail, an̈ej ixtoj anima syacꞌ ebꞌ.
15 Ichato sbꞌo jun olan ebꞌ te jul yich yic syamchaj ebꞌ yetanimail ebꞌ, palta aꞌ ebꞌ ol bꞌatcan dꞌa jun olan ix sbꞌo chiꞌ.
16 A schucal ebꞌ comonn̈ej scꞌulej, a ol cotcan dꞌa yibꞌan̈ ebꞌ.
17 Svacꞌ yuj diosal dꞌa Jehová yuj stojolal. Tzin bꞌitej Dios ecꞌto dꞌa yibꞌan̈ smasanil.