Lesal ayic ay nivan ilcꞌolal
Ayic sbꞌitan jun bꞌit tic vin̈ cuchbꞌum yic bꞌit, a yamcꞌabꞌ vajxaqueꞌ schꞌan̈al scꞌanchaji. Sbꞌit jun tic vin̈aj David.
6
Mamin Jehová, man̈ in a tumej yedꞌ yoval a cꞌool. Man̈ acꞌ in yaelal ayic scot oval dꞌayin.2 Mamin, ocꞌoc val a cꞌool dꞌayin, yujto man̈xalaj vip svabꞌi. Mamin, acꞌxi bꞌox in cꞌool yujto a in nivanil tic sluclon yuj man̈ ipal.
3 Te somchajnac in cꞌool. A achxo Mamin Jehová, ¿bꞌaqꞌuin̈ ol ach och vedꞌoc?
4 Mamin Jehová, ochan̈ val qꞌuelan dꞌayin, colinel yedꞌ val a nivan vachꞌcꞌolal.
5 ¿Tom ay mach olto ach naancotoc ayic toxo ix chami? Malaj junoc mach ol bꞌitan dꞌayach dꞌa scal ebꞌ yetchamnaquil chiꞌ.
6 Ste el vip voqꞌui. Man̈ jantacoc vocꞌ dꞌa junjun acꞌval. Schꞌayxiel in cꞌan̈ jolom yuj yal in sat.
7 Maxtzac yal-laj vilani, yujto ix mal in sat voqꞌui yujn̈ej ebꞌ ayoch ajcꞌolal dꞌayin.
8 Elan̈ec dꞌa in tzꞌey a ex to an̈ej chucal tze cꞌulej. Toxo ix yabꞌ Jehová in sicꞌsicꞌan voqꞌui.
9 Toxo ix yabꞌ in tevi dꞌay. Toxo ix scha in lesal.
10 A ebꞌ ayoch ajcꞌolal dꞌayin, ol can ebꞌ dꞌa qꞌuixvelal. Ton̈ej ol somchajcanel ebꞌ. Dꞌa junn̈ej mutzꞌsatil ol can ebꞌ dꞌa qꞌuixvelcꞌolal.