Scꞌanchaj scolval Dios
Ayic sbꞌitan jun bꞌit tic vin̈ cuchbꞌum yic bꞌit, a flauta scꞌanchaji. Sbꞌit jun tic vin̈aj David.
5
Mamin Jehová, cham val abꞌan tas svalaꞌ. Ochan̈ qꞌuelan dꞌayin ayic sja sicꞌson in cꞌool.2 Scham val abꞌani a svalan in bꞌa dꞌayach. In reyal ach, in Diosal ach, yuj chiꞌ a dꞌayach ol in lesalvoc.
3 Mamin Jehová, dꞌa junjun qꞌuin̈ibꞌalil tzin avaj dꞌayach. A sqꞌuin̈ibꞌi svalan in bꞌa dꞌayach, tzin tan̈van a pactzitan dꞌayin.
4 Val yel Mamin, malaj a gana dꞌa chucal, max yal-laj yaj ebꞌ chuc dꞌa a tzꞌey.
5 A ebꞌ syicꞌchaan̈ sbꞌa, man̈ ol aj ebꞌ dꞌa ichan̈, max schalaj a cꞌool ebꞌ scꞌulan chucal.
6 Ol a satel ebꞌ tzꞌesani. Tza chacancanel ebꞌ ixtum anima yedꞌ ebꞌ milumcham anima.
7 A inxo ol in cꞌoch dꞌa a cajnubꞌ yuj a nivan vachꞌcꞌolal dꞌayin. Ol val vachꞌ lolonel dꞌayach dꞌa emnaquil dꞌa a cajnubꞌ icn̈ej yaji.
8 Mamin Jehová tojol ach toni, yuj chiꞌ cuchbꞌej in dꞌa a bꞌeal, checlitej a bꞌeal dꞌa vichan̈ yujn̈ej ebꞌ ajcꞌool tzin maclani.
9 Malaj val lolonel yel syal ebꞌ, an̈ej tas chuc sna ebꞌ. Yuj tas syal ebꞌ chiꞌ sbꞌatcan ebꞌ anima dꞌa chamel, syal vachꞌ lolonel ebꞌ dꞌa chabꞌsatil.
10 Ach in Diosal, acꞌ val cot yaelal dꞌa yibꞌan̈ ebꞌ. Cotocabꞌ dꞌa yibꞌan̈ ebꞌ yuj juntzan̈ chucal sna ebꞌ dꞌa yibꞌan̈ ebꞌ yetanimail. Yujto man̈ jantacoc schucal ebꞌ, icꞌcanel ebꞌ dꞌa scal a chon̈abꞌ, ina to spitej val sbꞌa ebꞌ dꞌayach.
11 Axo pax masanil ebꞌ tzach acꞌanoch yipoc scꞌool jun, tzalajocabꞌ scꞌool ebꞌ. Elocabꞌ yav ebꞌ dꞌa tzalajcꞌolal dꞌa masanil tiempo, yujto tza colel ebꞌ. A ebꞌ tzach xajanani, tzalajocabꞌ ebꞌ uuj.
12 Yujto a ach Jehová, tzacꞌ a vachꞌcꞌolal dꞌa ebꞌ vachꞌ syutej sbꞌa. Tza colanel ebꞌ yedꞌ a vachꞌcꞌolal.