A Vin̈ Cajal ayoch yipoc co cꞌool
Ayic sbꞌitan jun bꞌit tic vin̈ cuchbꞌum yic bꞌit, a yamcꞌabꞌ ay schꞌan̈al scꞌanchaji. Sbꞌit jun tic vin̈aj David.
4
Ach in Diosal, a ach tza bꞌo yaj in lolonel, tacꞌvej in ayic tzin avaj dꞌayach. Ayic ay in och dꞌa syaelal ix in a colani. Ocꞌocabꞌ a cꞌool dꞌayin ticnaic, abꞌ tas sval dꞌa in lesal tic.2 Ex vetanimail, ¿bꞌaqꞌuin̈ ol eyactejcan eyalan in pecal? ¿Bꞌaqꞌuin̈ ol eyactejcan eyalan lolonel malaj yelcꞌochi? ¿Bꞌaqꞌuin̈ ol eyactejcan e sayan tas man̈ yeloc?
3 Abꞌec, a Jehová ix sicꞌancanel ebꞌ anima ayoch spensar dꞌay, yic vachꞌ tzꞌoch ebꞌ yicoc. Ayic tzin avaj dꞌay, stacꞌvi dꞌayin.
4 Xivan̈ec dꞌa Dios, yic man̈xo ol och e mul. Ayic jichan ex eqꞌui, a val yic te numan, tze bꞌeycꞌolan e bꞌa.
5 Aqꞌuec och Jehová yipoc e cꞌool, aqꞌuec e silabꞌ dꞌay icha val dꞌa smojal.
6 Tzijtum ebꞌ tzꞌalani: ¿Mach ol chꞌoxan svachꞌil dꞌayon̈? xchi ebꞌ. Mamin Jehová, chꞌox a vachꞌcꞌolal dꞌayon̈.
7 A ach ix acꞌcot tzalajcꞌolal dꞌayin, ecꞌto dꞌa yichan̈ stzalajcꞌolal ebꞌ nivan tas syicꞌ dꞌa smunlajel.
8 Malaj tas tzin naꞌ ayic tzin ecꞌ jichan, te juncꞌolal tzin vayi. Mamin Jehová, a ach ton ayach och vedꞌoc, yuj chiꞌ malaj tas tzin icꞌani.