A vin̈ rey sicꞌbꞌilel yuj Jehová
2
¿Tas val yuj tzꞌel veqꞌuecꞌoc yav ebꞌ chꞌoc chon̈abꞌil sqꞌuechaan̈? ¿Tas val yuj slajtiej sbꞌa ebꞌ dꞌa junoc tas man̈ ol tzacꞌvan ebꞌ sbꞌoani?2 A ebꞌ vin̈ rey yedꞌ ebꞌ yajal dꞌa juntzan̈ chon̈abꞌ chiꞌ, schichonoch scꞌool ebꞌ, junlajanxon̈ej syutej slajtian sbꞌa ebꞌ yoch ajcꞌolal dꞌa Jehová yedꞌ dꞌa Vin̈ Rey Sicꞌbꞌilel yuuj.
3 Slaj yalan ebꞌ icha tic: Quiqꞌuequel co bꞌa dꞌa yol scꞌabꞌ Dios yic man̈xalaj yalan yic dꞌayon̈, xchi ebꞌ.
4 A Jehová Yajal dꞌa satchaan̈ ton̈ej stzetzaj val ebꞌ yuuj, sbꞌuchji ebꞌ yuuj.
5 Scot yoval dꞌa ebꞌ, xibꞌtaj ebꞌ yuuj. Yedꞌ yoval scꞌool ol yalan dꞌa ebꞌ icha tic:
6 Toxo ix vacꞌoch yopisio Vin̈ Rey dꞌa tzalan Sion, aton jun tzalan sicꞌbꞌilel vuuj, xcham Jehová chiꞌ.
7 Axo Vin̈ Rey Sicꞌbꞌilel chiꞌ tzꞌalani: Svalcanel tastac ix sna Jehová. Ix yal dꞌayin: A dꞌa jun cꞌu tic, tzin chꞌoxeli to Vuninal ach.
8 Cꞌan dꞌayin, ol vacꞌan juntzan̈ nivac chon̈abꞌ yedꞌ masanil yolyibꞌan̈qꞌuinal tic dꞌayach.
9 Ol acꞌ yajalil dꞌa yibꞌan̈ ebꞌ yedꞌ val a poder. Ol a satel ebꞌ icha tzꞌaj smacꞌjipoj junoc lum chen dꞌa junoc qꞌuen cꞌococh, xchi dꞌayin, xchi Vin̈ Uninabꞌil chiꞌ.
10 A ticnaic jun, ex sreyal, ex yajalil juntzan̈ chon̈abꞌ, jelanocabꞌ tzeyutej e pensar, scham val e cꞌaybꞌan tas svalaꞌ.
11 Aqꞌuequem e bꞌa dꞌa Jehová dꞌa tzalajcꞌolal, ayocabꞌ yelcꞌoch dꞌa yol e sat.
12 Emnaquil tzeyutej pax e bꞌa dꞌay dꞌa smasanil e cꞌool, yic max cot yoval dꞌayex. Tato maay, ol ex satel yuuj, yujto elan̈chamel scot yoval.
Te tzalajcꞌolal yic masanil ebꞌ scol sbꞌa dꞌa Jehová.