2 Ix yacꞌancot schecabꞌ ebꞌ vin̈ dꞌa vin̈aj Acab sreyal Israel, ix yalan ebꞌ vin̈ icha tic: A vin̈aj Ben-adad ix on̈ checancot ul calaꞌ: 3 Vic yaj masanil a bꞌeyumal, ebꞌ ix etbꞌeyum te vachꞌ yedꞌ ebꞌ uninal te vachꞌ, xchicot vin̈, xchi ebꞌ checabꞌ chiꞌ.

4 Ix yalanbꞌat vin̈aj Acab chiꞌ dꞌa vin̈ icha tic: Mamin rey, ujocabꞌ icha ix al chiꞌ. A in tic yedꞌ masanil tastac ay dꞌayin icocabꞌi, xchibꞌat vin̈.

5 Ix jaxpax ebꞌ checabꞌ chiꞌ dꞌa vin̈aj Acab chiꞌ, ix yalanxi ebꞌ icha tic: Icha tic ix yutej vin̈aj Ben-adad yalanxicoti: Toxo ix valbꞌat dꞌayach to vic yaj masanil a bꞌeyumal, ebꞌ ix etbꞌeyum yedꞌ pax ebꞌ uninal. 6 An̈ejtonaꞌ yabꞌ icha tic qꞌuicꞌan, svacꞌanbꞌat ebꞌ yajalil ebꞌ in soldado yic sbꞌat yilan ebꞌ masanil tas ay dꞌa yol a palacio yedꞌ yoltac spat ebꞌ vin̈ ayoch yajalil edꞌoc. Masanil tas ol snibꞌej ebꞌ, ol yicꞌcot ebꞌ, xchi vin̈, xchi ebꞌ checabꞌ chiꞌ.

7 Yuj chiꞌ ix yavtancot masanil ebꞌ yichamtac vinaquil chon̈abꞌ vin̈aj Acab chiꞌ, ix yalan vin̈ dꞌa ebꞌ:

—¿Tas tzꞌaj e naan a ex tic? A vin̈aj Ben-adad chiꞌ vann̈ej sayan vin̈ tas ol yutej on̈ yixtani, vachꞌchom a in tic toxo ix val dꞌa vin̈ to syal vacꞌan in bꞌeyumal, ebꞌ ix vetbꞌeyum yedꞌ ebꞌ vuninal dꞌa vin̈, xchi vin̈.

8 Ix yalan ebꞌ ichamtac vinac chiꞌ yedꞌ masanil ebꞌ chon̈abꞌ:

—Mamin rey, man̈ a cha abꞌ tas syalcot vin̈ chiꞌ dꞌayach, xchi ebꞌ.

9 Ix lajvi chiꞌ, ix yalan vin̈aj rey Acab chiꞌ dꞌa ebꞌ schecabꞌ vin̈aj Ben-adad chiꞌ:

—Alec dꞌa vin̈ rey vajal chiꞌ, ol in cꞌanabꞌajej masanil tas ix yal vin̈ dꞌa sbꞌabꞌelal, palta axo tas syalcot vin̈ dꞌayin ticnaic, man̈xo ol in cꞌanabꞌajejlaj, xchibꞌat vin̈.

Icha chiꞌ ix aj yalanxicꞌoch ebꞌ schecabꞌ vin̈aj Ben-adad chiꞌ. 10 Ix schecanxicot ebꞌ schecabꞌ vin̈ chiꞌ junelxo dꞌa vin̈aj rey Acab chiꞌ, ix yalancot vin̈: Aocabꞌ juntzan̈ dios tzꞌacꞌanoch in yaelal tato max in satel Samaria chiꞌ dꞌa juneln̈ej. Man̈ ol yabꞌlaj scꞌalemal yic syicꞌancot jun jopoc yic junjun ebꞌ in soldado, xchi vin̈.

11 Ix yalanxibꞌat vin̈aj Acab chiꞌ dꞌa vin̈aj Ben-adad chiꞌ icha tic: Man̈ smojoc syicꞌchaan̈ sbꞌa junoc mach to vanto sbꞌat dꞌa oval, icha junoc mach to vanxo sjaxi, xchibꞌat vin̈.

12 Van yucꞌan an̈ vin̈aj Ben-adad chiꞌ yedꞌ juntzan̈xo ebꞌ vin̈ rey ayecꞌ yedꞌ vin̈ dꞌa scampamento ayic ix yabꞌan vin̈ tas ix yal ebꞌ checabꞌ chiꞌ. Yuj chiꞌ ix yal vin̈ dꞌa ebꞌ yajalil ebꞌ soldado to syacꞌ lista sbꞌa ebꞌ yic syacꞌan oval yedꞌ jun chon̈abꞌ chiꞌ. Yuj chiꞌ ix yacꞌan lista sbꞌa ebꞌ.

13 Yacbꞌan chiꞌ, ix javi jun vin̈ schecabꞌ Dios dꞌa vin̈aj Acab chiꞌ, ix yalan vin̈:

—A Jehová tzꞌalan icha tic: Scham val ilan jantac ebꞌ ajcꞌol chiꞌ, palta ol vacꞌoch ebꞌ dꞌa yol a cꞌabꞌ dꞌa jun cꞌu tic, yic vachꞌ ol ojtaquejeli to a inton Jehová Dios in, xchi Jehová, xchi vin̈ checabꞌ chiꞌ.

14 Ix tacꞌvi vin̈aj Acab chiꞌ, ¿mach yuj ol acꞌjococh ebꞌ dꞌa yol in cꞌabꞌ chiꞌ? xchi vin̈.

—A Jehová ix alani to a yuj ebꞌ vin̈ quelemtac scolvaj yedꞌ ebꞌ yajal yaj dꞌa junjun chon̈abꞌ dꞌa yoltac a macbꞌen tic, a yuj ebꞌ vin̈ ol acꞌ ganar, xchi vin̈ schecabꞌ Dios chiꞌ.

—¿Palta mach ol bꞌabꞌlaj yamanoch oval chiꞌ? xchi vin̈aj Acab chiꞌ.

—A extoni, xchi vin̈ checabꞌ chiꞌ.

15 Yuj chiꞌ ix smolbꞌej 232 ebꞌ vin̈ quelemtac chiꞌ vin̈. Ix lajvi chiꞌ ix smolbꞌanpax ebꞌ soldado vin̈ ayecꞌ taꞌ, uqueꞌ mil ebꞌ dꞌa smasanil. 16-17 Chimcꞌualil val ix el ebꞌ, bꞌabꞌel sbꞌat ebꞌ vin̈ quelemtac chiꞌ yuj ebꞌ, axo vin̈aj Ben-adad yedꞌ 32 ebꞌ vin̈ rey ajun yedꞌoc, an̈ejaꞌ yucꞌan an̈ ebꞌ vin̈ dꞌa yol scampamento. Ayic ix alji dꞌa vin̈ yuj ebꞌ soldado ayel yilaꞌ to ay juntzan̈ vinac ix el dꞌa yol chon̈abꞌ Samaria, 18 ix yalan vin̈ icha tic: Vachꞌchom dꞌa juncꞌolal ix elul ebꞌ, ma oval jun, yamec ebꞌ, pitzan ebꞌ tzeyicꞌancot ebꞌ dꞌayin dꞌa tic, xchi vin̈.

19 A ebꞌ vin̈ quelemtac scolvaj dꞌa ebꞌ yajal yaj dꞌa junjun chon̈abꞌ yic Israel chiꞌ, bꞌabꞌel ebꞌ vin̈, tzacꞌanoch masanil ebꞌ soldado yuj ebꞌ vin̈. 20 Junjun ebꞌ ix milancham junjun ebꞌ sirio ajcꞌol chiꞌ. Yuj chiꞌ ix bꞌat ebꞌ sirio chiꞌ elelal, axo ebꞌ israel ix bꞌat dꞌa spatic ebꞌ. Axo vin̈aj Ben-adad chiꞌ, ix qꞌue vin̈ dꞌa yibꞌan̈ schej yedꞌ juntzan̈xo ebꞌ soldado, ix bꞌatcan ebꞌ elelal. 21 Ix acꞌji ganar ebꞌ sirio chiꞌ yuj ebꞌ israel chiꞌ, ix yicꞌancan nocꞌ chej ebꞌ yedꞌ carruaje yic oval. Te nivan ebꞌ sirio chiꞌ ix chami. 22 Ix lajvi chiꞌ ix jax vin̈ schecabꞌ Dios chiꞌ dꞌa vin̈aj Acab sreyal Israel chiꞌ, ix yalan vin̈:

—A ticnaic scham val a naani tas tzutej acꞌanoch stzꞌacubꞌ ebꞌ vin̈ a soldado tic, yujto a dꞌa junxo abꞌil yabꞌ icha tic, sjax ebꞌ sirio tic yacꞌ oval edꞌ junelxo, xchi vin̈.

23 An̈ejaꞌ ix yalanpax ebꞌ vin̈ yajalil ebꞌ soldado sirio chiꞌ dꞌa vin̈ sreyal chiꞌ icha tic:

—A juntzan̈ sdiosal ebꞌ israel chiꞌ, sdiosal jolomtac vitz. Yuj chiꞌ, ix on̈ yacꞌ ganar ebꞌ. Palta tato a dꞌa pan̈quiltac scacꞌ oval yedꞌ ebꞌ, scacꞌ ganar ebꞌ. 24 Mamin rey, a tas tza cꞌulej ticnaic to maxtzac acꞌoch ebꞌ vin̈ rey tic yajaliloc ebꞌ soldado, say sqꞌuexul ebꞌ vin̈. 25 Tzacꞌanpaxoch ebꞌ soldado icha sbꞌisul ebꞌ ix acꞌji ganar chiꞌ, lajan tzꞌaj sbꞌisul ebꞌ yedꞌ nocꞌ chej yedꞌ pax carruaje. Slajvi chiꞌ tzon̈ bꞌat cacꞌ oval yedꞌ ebꞌ israel dꞌa lum pan̈quiltac chiꞌ, ol quilan bꞌian tato man̈ ol cacꞌ ganar ebꞌ, xchi ebꞌ.

Ix schaan yabꞌ vin̈aj Ben-adad tas ix yal ebꞌ chiꞌ. 26 Ayic ix ecꞌ jun abꞌil chiꞌ, ix yacꞌan lista ebꞌ soldado vin̈aj Ben-adad chiꞌ, ix javi ebꞌ dꞌa chon̈abꞌ Afec yic syacꞌan oval ebꞌ yedꞌ ebꞌ israel chiꞌ. 27 An̈ejtonaꞌ ix yacꞌanpax lista sbꞌa ebꞌ vin̈ soldado israel chiꞌ, ix acꞌji syamcꞌabꞌ ebꞌ yic sbꞌat ebꞌ yacꞌ oval yedꞌ ebꞌ sirio chiꞌ. Ix bꞌat ebꞌ israel chiꞌ, ix sbꞌoanqꞌue scampamento ebꞌ dꞌa yichan̈ ebꞌ sirio chiꞌ. Lajan val yilji ebꞌ icha chabꞌoc macteꞌal nocꞌ chiva, axo pax ebꞌ soldado yic ebꞌ sirio chiꞌ jun, majnaquel sat lum acꞌlic chiꞌ yuj ebꞌ.

28 A val taꞌ ix javi jun vin̈ schecabꞌ Dios dꞌa vin̈aj Acab sreyal Israel chiꞌ, ix yalan vin̈ icha tic dꞌa vin̈:

—A Jehová tzꞌalan icha tic: Yujto a ebꞌ sirio tic ix alani to a in tic sDiosal in lum jolomtac vitz, man̈ in sDiosaloc lum pan̈quiltac, yuj chiꞌ a ticnaic ol vacꞌoch juntzan̈ tzijtumal anima tic dꞌa yol a cꞌabꞌ, icha val chiꞌ ol aj ojtacaneli to a in ton Jehová Dios in, xchi Jehová, xchi vin̈ checabꞌ chiꞌ.

29 Uqueꞌ cꞌual ton̈ej ix ajecꞌ ebꞌ soldado sirio dꞌa yichan̈ ebꞌ soldado israel chiꞌ, ix lajvi chiꞌ ix syamanoch ebꞌ yacꞌan oval. A dꞌa jun cꞌu chiꞌ 100 mil soldado yic ebꞌ sirio chiꞌ sbꞌey dꞌa yoc ix cham yuj ebꞌ israel chiꞌ. 30 Axo juntzan̈xo ebꞌ soldado chiꞌ, ix bꞌat ebꞌ elelal dꞌa chon̈abꞌ Afec. Axo smuroal jun chon̈abꞌ chiꞌ ix cot lan̈naj dꞌa yibꞌan̈ ebꞌ, 27 mil ebꞌ soldado ix el chiꞌ ix chami. Ix pax lemnaj vin̈aj Ben-adad chiꞌ, ix cꞌoch vin̈ dꞌa jun chon̈abꞌ chiꞌ, tzuli tzꞌecꞌ vin̈ scꞌubꞌejel sbꞌa dꞌa yoltac pat.

31 Yuj chiꞌ axo ebꞌ ayoch yajalil yedꞌ vin̈ ix alan dꞌay icha tic:

—Ix cabꞌi to a ebꞌ vin̈ sreyal Israel ay yoqꞌuelcꞌolal ebꞌ vin̈, yuj chiꞌ comonoc scha a cꞌool scacꞌoch pichul ya svaꞌi, scacꞌanoch lasu dꞌa co jaj. Slajvi chiꞌ bꞌat co chꞌoxan co bꞌa dꞌa vin̈ sreyal Israel chiꞌ, talaj tzꞌocꞌ scꞌol vin̈ dꞌayon̈, man̈ ol on̈ smilchamlaj vin̈, xchi ebꞌ dꞌa vin̈aj Ben-adad chiꞌ.

32 Yuj chiꞌ ix yacꞌanoch pichul ebꞌ ya svaꞌi, ix yacꞌanoch lasu ebꞌ dꞌa sjaj, ix bꞌat ebꞌ schꞌox sbꞌa dꞌa vin̈ sreyal Israel chiꞌ, ix yalan ebꞌ:

—Mamin rey, a vin̈ a checabꞌ aj Ben-adad, tzon̈ scheccot vin̈ cal dꞌayach, comonoc tzꞌocꞌ a cꞌool max a milchamlaj vin̈, xchi ebꞌ. Ix tacꞌvi vin̈aj Acab chiꞌ dꞌa ebꞌ icha tic:

—¿Tom pitzanto vin̈ jun? A dꞌa in sat, icha vucꞌtac yaj vin̈, xchi vin̈.

33 Te vachꞌ ix yal vin̈ rey chiꞌ ix yabꞌ ebꞌ, yuj chiꞌ ix yal ebꞌ icha tic:

—Mamin rey, a vin̈ ucꞌtac aj Ben-adad chiꞌ pitzanto vin̈, xchi ebꞌ.

—Bꞌat iqꞌueccot vin̈ an, xchi vin̈aj Acab chiꞌ dꞌa ebꞌ. Yuj chiꞌ ix javi vin̈aj Ben-adad chiꞌ dꞌa yichan̈ vin̈, ix yacꞌanqꞌue vin̈ vin̈ dꞌa yol scarruaje. 34 Ix lajvi chiꞌ ix yalan vin̈aj Ben-adad chiꞌ icha tic:

—A ticnaic a juntzan̈ chon̈abꞌ yicꞌnac ecꞌ vin̈ in mam dꞌa vin̈ a mam, svacꞌxican dꞌayach. Syal sbꞌat ebꞌ a chon̈vajum dꞌa Damasco icha scꞌulejnac ebꞌ schon̈vajum vin̈ in mam chiꞌ dꞌa Samaria, xchi vin̈.

—Tato icha chiꞌ, ol ach vaqꞌuel dꞌa libre, xchi vin̈aj Acab chiꞌ.

Icha chiꞌ ix aj sbꞌoan jun strato ebꞌ chiꞌ. Ix lajvi chiꞌ ix pax vin̈aj Ben-adad chiꞌ.

35 Palta ay jun vin̈ dꞌa scal ebꞌ vin̈ schecabꞌ Jehová, a Jehová ix alan dꞌa vin̈, yuj chiꞌ ix yal vin̈ dꞌa jun vin̈ yetbꞌeyum icha tic:

—Acꞌ in echnaj in cꞌanaꞌ, xchi vin̈.

Palta maj yal-laj scꞌool vin̈ yetbꞌeyum vin̈ chiꞌ. 36 Ix yalan vin̈ schecabꞌ Dios chiꞌ dꞌa vin̈ icha tic:

—Yujto maj a cꞌanabꞌajej tas ix yal Jehová, yuj chiꞌ ayic ol ach el dꞌa in tzꞌey tic, ay jun nocꞌ choj ol ach milanchamoc, xchi vin̈.

Ayic ix el vin̈ chiꞌ dꞌa stzꞌey vin̈ schecabꞌ Dios chiꞌ, axo dꞌa yol bꞌe ix elta jun nocꞌ choj dꞌa vin̈, ix miljicham vin̈ yuj nocꞌ.

37 Ix lajvi chiꞌ, ix schalan sbꞌa vin̈ schecabꞌ Dios chiꞌ yedꞌ junxo vin̈ vinac, ix yalanxi vin̈ dꞌa vin̈ icha tic: Acꞌ in echnajoc, xchi vin̈. A jun vin̈ chiꞌ ix macꞌan vin̈ schecabꞌ Dios chiꞌ, ix lajvi vin̈. 38 Ix lajvi chiꞌ ix bꞌat vin̈ schecabꞌ Dios chiꞌ smaclej vin̈ rey dꞌa yol bꞌe. Ix sqꞌuexanel sbꞌa vin̈, ix smusan sat vin̈ dꞌa jun cꞌapac. 39 Ayic van yecꞌbꞌat vin̈ rey chiꞌ taꞌ, te chaan̈ ix yal vin̈ schecabꞌ Dios chiꞌ:

—Mamin rey, a in a checabꞌ in tic, ix in bꞌat dꞌa oval. A dꞌa scal ebꞌ soldado ix elta jun vin̈ soldado ix yicꞌancot jun vin̈ ajcꞌol vin̈ dꞌayin. Ix yalan vin̈ dꞌayin to tzin tan̈vej jun vin̈ chiꞌ. Ix cham val yalan vin̈ tato svactejel vin̈ ajcꞌol chiꞌ, a inxo tzin cham sqꞌuexuloc vin̈, mato yovalil svacꞌ oxeoc arroba qꞌuen plata. 40 Palta mamin rey, a in tic yacbꞌan ay jabꞌoc tas van in cꞌulani, ix el lemnaj vin̈ ajcꞌol chiꞌ dꞌayin, xchi vin̈ dꞌa vin̈aj Acab chiꞌ.

Ix tacꞌvi vin̈aj Acab sreyal Israel chiꞌ:

—Munil a ach ix alqꞌueta a mul yedꞌ tas ol elul dꞌa ibꞌan̈ yuuj, xchi vin̈.

41 Ix lajvi chiꞌ ix yicꞌanel smusil sat vin̈ schecabꞌ Dios chiꞌ. Axo ix yilan vin̈ rey chiꞌ to a jun vin̈ chiꞌ a junoc ebꞌ vin̈ schecabꞌ Dios. 42 Ix yalan vin̈ schecabꞌ Dios chiꞌ:

—Icha val tic yalan Jehová: A ach tic ix actejbꞌat jun vin̈ vinac ix valaꞌ to yovalil schami, yuj chiꞌ a ach ol ach cham sqꞌuexuloc vin̈, axo a chon̈abꞌ ol satel sqꞌuexuloc yic vin̈, xchi Jehová, xchi vin̈ schecabꞌ Dios chiꞌ.

43 Ix lajvi chiꞌ, ix bꞌatcan vin̈aj Acab chiꞌ dꞌa Samaria, ix chabꞌaxqꞌue scꞌool vin̈. Van schichon scꞌool vin̈ ix ochcan vin̈ dꞌa yol spalacio.