Ix bꞌat vin̈aj Elías elelal dꞌa Horeb
19
Ix yalan vin̈aj Acab dꞌa ix Jezabel tas ix scꞌulej vin̈aj Elías yedꞌ tas ix yutej vin̈ smilancham ebꞌ vin̈ schecabꞌ Baal. 2 Yuj chiꞌ, ix schecanbꞌat jun schecabꞌ ix dꞌa vin̈aj Elías chiꞌ, ix yalanbꞌat ix icha tic: Aocabꞌ ebꞌ dios tzꞌacꞌancot yaelal dꞌa vibꞌan̈ tato manto ach cham vuuj yabꞌ icha tic qꞌuicꞌan, icha ix utej a milancham ebꞌ vin̈ schecabꞌ in diosal chiꞌ, xchi ix.3 Ayic ix yabꞌan vin̈aj Elías to ay smay jun chiꞌ, ix bꞌat vin̈ elelal. Ayic ix cꞌoch vin̈ dꞌa Beerseba dꞌa yol yic Judá, ataꞌ ix yactejcan jun vin̈ schecabꞌ vin̈. 4 Ix lajvi chiꞌ, ix bꞌat vin̈ dꞌa tzꞌinan luum. Jun cꞌual ix bꞌey vin̈. Ix cꞌunbꞌi vin̈, ix em cꞌojan vin̈ dꞌa yich jun teꞌ mes. Ataꞌ ix snibꞌej cham sbꞌa vin̈. Ix yalan vin̈: Cꞌocbꞌilxo tic Mamin. Iqꞌuel in qꞌuinal, man̈ ecꞌbꞌaloclaj velcꞌoch dꞌa ebꞌ in mam vicham, xchi vin̈.
5 Ix ecꞌ jichan vin̈ dꞌa yich jun te teꞌ chiꞌ, ix vaybꞌat vin̈. Axo yic vaynac vin̈ chiꞌ, ix cꞌoch jun ángel dꞌa vin̈, ix tenji vin̈ yuuj, ix yalani: Qꞌuean̈ vaan, vaꞌan̈, xchi dꞌa vin̈.
6 Axo ix yilan vin̈ dꞌa sjolomtac, ayecꞌ jun ixim pan cꞌanbꞌinac dꞌa teꞌ tzacꞌacꞌ yedꞌ jun xalu a aꞌ. Ix qꞌue cꞌojan vin̈, ix va vin̈, ix yucꞌan aꞌ vin̈. Ix lajvi chiꞌ ix ecꞌxi jichan vin̈ svayi. 7 Ix cꞌochxi jun ángel chiꞌ dꞌa vin̈, ix tenjixi vin̈ yuuj, ix yalani: Qꞌuean̈ vaan, vaꞌan̈, yujto te najatto scan bꞌaj ol ach cꞌochoc, xchi dꞌa vin̈.
8 Ix qꞌue vaan vin̈, ix va vin̈, ix te och yip vin̈ yuj tas ix sva chiꞌ. 40 cꞌu yedꞌ 40 acꞌval ix bꞌey vin̈, masanto ix cꞌoch vin̈ dꞌa lum vitz Horeb bꞌaj schꞌoxnac sbꞌa Jehová dꞌa ebꞌ israel. 9 Ayic ix cꞌoch vin̈ taꞌ, ix vay vin̈ dꞌa yol jun qꞌuen n̈aqꞌueen dꞌa jun acꞌval chiꞌ. Ix lolon Jehová dꞌa vin̈, ix yalan icha tic: Elías, ¿tas tza cꞌulej dꞌa tic? xchi.
10 Ix tacꞌvi vin̈ dꞌay icha tic: Mamin Jehová Yajal dꞌa Smasanil, ix te cot voval yuj tas tzach utaj yuj ebꞌ vetisraelal. Yujto ix spatiquejel a trato ebꞌ, ix sjuanem altar ebꞌ, ix xicancham ebꞌ a checabꞌ ebꞌ. A inxon̈ej ix in colchajcaneli, palta van in sayjiecꞌ yuj ebꞌ yic tzin smilancham ebꞌ, xchi vin̈.
11 Ix yalan Jehová chiꞌ dꞌa vin̈: Elan̈ dꞌa chiꞌ tzach och lin̈an dꞌa vichan̈ dꞌa jolom vitz tic, yujto ol in ecꞌ taꞌ, xchi dꞌa vin̈.
Ix yacꞌancot jun nivan icꞌ Jehová chiꞌ, ix laj pojbꞌat qꞌuen tenam yuuj, palta man̈ ayocochlaj dꞌa scal jun icꞌ chiꞌ. Ix lajvi yecꞌ jun icꞌ chiꞌ, ix yacꞌanpaxcot jun quixcabꞌ. Palta an̈ejaꞌ man̈ ayocochlaj dꞌa scal jun quixcabꞌ chiꞌ. 12 Ix lajvi yecꞌ jun quixcabꞌ chiꞌ, ix yacꞌanpaxcot jun cꞌacꞌ, an̈ejaꞌ malaj Jehová chiꞌ ayoch dꞌa scal jun cꞌacꞌ chiꞌ. Ayic ix lajvi yecꞌbꞌat jun cꞌacꞌ chiꞌ, ix yabꞌan jun lolonel vin̈aj Elías chiꞌ, te cꞌununi ix aj yalani. 13 Ayic ix yabꞌan vin̈ chiꞌ, ix smusan sat vin̈ yedꞌ jun spichul jucan, ix elta vin̈, ix aj lin̈an vin̈ dꞌa stiꞌ qꞌuen n̈aqꞌueen chiꞌ, ix yabꞌan jun lolonel chiꞌ vin̈, ix yalani: Elías ¿tas tza cꞌulej dꞌa tic? xchi.
14 Ix tacꞌvi vin̈: Mamin Jehová Yajal dꞌa Smasanil, ix te cot voval yuj tas ix ach utaj yuj ebꞌ vetisraelal, yujto ix spatiquejel a trato ebꞌ. Ix sjuanem altar ebꞌ, ix xicancham ebꞌ a checabꞌ ebꞌ. A inxon̈ej ix in colchajcaneli, palta van in sayjiecꞌ yuj ebꞌ yic tzin smilancham ebꞌ, xchi vin̈.
15 Ix yalan Jehová chiꞌ dꞌa vin̈ icha tic: Ixic, meltzajan̈ dꞌa bꞌe bꞌaj ach coti, slajvi chiꞌ tzach bꞌat dꞌa tzꞌinan lum yic Damasco. Ayic ol ach cꞌoch taꞌ, tza sicꞌcanel vin̈aj Hazael yic ol och vin̈ reyal dꞌa Siria. 16 Axo vin̈aj Jehú yin̈tilal vin̈aj Nimsi tza sicꞌpaxcaneli yic ol och vin̈ sreyaloc Israel. Axo vin̈aj Eliseo yuninal vin̈aj Safat aj Abel-mehola, tza sicꞌcanel vin̈ yic ol och vin̈ in checabꞌoc a qꞌuexuloc. 17 A tas ol ujoc, a mach ol colchajcanel dꞌa yol scꞌabꞌ vin̈aj Hazael, axo vin̈aj Jehú ol milanchamoc. Axo mach ol colchajcanel dꞌa yol scꞌabꞌ vin̈aj Jehú chiꞌ, axo pax vin̈aj Eliseo ol milanchamoc. 18 Palta ayto uqueꞌ mil ebꞌ israel chiꞌ sicꞌbꞌilcanel vuuj, maj ochlaj ebꞌ ejmelal dꞌa Baal, maj stzꞌubꞌpax eltalaj ebꞌ, xchi Jehová chiꞌ.
Ix avtaj vin̈aj Eliseo
19 Ix meltzaj vin̈aj Elías chiꞌ dꞌa jun lugar chiꞌ, ix ja vin̈ bꞌaj ayecꞌ vin̈aj Eliseo yuninal vin̈aj Safat. Van sdꞌocvi lum vin̈ yedꞌ lajchaveꞌ mojan̈ nocꞌ mam vacax. A vin̈ edꞌjinac nocꞌ tzacꞌanto sbꞌati. Ix cꞌoch vin̈aj Elías chiꞌ dꞌa stzꞌey vin̈, ix yacꞌanbꞌat jun sjucan pichul vin̈aj Elías chiꞌ dꞌa yibꞌan̈ vin̈. 20 Dꞌa jun rato chiꞌ ix yactancan nocꞌ vacax vin̈aj Eliseo chiꞌ, ix och tzacꞌan vin̈ yuj vin̈aj Elías chiꞌ, ix yalan vin̈ icha tic:
—Cha in bꞌati, bꞌat valcan quilcobꞌa dꞌa in mam in nun, tzin tzꞌubꞌancanelta stiꞌ ebꞌ yic tzin pucancan in bꞌa yedꞌ ebꞌ. Slajvi chiꞌ, tzin och tzacꞌan uuj, xchi vin̈aj Eliseo chiꞌ.
—Syal a bꞌati, man̈ vanoc ach vacꞌan pural, xchi vin̈aj Elías chiꞌ.
21 Ix bꞌat vin̈aj Eliseo chiꞌ, ix smilan chavan̈ nocꞌ vacax chiꞌ vin̈. Axo yedꞌ teꞌ yugo ayoch dꞌa nocꞌ ix sbꞌol schibꞌejal nocꞌ vin̈, ix yacꞌan va ebꞌ anima smunlaj yedꞌ vin̈ chiꞌ. Ix lajvi chiꞌ ix och tzacꞌan vin̈ yuj vin̈aj Elías chiꞌ.