—Comonoc syal a cꞌol tzin siqꞌuel 12 miloc ebꞌ soldado, tzin bꞌat dꞌa spatic vin̈aj David dꞌa jun acꞌval tic, 2 yacbꞌan malaj yip vin̈ yuj cꞌunbꞌelal, ol in cꞌochoc. Ol in xibꞌtej masanil ebꞌ ajun yedꞌ vin̈, masanil ebꞌ ol el lemnaj dꞌa stzꞌey vin̈. Malaj junoc mach ol in milchamoc, an̈ej vin̈ rey chiꞌ. 3 Icha chiꞌ ol aj yoch ebꞌ anima smasanil edꞌoc, yujto junn̈ej mach yovalil smiljichamoc, axo masanil ebꞌ anima chiꞌ, ol och ebꞌ dꞌa juncꞌolal edꞌoc, xchi vin̈aj Ahitofel chiꞌ.

4 Ix scha scꞌol jun pensar chiꞌ vin̈aj Absalón chiꞌ yedꞌ masanil ebꞌ yichamtac vinaquil chon̈abꞌ. 5 Ix yalan vin̈aj Absalón chiꞌ to tzꞌavtaj vin̈aj Husai arquita, yic syal vin̈ tas snaꞌ vin̈ dꞌa yibꞌan̈ jun tic. 6 Axo ix cꞌoch vin̈aj Husai chiꞌ, ix yalan vin̈aj Absalón chiꞌ tas ix aj snaan vin̈aj Ahitofel chiꞌ. Ix scꞌanbꞌan vin̈ dꞌa vin̈:

—¿Vachꞌ am sco cꞌulej icha syal vin̈ tic, mato maay? ¿Tas tzꞌaj a naani? xchi vin̈ dꞌa vin̈.

7 Ix tacꞌvi vin̈aj Husai chiꞌ:

—A tas ix snaꞌ vin̈aj Ahitofel dꞌa junel tic, man̈ vachꞌoclaj. 8 A ach tic ojtac val to aꞌ vin̈ a mam te jelan vin̈ dꞌa oval yedꞌ masanil ebꞌ vin̈ ajun yedꞌ vin̈. A ticnaic te ay am cot yoval vin̈ yedꞌ ebꞌ vin̈, icha junoc nocꞌ nun oso tzꞌicꞌjiecꞌ yuneꞌ, icha chiꞌ yaj ebꞌ vin̈. An̈ejtonaꞌ pax vin̈ a mam chiꞌ te cꞌaynac vin̈ yacꞌan oval, man̈oclaj dꞌa scal ebꞌ anima chiꞌ ayecꞌ vin̈ dꞌa jun acꞌval tic. 9 A ticnaic, bꞌaj am scꞌubꞌejel sbꞌa vin̈ dꞌa junoc n̈aqꞌueen, ma dꞌa junocxo bꞌaj dꞌa chiꞌ. An̈ejtonaꞌ, tato dꞌa jun bꞌabꞌel oval tic scham jayvan̈oc ebꞌ a soldado, axom val yel specal chiꞌ to toxo ix acꞌji ganar ebꞌ a soldado. 10 Yuj chiꞌ vachꞌchom ay ebꞌ vin̈ max xivtaxon icha nocꞌ nivac choj, palta yovalil schabꞌaxqꞌue scꞌol ebꞌ vin̈ dꞌa icha chiꞌ, yujto masanil ebꞌ quetchon̈abꞌ ojtannac to te jelan vin̈ a mam chiꞌ dꞌa oval yedꞌ ebꞌ yedꞌnac vin̈ chiꞌ. 11 A jun tas sval dꞌayach ticnaic to sbꞌat co molbꞌejcot masanil ebꞌ quetisraelal yic tzꞌoch ebꞌ edꞌoc, scot dꞌa Dan masanto dꞌa Beerseba. A ebꞌ chiꞌ man̈xo bꞌischajbꞌenoc ebꞌ icha yarenail stiꞌ aꞌ mar, a achxo tza cuchbꞌej ebꞌ dꞌa oval. 12 Slajvi chiꞌ, tzon̈ bꞌat cacꞌ oval yedꞌ vin̈ a mam yaln̈ej bꞌajtil ayeqꞌui, tzon̈ em dꞌa yibꞌan̈ vin̈ icha yem yal acꞌval dꞌa yibꞌan̈ masanil an̈ an̈cꞌultac. Man̈xa junoc ebꞌ ayecꞌ yedꞌ vin̈ chiꞌ scani. 13 Vachꞌchom scꞌubꞌejel sbꞌa ebꞌ dꞌa junoc chon̈abꞌ yalani, palta co masanil a on̈ israel on̈ tic squicꞌ co lasu sco n̈erancot jun chon̈abꞌ chiꞌ yedꞌ jantac qꞌuen qꞌueen ayoch dꞌay, squecancanbꞌat juynaj dꞌa yoltac chꞌolan, man̈xa junoc qꞌuen qꞌueen scan taꞌ, xchi vin̈aj Husai chiꞌ.

14 Ix scha scꞌol vin̈aj Absalón yedꞌ masanil ebꞌ ichamtac vinac tas ix yal vin̈aj Husai chiꞌ dꞌa yichan̈ tas ix yal vin̈aj Ahitofel chiꞌ, vachꞌchom vachꞌ ix snaꞌ vin̈ chiꞌ. Ix scha scꞌol jun tic ebꞌ yujto a Jehová ix acꞌan sna ebꞌ yic max elcꞌoch tas ix sna vin̈aj Ahitofel chiꞌ. Icha chiꞌ ix aji yic scot dꞌa yibꞌan̈ vin̈aj Absalón chiꞌ. 15-16 Ix lajvi chiꞌ, ix bꞌat yalan vin̈aj Husai chiꞌ dꞌa vin̈aj sacerdote Sadoc yedꞌ dꞌa vin̈aj Abiatar tas ix yal vin̈aj Ahitofel dꞌa vin̈aj Absalón chiꞌ yedꞌ dꞌa ebꞌ ichamtac vinac. Ix yalanpax vin̈ tas ix aj yalani, yic bꞌat yal ebꞌ yabꞌ vin̈aj rey David dꞌa elan̈chamel to max canlaj ebꞌ dꞌa lum tzꞌinan luum chiꞌ palta to tzꞌecꞌcan ebꞌ dꞌa junxo scꞌaxepal aꞌ Jordán yic vachꞌ max miljicham ebꞌ.

17 Axo pax vin̈aj Jonatán yedꞌ vin̈aj Ahimaas ato bꞌaj sqꞌueul sjaj aꞌ Rogel dꞌa stitaquel chon̈abꞌ, ataꞌ ayecꞌ ebꞌ vin̈ yic vachꞌ malaj mach tzꞌilan yecꞌ ebꞌ vin̈ dꞌa yol chon̈abꞌ chiꞌ. Axo jun ix checabꞌ, ix bꞌat alan dꞌa ebꞌ vin̈ dꞌa elcꞌaltac tas yaji. Ixn̈ej val yabꞌ ebꞌ vin̈, ix bꞌat ebꞌ vin̈ yal dꞌa vin̈aj rey David chiꞌ. 18 Palta ay jun vin̈ quelem unin ix ilan ebꞌ vin̈, axo vin̈ ix bꞌat alan dꞌa vin̈aj Absalón chiꞌ, palta ix snael ebꞌ vin̈ schavan̈il, yuj chiꞌ ix bꞌat ebꞌ vin̈ dꞌa spat jun vin̈ cajan dꞌa Bahurim, dꞌa slacꞌanil chiꞌ. Elan̈chamel ix scꞌubꞌejel sbꞌa ebꞌ vin̈ dꞌa yol jun olan ay dꞌa yamaqꞌuil jun pat chiꞌ. 19 A ix yetbꞌeyum vin̈ aj pat chiꞌ, ix slichꞌbꞌat jun cꞌapac ix dꞌa yibꞌan̈ jun olan chiꞌ, ix secanem ixim trigo ix dꞌa yibꞌan̈ yic max checlaji. 20 Axo ix cꞌoch ebꞌ vin̈ schecabꞌ vin̈aj Absalón chiꞌ, ix scꞌanbꞌan ebꞌ vin̈ dꞌa ix:

—¿Bꞌajtil ix cꞌoch vin̈aj Ahimaas yedꞌ vin̈aj Jonatán dꞌa tic? xchi ebꞌ vin̈. Ix tacꞌvi ix icha tic:

—Ato val yecꞌbꞌat ebꞌ vin̈ tic. Van am val scꞌoch ebꞌ vin̈ dꞌa stiꞌ a aꞌ chiꞌ, xchi ix.

Ix comon bꞌat tzacꞌan ebꞌ vin̈ dꞌa spatic ebꞌ vin̈ chavan̈ chiꞌ yalani, palta maj ilchajlaj ebꞌ vin̈ yuj ebꞌ vin̈, yuj chiꞌ ix meltzaj ebꞌ vin̈ dꞌa Jerusalén. 21 Ayic toxo ix meltzajxican ebꞌ vin̈ chiꞌ, ix qꞌuexta ebꞌ vin̈ chavan̈ chiꞌ dꞌa yol jun olan chiꞌ, ix bꞌat yalan ebꞌ vin̈ dꞌa vin̈aj rey David to scꞌaxpaj vin̈ dꞌa aꞌ Jordán yedꞌ masanil ebꞌ ajun yedꞌ vin̈ chiꞌ, yujto toxo ix acꞌji scꞌol vin̈aj Absalón yuj vin̈aj Ahitofel yic scot ebꞌ vin̈ yacꞌ oval yedꞌ ebꞌ. 22 Ayic ix yabꞌan jun chiꞌ vin̈aj rey David chiꞌ, ix qꞌue vaan vin̈ yedꞌ masanil ebꞌ ajun yedꞌ chiꞌ, elan̈chamel ix cꞌaxpajecꞌ ebꞌ dꞌa yol aꞌ Jordán chiꞌ. Axo ix qꞌuin̈ibꞌi dꞌa junxo cꞌu, man̈xalaj junoc mach ayecꞌ dꞌa scꞌaxepal ecꞌta aꞌ chiꞌ.

23 Ayic ix yilan vin̈aj Ahitofel chiꞌ to maj ochlaj yopisio tas ix yal vin̈, ix yacꞌanoch stzꞌum schej vin̈, ix pax vin̈ dꞌa spat dꞌa schon̈abꞌ bꞌaj aljinac. Masanil tastac ay dꞌa vin̈, ix sbꞌocan yumal vin̈. Ix lajvi chiꞌ ix sdꞌun̈bꞌanqꞌue sbꞌa vin̈, ix cham vin̈. Icha chiꞌ ix aj scham vin̈aj Ahitofel chiꞌ, ix mucchaj vin̈ bꞌaj mucan smam.

24 Ix cꞌoch vin̈aj rey David chiꞌ dꞌa Mahanaim, axo vin̈aj Absalón ix bꞌat vin̈ dꞌa spatic vin̈, ix cꞌaxpajpax vin̈ dꞌa aꞌ Jordán yedꞌ masanil ebꞌ soldado israel. 25 Ix yacꞌoch vin̈aj Amasa vin̈aj Absalón chiꞌ yajaloc ebꞌ soldado sqꞌuexuloc vin̈aj Joab. A vin̈aj Amasa chiꞌ yuninal vin̈ jun vin̈ ismaelita scuchan Itra, yicꞌlajnac sbꞌa vin̈ yedꞌ jun ix scuchan Abigail yuneꞌ ix Nahas snulej ix Sarvia, snun vin̈aj Joab.

26 Ix sbꞌoqꞌue scampamento vin̈aj Absalón chiꞌ yedꞌ ebꞌ soldado dꞌa yol yic Galaad. 27 Ayic ix cꞌoch vin̈aj David chiꞌ dꞌa Mahanaim, ix javi jayvan̈ ebꞌ vin̈ vinac dꞌa vin̈, aton vin̈aj Sobi yuneꞌ ix Nahas aj Rabá dꞌa yol yic Amón, vin̈aj Maquir yuninal vin̈aj Amiel aj Lo-debar yedꞌ vin̈aj Barzilai aj Rogelim dꞌa yol yic Galaad. 28 A juntzan̈ ebꞌ vin̈ chiꞌ, yedꞌnac alan̈ ebꞌ vin̈ yedꞌ palangana, lum chen, ixim trigo, ixim cebada, ixim harina yedꞌ ixim trigo maybꞌil, an̈ avastut, an̈ lenteja, 29 yedꞌnacpax nocꞌ yal chabꞌ ebꞌ vin̈, nocꞌ queso, nocꞌ crema yedꞌ pax nocꞌ calnel. Masanil juntzan̈ chiꞌ ix yicꞌbꞌat ebꞌ vin̈ yabꞌlej vin̈aj rey David yedꞌ masanil ebꞌ ajun yedꞌ vin̈. Yujto spetoj vin̈ yedꞌ masanil ebꞌ anima chiꞌ dꞌa tzꞌinan luum, yuj chiꞌ ix sna ebꞌ vin̈ icha tic: Tecan cꞌunbꞌinac yaj ebꞌ, tzam tacjilaj stiꞌ ebꞌ, tzam ochpaxlaj svejel ebꞌ, xchi ebꞌ vin̈.