—¿Tas juntzan̈ edꞌnac chiꞌ? xchi vin̈. Ix tacꞌvi vin̈aj Siba chiꞌ:

—Mamin rey, a nocꞌ bꞌuru tic ol cuchan ebꞌ al uninal. Axo ixim pan yedꞌ sat te teꞌ sloji tic, yic ebꞌ a soldado yaji, axo pax vino tic ol yuqꞌuej ebꞌ scꞌunbꞌi sbꞌey bꞌaj cuseltacxo tic, xchi vin̈.

3 —¿Bꞌajtil ay vin̈aj Mefi-boset yixchiquin vin̈ ajalil aj Saúl ticnaic? xchi vin̈ rey chiꞌ.

—Ix can vin̈ dꞌa Jerusalén, yujto ix snaꞌ vin̈ talaj tzꞌoch vin̈ reyal icha ix scꞌulej smam icham yuj ebꞌ israel, xchi vin̈aj Siba chiꞌ.

4 —Tato icha chiꞌ, a ticnaic a masanil tastac ay dꞌa vin̈aj Mefi-boset chiꞌ, ol iquejcani, xchi vin̈ rey chiꞌ.

—Mamin rey, ay in dꞌa yalan̈ a mandar, vachꞌocabꞌ tzin can dꞌa yol a sat, xchi vin̈aj Siba chiꞌ.

5 Ayic ix cꞌoch vin̈aj rey David dꞌa Bahurim, ix elta jun vin̈ scuchan Simei yuninal vin̈aj Gera, ayto yuj sbꞌa yedꞌ vin̈aj rey Saúl chamnac. 6 Ix och ijan vin̈ sbꞌajvaj dꞌa vin̈aj rey David chiꞌ, ix julvajpaxcot vin̈ dꞌa vin̈ yedꞌ dꞌa ebꞌ yajal ajun yedꞌ vin̈ rey chiꞌ. Oyanoch ebꞌ soldado yedꞌ ebꞌ anima dꞌa spatic vin̈ rey chiꞌ. 7 Ix yalan vin̈aj Simei chiꞌ icha tic:

—Jachel a bꞌa dꞌa tic, ach milum anima. 8 A ticnaic van a chaan spac yuj Jehová yuj jantac ebꞌ yin̈tilal vin̈aj Saúl a milnacchamoc yic tzach ochcan reyal sqꞌuexuloc vin̈. A ticnaic toxo ix yacꞌoch opisio Jehová dꞌa yol scꞌabꞌ vin̈ uninal aj Absalón. Ix javi dꞌa ibꞌan̈ ticnaic yujto te milum ach anima, xchi vin̈ dꞌa vin̈ rey chiꞌ.

9 Ix yalan vin̈aj Abisai yuneꞌ ix Sarvia dꞌa vin̈aj rey David chiꞌ icha tic:

—Mamin rey, ¿tas yuj sbꞌajvajcot jun vin̈ icha nocꞌ chamnac tzꞌiꞌ tic dꞌayach? Cha in bꞌati, bꞌat in xiquel sjolom vin̈, xchi vin̈.

10 Ix yalan vin̈ rey chiꞌ:

—Malaj eyalan eyic dꞌa jun vin̈ tic a ex yuneꞌ ex ix Sarvia tic. Tato tzin sbꞌaj vin̈, a am Jehová tzꞌacꞌan yal vin̈. Tato icha chiꞌ, malaj mach syal scachanoch vaan vin̈, xchi vin̈ rey chiꞌ.

11 Ix bꞌat qꞌuelan vin̈ dꞌa vin̈aj Abisai yedꞌ dꞌa ebꞌ ayoch yedꞌ vin̈ yajalil, ix yalan vin̈:

—Inatax a val vin̈ vuninal snibꞌej tzin milanchamoc, ocxom val jun vin̈ yin̈tilal Benjamín tic. In sbꞌajocabꞌ vin̈, tecan a Jehová tzꞌacꞌan yal vin̈. 12 Talaj ol in snacot Dios yuj in cuscꞌolal tic, axo ol ajoc to ol yacꞌ svachꞌcꞌolal dꞌa vibꞌan̈ sqꞌuexuloc tas tzꞌalji tic dꞌayin, xchi vin̈.

13 Ix bꞌatxi vin̈aj David chiꞌ yedꞌ masanil ebꞌ ajun yedꞌoc, an̈ejaꞌ ix bꞌatpax vin̈aj Simei chiꞌ dꞌa spacꞌul lum vitz chiꞌ, ix bꞌajvajxicot vin̈, ix sjulancot qꞌuen qꞌueen vin̈ dꞌa scal ebꞌ, ix slan̈ancot lum pococ vin̈ dꞌa ebꞌ. 14 Ayic ix cꞌoch vin̈aj David chiꞌ dꞌa stiꞌ aꞌ Jordán yedꞌ masanil ebꞌ ajun yedꞌ chiꞌ, te cꞌunbꞌinacxo ebꞌ, yuj chiꞌ ix yicꞌ yip ebꞌ taꞌ.

15 Axo vin̈aj Absalón yedꞌ masanil ebꞌ ajun pax yedꞌoc yedꞌ vin̈aj Ahitofel, ix och ebꞌ dꞌa yol chon̈abꞌ Jerusalén. 16 Axo vin̈aj Husai arquita yamigo vin̈aj David, ix elta vin̈ scha vin̈aj Absalón chiꞌ, te chaan̈ ix avaj vin̈, ix yalan vin̈ icha tic:

—Nivanocabꞌ elcꞌoch mamin rey, ach icꞌjocabꞌ chaan̈, xchi vin̈.

17 Ix scꞌanbꞌan vin̈aj Absalón chiꞌ:

—¿Tom icha chiꞌ tzꞌaj a naan dꞌa spatic vin̈ amigo chiꞌ? ¿Tas yuj maj ach bꞌat yedꞌ vin̈? xchi vin̈ dꞌa vin̈.

18 Ix tacꞌvi vin̈aj Husai chiꞌ:

—Maay, man̈ smojoc tzin bꞌat yedꞌ vin̈. A mach sicꞌbꞌilel yuj Jehová, sicꞌbꞌilpaxel yuj ebꞌ chon̈abꞌ israel, a yedꞌ ol in canoc. 19 An̈ejtonaꞌ ay mach smoj svacꞌ servil, ol vacꞌ servil vin̈ yuninal vin̈ vamigo chiꞌ. Icha ix aj vacꞌan servil vin̈ a mam, icha val chiꞌ ol aj ach vacꞌanxi servil, xchi vin̈.

20 Ix lajvi chiꞌ ix yalan vin̈aj Absalón chiꞌ dꞌa vin̈aj Ahitofel:

—¿Tas tza naꞌ a ach tic, tas ol co cꞌulej? xchi vin̈ dꞌa vin̈.

21 Ix yalan vin̈aj Ahitofel chiꞌ:

—A tas tza cꞌulej ticnaic to tzach vay yedꞌ ebꞌ ix schabꞌil yetbꞌeyum vin̈ a mam aycan stan̈vej spat, yic vachꞌ snachajel yuj masanil ebꞌ israel tic to tzach chacjicanel yuj vin̈ a mam chiꞌ, axo masanil ebꞌ ayoch edꞌ tic ol ach yacꞌoch ebꞌ yipoc scꞌool, xchi vin̈.

22 Ix lajvi chiꞌ, ix sbꞌoanqꞌue jun mantiado ebꞌ dꞌa span̈anil palacio, ataꞌ ix vay vin̈aj Absalón chiꞌ yedꞌ ebꞌ ix schabꞌil yetbꞌeyum smam chiꞌ. Dꞌa yichan̈ masanil ebꞌ chon̈abꞌ chiꞌ ix vay vin̈ yedꞌ ebꞌ ix. 23 A dꞌa jun tiempoal chiꞌ, ayic scꞌanchaj razón dꞌa vin̈aj Ahitofel chiꞌ ichato a dꞌa Dios van scꞌanbꞌan ebꞌ, yuj chiꞌ a tas ix yal vin̈, ix yacꞌoch vin̈aj rey David yipoc scꞌool. An̈ejaꞌ icha pax chiꞌ ix scꞌulej vin̈aj Absalón chiꞌ.