Majxo bꞌatlaj vin̈aj David yedꞌ ebꞌ filisteo dꞌa oval
29
Ayic mantzac bꞌat ebꞌ soldado filisteo dꞌa Sunem, molanxoecꞌ ebꞌ dꞌa Afec, axo ebꞌ israel ayecꞌ ebꞌ dꞌa sjaj a aꞌ yic Jezreel. 2 Ayic ix avtaj slistail masanil ebꞌ soldado filisteo yuj ebꞌ vin̈ yajalil, ix bꞌischaj ebꞌ dꞌa cientoal yedꞌ dꞌa smilal, axo pax vin̈aj David yedꞌ ebꞌ soldado, tzacꞌanoch ebꞌ dꞌa spatic vin̈aj Aquis. 3 A ebꞌ vin̈ yajalil ebꞌ soldado filisteo chiꞌ, ix scꞌanbꞌej ebꞌ dꞌa vin̈aj Aquis chiꞌ:—¿Tas yaj juntzan̈ ebꞌ hebreo ayecꞌ dꞌa co cal tic? xchi ebꞌ vin̈.
Ix tacꞌvi vin̈ dꞌa ebꞌ vin̈:
—Aton vin̈aj David tic schecabꞌ vin̈aj Saúl, sreyal ebꞌ israel. Palta ayxo yajecꞌ vin̈ vedꞌoc. Atax yic sjavinac vin̈, malaj jabꞌoc spaltail vin̈ svilaꞌ, xchi vin̈.
4 Palta ix cot yoval ebꞌ vin̈ yajal chiꞌ dꞌa vin̈ rey chiꞌ, ix yalan ebꞌ vin̈:
—Al dꞌa ebꞌ to smelzajcan ebꞌ dꞌa schon̈abꞌ ix acꞌ chiꞌ, max bꞌatlaj ebꞌ quedꞌoc dꞌa oval, axo talaj tzꞌaji a dꞌayon̈ smeltzajoch ebꞌ ajcꞌolal dꞌa scal oval chiꞌ. Qꞌuinaloc sna vin̈aj David tic scanxi vachꞌil dꞌa vin̈aj Saúl, smilancham ebꞌ co soldado tic vin̈. 5 Yujto a vin̈aj David tic bꞌitajnac yuj ebꞌ ix ix, ayic sqꞌuenac chennaj ebꞌ ix, yalannac ebꞌ ix icha tic:
Smilal ebꞌ soldado ix smilcham vin̈aj Saúl.
Lajlajun̈ mil ix smilcham vin̈aj David, xchi ebꞌ ix.
6 Yuj chiꞌ ix avtajcot vin̈aj David chiꞌ yuj vin̈aj Aquis chiꞌ, ix yalan vin̈:
—Syil Jehová to te vachꞌ a pensar. Ix scha val in cꞌool a bꞌeybꞌal ayic ach ecꞌn̈ej vedꞌoc. Malaj jabꞌoc a paltail ix vilaꞌ yictax ach javi dꞌa tic, masanto ticnaic. Palta a ebꞌ vetyajalil tic, max schalaj scꞌol ebꞌ tzach bꞌat quedꞌ dꞌa oval. 7 Yuj chiꞌ, meltzajan̈ dꞌa tzalajcꞌolal, yic vachꞌ man̈ chucoc syabꞌ ebꞌ uuj, xchi vin̈.
8 Ix yalan vin̈aj David chiꞌ icha tic:
—Mamin rey, ¿tas ix in cꞌulej? ¿Tas ix il dꞌayin dꞌa jun tiempoal ayinecꞌ edꞌ tic, yuj chiꞌ max yal in bꞌat vacꞌ oval dꞌa mach ayoch ajcꞌolal dꞌayach? xchi vin̈.
9 Ix tacꞌvi vin̈aj Aquis chiꞌ, ix yalan vin̈:
—Vojtac val to te vachꞌ ach, lajan ach icha junoc yángel Dios, palta a ebꞌ vetyajalil tic, toxo ix yal ebꞌ to max yal och dꞌa co cal dꞌa oval. 10 Yuj chiꞌ ayic sacbꞌi qꞌuicꞌan tzach meltzaj yedꞌ ebꞌ a soldado, aton ebꞌ schecabꞌ vin̈ ajalil. Tzex bꞌat dꞌa qꞌuin̈ibꞌalil, xchi vin̈.
11 Yuj chiꞌ a dꞌa junxo qꞌuin̈ibꞌalil chiꞌ, ix meltzaj vin̈aj David chiꞌ yedꞌ ebꞌ soldado dꞌa schon̈abꞌ ebꞌ acꞌbꞌil. Axo ebꞌ filisteo chiꞌ ix qꞌuecan ebꞌ dꞌa Jezreel.