—A ach tic yovalil ol ach bꞌat vedꞌ dꞌa oval yedꞌ ebꞌ ajun edꞌoc, xchi vin̈.

2 Ix tacꞌvi vin̈aj David chiꞌ dꞌa vin̈:

—Ichocabꞌtaꞌ mamin rey, a ticnaic ol ilaꞌ tastac syal vuuj a in a checabꞌ in tic, xchi vin̈. Ix yalanxi vin̈ dꞌa vin̈aj David chiꞌ:

—Tzach vacꞌcanoch in tan̈vumaloc dꞌa juneln̈ej, xchi vin̈.

3 A dꞌa jun tiempoal chiꞌ, chamnacxo vin̈aj Samuel, masanil ebꞌ israel ocꞌnac yuj vin̈. A dꞌa Ramá schon̈abꞌ vin̈, ataꞌ mucbꞌil vin̈. Axo vin̈aj Saúl spechnaquel ebꞌ ajchum vin̈ yedꞌ ebꞌ tzꞌavtan spixan ebꞌ chamnac dꞌa scal chon̈abꞌ Israel chiꞌ.

4 Ayic ix lajvi smolbꞌan sbꞌa ebꞌ filisteo chiꞌ, ix bꞌat ebꞌ sbꞌoqꞌue scampamento dꞌa Sunem. An̈ejaꞌ ix smolbꞌanpax masanil ebꞌ israel vin̈aj Saúl dꞌa Gilboa. 5 Ayic ix yilanbꞌat scampamento ebꞌ filisteo vin̈aj Saúl chiꞌ, ix somchaj spensar vin̈, ix xivbꞌat vin̈. 6 Yuj chiꞌ ix scꞌanbꞌej vin̈ dꞌa Jehová, palta maj tacꞌvoclaj dꞌa vin̈ dꞌa vayichal, ma dꞌa ebꞌ sacerdote, ma dꞌa ebꞌ schecabꞌ Dios. 7 Ayic ix yilan vin̈ to chuc yaji, ix yalan vin̈ dꞌa ebꞌ schecabꞌ icha tic:

—Sayec junoc ix ix syal scꞌuman spixan chamnac, yic vachꞌ a dꞌa ix ol in cꞌanbꞌej in bꞌa, xchi vin̈.

Ix tacꞌvi ebꞌ vin̈ ay yopisio yedꞌ vin̈:

—A dꞌa Endor, ay jun ix syal scꞌuman spixan ebꞌ chamnac chiꞌ, xchi ebꞌ vin̈ dꞌa vin̈.

8 Ix sqꞌuexanel spichul vin̈aj Saúl chiꞌ yic sreyal, axo yic ebꞌ comon anima ix yacꞌoch vin̈. Ix yicꞌanbꞌat chavan̈xo soldado vin̈ yedꞌoc, ix bꞌat vin̈ dꞌacꞌvalil yic sbꞌat scꞌanbꞌej sbꞌa vin̈ dꞌa jun ix ix chiꞌ, ix yalan vin̈ dꞌa ix:

—Tzin tevi dꞌayach to in gana tzavtej spixan jun mach ol val tic, xchi vin̈.

9 Ix tacꞌvi ix dꞌa vin̈:

—Ojtac tas ix utaj ebꞌ ajchum yuj vin̈aj Saúl yedꞌ ebꞌ scꞌuman spixan ebꞌ chamnac, ix pechjiel ebꞌ dꞌa yol chon̈abꞌ tic yuj vin̈. ¿Tas yuj tza say tas tzꞌaji yic tzin miljichamoc? xchi ix.

10 Ix yacꞌan stiꞌ vin̈aj Saúl chiꞌ:

—Svacꞌ in tiꞌ dꞌa yichan̈ Jehová to malaj tas ol ach icꞌanoc, xchi vin̈.

11 —¿Mach bꞌan jun ol vavtej chiꞌ alani? xchi ix.

—Aton spixan vin̈aj Samuel chamnacxo tzavtej in cꞌanaꞌ, xchi vin̈.

12 Dꞌa val jun rato chiꞌ ix yilan vin̈aj Samuel jun ix ix chiꞌ, te chaan̈ ix el yav ix yuj xivelal, ix yalan ix dꞌa vin̈aj Saúl chiꞌ:

13 —¿Tas yuj tzin acꞌ musansatil? Tobꞌan a ach Saúl ach, xchi ix dꞌa vin̈.

—Ix tacꞌvi vin̈aj Saúl chiꞌ icha tic:

—Man̈ ach xivoc, ¿tas jun ix il chiꞌ? xchi vin̈.

—Ay jun pixan chamnac svil sqꞌueul dꞌa yol luum, xchi ix.

14 —¿Chajtil yilji? xchi vin̈.

—A jun vin̈ vinac te ichamxo, ay jun cꞌapac spichul vin̈ te jucan ayoch yuuj, xchi ix.

Ix snaanel vin̈ to a vin̈aj Samuel ix schꞌox sbꞌa, yuj chiꞌ ix em n̈ojan vin̈ dꞌa sat luum. 15 Ix yalan vin̈aj Samuel chiꞌ dꞌa vin̈:

—¿Tas yuj tzin ixtej, tzin avtancoti? xchi vin̈. Ix tacꞌvi vin̈aj Saúl chiꞌ:

—Ix ach vavtej yic tzal dꞌayin tas tzin cꞌulej, yujto te xivnac in, ayxo ecꞌ ebꞌ filisteo yacꞌ oval vedꞌoc, man̈xo ayocochlaj Dios vedꞌoc, maxtzac tacꞌvilaj dꞌa tas svalaꞌ, man̈xo jabꞌoc stacꞌvi ayic tzin cꞌanbꞌan dꞌa ebꞌ schecabꞌ, vachꞌchom dꞌa vayichal, xchi vin̈ dꞌa vin̈.

16 Ix tacꞌvi vin̈aj Samuel chiꞌ icha tic:

—Tato max tacꞌvi Jehová chiꞌ dꞌayach, ¿tas yuj a dꞌayin tza cꞌanbꞌej? Yujto toxo ix och Jehová ajcꞌolal dꞌayach, yuj chiꞌ ix ach yactejcani. 17 Vanxo yelcꞌoch tas schecnac Jehová val dꞌayach to toxo ix yiqꞌuecꞌ opisio dꞌa reyal, axo dꞌa vin̈aj David ix yacꞌcani. 18 Yujto maj a cꞌanabꞌajej a satanel ebꞌ amalecita ayic yalan Jehová dꞌayach, yuj chiꞌ ix ach yactejcani. 19 Man̈ocn̈ej chiꞌ, palta to ol ach yacꞌoch Jehová yedꞌ pax ebꞌ a soldado dꞌa yol scꞌabꞌ ebꞌ filisteo chiꞌ, yuj chiꞌ a qꞌuicꞌan tzach cham yedꞌ ebꞌ uninal, tzach javi dꞌa yedꞌtal ebꞌ chamnac bꞌaj ayinecꞌ tic, yujto a Jehová ol ach acꞌanoch yedꞌ ebꞌ a soldado dꞌa yol scꞌabꞌ ebꞌ filisteo chiꞌ, xchi vin̈.

20 Ayic ix yabꞌan vin̈aj Saúl chiꞌ icha chiꞌ, ix telvi vin̈, ix bꞌat val lian vin̈ dꞌa sat luum. Ix te xiv vin̈ yuj tas ix yal vin̈aj Samuel chiꞌ. Ix te el yip vin̈ yujto maj valaj vin̈ dꞌa jun cꞌu chiꞌ yedꞌ dꞌa jun acꞌval yic ix bꞌat vin̈ dꞌa yoltac bꞌe. 21 Yuj chiꞌ ayic ix yilan jun ix ix chiꞌ to ix te somchaj spensar vin̈, ix cꞌoch ix dꞌa stzꞌey vin̈, ix yalan ix:

—A in a checabꞌ in tic masanil tas ix alaꞌ ix in cꞌanabꞌajej, vachꞌchom ay smay in cham yuj tas ix in cꞌulej tic. 22 Yuj chiꞌ abꞌ tas sval tic: Ol vacꞌ jabꞌoc tas ol a vaꞌa yic vachꞌ ol ochxoc jabꞌoc ip tzach bꞌati, xchi ix dꞌa vin̈.

23 Maj yal-laj scꞌol vin̈ ix vaꞌi, palta axo ebꞌ vin̈ schecabꞌ vin̈ ajun yedꞌoc yedꞌ jun ix ix chiꞌ, a ebꞌ ix acꞌan pural vin̈ svaꞌi. Ichato chiꞌ ix qꞌue van vin̈, ix em cꞌojan vin̈ dꞌa stiꞌ jun chꞌat. 24 Yacbꞌan chiꞌ ix smilancham jun nocꞌ yuneꞌ vacax ix te bꞌaqꞌuech, ix sbꞌoan nocꞌ ix yedꞌ pax ixim pan malaj yich. 25 Ix yicꞌanbꞌat vael chiꞌ ix dꞌa vin̈aj Saúl chiꞌ yedꞌ dꞌa ebꞌ vin̈ schecabꞌ vin̈ ajun yedꞌoc, ix lajvi sva ebꞌ vin̈, ix meltzaj ebꞌ vin̈.