Ix xidꞌecꞌ cajan vin̈aj David dꞌa scal ebꞌ filisteo
27
Ix snaan vin̈aj David icha tic: Ol in smiln̈ejcham vin̈aj Saúl chiꞌ, yuj chiꞌ a ticnaic ol in bꞌatcan dꞌa schon̈abꞌ ebꞌ filisteo yic vachꞌ maxtzac in sayji yuj vin̈ dꞌa yol co macbꞌen tic. Icha chiꞌ ol aj in colchajel dꞌa yol scꞌabꞌ vin̈, xchi vin̈. 2 Yuj chiꞌ ix bꞌat vin̈ yedꞌ vaqueꞌ ciento ebꞌ vin̈ vinac ajun yedꞌoc, yic bꞌat yacꞌoch sbꞌa ebꞌ vin̈ schecabꞌoc vin̈aj Aquis sreyal Gat yuninal vin̈aj Maoc. 3 Ix cajnaj ebꞌ vin̈ yedꞌ vin̈aj Aquis dꞌa Gat chiꞌ, junjun ebꞌ vin̈ yedꞌ yetbꞌeyum yedꞌ pax yuninal. A vin̈aj David chiꞌ, ix yicꞌbꞌat ebꞌ ix yetbꞌeyum vin̈ schavan̈il, aton ix Ahinoam aj Jezreel yedꞌ ix Abigail ix yetbꞌeyumcan vin̈ xilbꞌa Nabal, aj Carmel. 4 Ayic ix yabꞌan vin̈aj Saúl to toxo ix bꞌatcan vin̈aj David chiꞌ elelal dꞌa Gat, ix yactan vin̈ sayanecꞌ vin̈.5 Ix yalan vin̈aj David chiꞌ dꞌa vin̈aj Aquis chiꞌ icha tic:
—Mamin rey, tzin tevi dꞌayach comonoc tzꞌel dꞌa a cꞌool, tzacꞌ jabꞌoc bꞌaj tzon̈ aj dꞌa junoc yuneꞌ chon̈abꞌ dꞌa yol a macbꞌen tic. Man̈ smojoc tzin aj edꞌoc dꞌa jun a chon̈abꞌ bꞌaj ayach tic, xchi vin̈.
6 A dꞌa jun cꞌu chiꞌ, ix yacꞌ chon̈abꞌ Siclag vin̈aj Aquis chiꞌ dꞌa vin̈. Yuj chiꞌ a chon̈abꞌ Siclag chiꞌ ix cann̈ej dꞌa yol yic ebꞌ vin̈ sreyal Judá.
7 Jun abꞌil yedꞌ chan̈eꞌ ujal ix ecꞌ vin̈aj David chiꞌ dꞌa yol smacbꞌen ebꞌ filisteo chiꞌ. 8 A ebꞌ aj Gesur, ebꞌ aj Gezer yedꞌ ebꞌ amalecita, nivanxo tiempo scꞌoch cajan ebꞌ dꞌa jun lum luum dꞌa scal Shur yedꞌ Egipto. A vin̈aj David chiꞌ yedꞌ ebꞌ ajun yedꞌoc cotac scal ix bꞌat ebꞌ yacꞌ oval dꞌa juntzan̈ chon̈abꞌ chiꞌ. 9 Smilcham ebꞌ anima ebꞌ taꞌ, man̈xo junoc vinac ma ix scani. Syicꞌanpaxcot nocꞌ vacax ebꞌ, nocꞌ calnel, nocꞌ bꞌuru, nocꞌ camello yedꞌ pax pichul. Slajvi chiꞌ smeltzajxicot ebꞌ bꞌaj ayecꞌ vin̈aj Aquis. 10 Scꞌanbꞌan vin̈aj Aquis chiꞌ dꞌa vin̈:
—¿Bꞌajtil ach xidꞌecꞌ acꞌ oval chiꞌ ticnaic? xchi vin̈. Syalan vin̈aj David chiꞌ: Aton dꞌa sur yic Judá yedꞌ dꞌa sur yic Jerameel, mato dꞌa sur yol smacbꞌen ebꞌ ceneo, xchi vin̈.
11 Man̈xa ebꞌ vin̈ vinac, ma ebꞌ ix ix pitzanto scan yuj vin̈aj David chiꞌ, yuj chiꞌ juneln̈ej man̈xa mach bꞌat alan dꞌa Gat tas scꞌulej vin̈ chiꞌ. A jantac tiempoal ix ecꞌ cajan vin̈ dꞌa smacbꞌen ebꞌ filisteo chiꞌ, ichan̈ej chiꞌ ix scꞌulej vin̈. 12 A vin̈aj Aquis chiꞌ, ix yacꞌoch vin̈aj David chiꞌ vin̈ yipoc scꞌool, ix snaan vin̈: A ebꞌ yetisraelal vin̈aj David tic van smeltzajoch ebꞌ ajcꞌolal dꞌa vin̈, yuj chiꞌ ol canxon̈ej vin̈ in yacꞌ servil, xchi vin̈.