2 Yuj chiꞌ ix bꞌat vin̈aj Saúl yedꞌ oxeꞌ mil ebꞌ soldado yic Israel te jelan. Ix bꞌat ebꞌ dꞌa tzꞌinan luum dꞌa yol yic Zif chiꞌ, yic sayecꞌ vin̈aj David chiꞌ ebꞌ. 3 Ix sbꞌoanqꞌue scampamento ebꞌ dꞌa tzalan Haquila chiꞌ dꞌa ti bꞌe, axo vin̈aj David chiꞌ ayecꞌ vin̈ dꞌa tzꞌinan luum chiꞌ. Ix yabꞌan vin̈ to van sayjiecꞌ vin̈ yuj vin̈aj Saúl taꞌ. 4 Yuj chiꞌ ix schecbꞌat jayvan̈ yilumal vin̈ yic sbꞌat yilan ebꞌ tato yel to ayxo ecꞌ vin̈aj Saúl chiꞌ. 5 Ayic ix lajvi yabꞌan vin̈aj David chiꞌ, ix bꞌat vin̈ bꞌaj ayecꞌ vin̈aj Saúl chiꞌ dꞌacꞌvalil, ix cham val yilan vin̈ bꞌaj svay vin̈ yedꞌ vin̈aj Abner yuninal vin̈aj Ner, aton vin̈ yajal yaj dꞌa ebꞌ soldado. Axo ix yilan vin̈ to a dꞌa snan̈al yol campamento chiꞌ, ataꞌ svay vin̈, oyanoch ebꞌ soldado dꞌa spatictac vin̈. 6 Yuj chiꞌ ix yal vin̈ dꞌa vin̈aj Ahimelec hitita yedꞌ dꞌa vin̈aj Abisai yucꞌtac vin̈aj Joab, ebꞌ vin̈ yuneꞌ ix Sarvia^* icha tic:

—¿Mach bꞌecan scꞌol sbꞌat vedꞌoc bꞌaj ayecꞌ vin̈aj Saúl dꞌa yol scampamento chiꞌ? xchi vin̈.

—A in tic ol in bꞌat edꞌoc, xchi vin̈aj Abisai chiꞌ.

7 A dꞌa jun acꞌval chiꞌ, ix bꞌat vin̈aj David yedꞌ vin̈aj Abisai chiꞌ dꞌa campamento chiꞌ. A vin̈aj Saúl chiꞌ chamnac el vin̈ svayi. A dꞌa sjolomtac vin̈, ataꞌ tipancanem qꞌuen slanza vin̈ dꞌa yol luum. Axo pax vin̈aj Abner yedꞌ masanil ebꞌ soldado, vaynac ebꞌ dꞌa stzꞌeytac vin̈. 8 Ix yalan vin̈aj Abisai chiꞌ dꞌa vin̈aj David chiꞌ:

—A val ticnaic toxo ix yacꞌoch jun vin̈ ajcꞌool tic Dios dꞌa yol a cꞌabꞌ. Acꞌ in permiso tzin milcham vin̈. A qꞌuen slanza vin̈ tic tzin tipem dꞌa scꞌool masanto tzꞌemcꞌoch qꞌuen dꞌa yol luum, junn̈ej svacꞌ dꞌa vin̈, scham vin̈ dꞌa juneln̈ej, xchi vin̈.

9 Palta ix tacꞌvi vin̈aj David chiꞌ, ix yalan vin̈:

—Man̈ a milcham vin̈, yujto yaln̈ej mach smilancham vin̈ rey sicꞌbꞌilel yuj Jehová, yovalil sjavi yaelal dꞌa yibꞌan̈. 10 A in tic svacꞌ in tiꞌ dꞌa Dios to aocabꞌ ol icꞌanel sqꞌuinal vin̈ ayic ol cꞌoch stiempoal scham vin̈, mato dꞌa scal oval ol cham vin̈. 11 Aocabꞌ Jehová max chaan in milcham vin̈ rey sicꞌbꞌilel yuuj. An̈ej to tzicꞌcot qꞌuen slanza vin̈ ayecꞌ dꞌa sjolomtac chiꞌ yedꞌ jun yedꞌtal a aꞌ chiꞌ, tzon̈ bꞌati, xchi vin̈.

12 Icha chiꞌ ix aj yicꞌancot qꞌuen lanza chiꞌ vin̈aj David chiꞌ yedꞌ jun yedꞌtal a aꞌ ayecꞌ dꞌa sjolomtac vin̈aj Saúl chiꞌ, ix cot ebꞌ vin̈. Malaj mach ix ilani, malaj mach ix abꞌani, malaj mach ix el svayan̈. Masanil ebꞌ chamnac el svayi yujto a Jehová ix acꞌancot jun nivan vayan̈ dꞌa yibꞌan̈ ebꞌ. 13 Ix lajvi chiꞌ, ix ecꞌ vin̈aj David chiꞌ dꞌa junxo scꞌaxepal jun chꞌolan, ix qꞌue vin̈ dꞌa sjolom jun lum vitz, najat ix aj scal ebꞌ. 14 Te chaan̈ ix avaj vin̈ dꞌa vin̈aj Abner yedꞌ dꞌa ebꞌ soldado vin̈ rey chiꞌ, ix yalan vin̈ icha tic:

—Abner, tacꞌvan dꞌayin, xchi vin̈.

Ix tacꞌvi vin̈aj Abner chiꞌ icha tic:

—¿Mach ach, yuj chiꞌ tzach avaj dꞌa vin̈ rey tic? xchi vin̈.

15 Ix yalan vin̈aj David chiꞌ icha tic:

—Abꞌi malaj mach syal slajbꞌan sbꞌa edꞌoc dꞌa scal ebꞌ quetisraelal tic jun. Tato icha chiꞌ, ¿tas yuj max a tan̈vej vin̈ rey cajalil chiꞌ? Ay jun vin̈ ix xidꞌecꞌ taꞌ ix snibꞌej smilcham vin̈. 16 A tas ix a cꞌulej chiꞌ man̈ vachꞌoc. A in tic sval dꞌa yichan̈ Jehová to e moj val tzex cham e masanil, yujto max e tan̈vej vin̈ rey sicꞌbꞌilel yuj Jehová. Say ilaꞌ bꞌajtil ayecꞌ qꞌuen slanza vin̈ yedꞌ jun yedꞌtal a aꞌ ayecꞌ dꞌa sjolomtac vin̈, ol ilani tato ol chax uuj, xchi vin̈.

17 Ayic ix yabꞌan sjaj vin̈aj David chiꞌ vin̈aj Saúl, ix avaj chaan̈ vin̈:

—Ach David, ¿tom a ach tzach lolon chiꞌ ma? xchi vin̈.

Ix tacꞌvi vin̈aj David chiꞌ icha tic:

—Iꞌ, mamin, a in toni. 18 Palta mamin rey, ¿tas val yuj tzin a pechbꞌeyecꞌoc? ¿Tas chucal ix in cꞌulej dꞌayach? ¿Tas in mul ix och dꞌayach? 19 Tzin tevi dꞌayach to tza cha abꞌ tas ol valaꞌ: Tato a Jehová ix ach acꞌanoch ajcꞌolal dꞌayin, comonoc val tzꞌel dꞌa scꞌool schaan junoc silabꞌ yic tzin yacꞌan nivancꞌolal. Palta tato anima ay yic jun tic jun, aocabꞌ Jehová scatabꞌani. Yujto ix in spechel ebꞌ dꞌa in macbꞌen dꞌa jun lum luum to yic Jehová yaji, icha val to tzin spechcanbꞌat ebꞌ yic svacꞌan servil juntzan̈ comon dios. 20 Comonoc man̈ najatoc ayin el dꞌa yichan̈ Jehová ayic tzin chami. Palta mamin rey, ¿tas yuj tzach elta ul in a sayeqꞌui? A in tic malaj velcꞌoch icha junoc nocꞌ cꞌac. Tzin a pechan bꞌeyecꞌ dꞌa jolomtac vitz tic icha mach sayan junoc nocꞌ ubꞌ, palta malaj bꞌaqꞌuin̈ syamchaj nocꞌ yuuj, xchi vin̈.

21 Ichato chiꞌ ix yalan vin̈aj Saúl chiꞌ:

—Ach David, svojtaquejel ticnaic ma to a in ix och in mul. Icha junoc malaj spensar, icha chiꞌ svutej in bꞌa, te chuc tzin cꞌulej dꞌayach. Yuj chiꞌ, meltzajan̈. Man̈xo ol vacꞌlaj chucal dꞌayach, yujto a dꞌa jun cꞌu tic ix a chꞌoxeli to ay velcꞌoch dꞌa yol a sat, xchi vin̈.

22 Ix tacꞌvixi vin̈aj David chiꞌ:

—Mamin rey, ina yajecꞌ qꞌuen a lanza dꞌa tic, cotocabꞌ junoc ebꞌ vin̈ a soldado chiꞌ ul yicꞌ qꞌueen. 23 A Jehová tzꞌacꞌan spac dꞌayon̈ junjun on̈ ato syalaꞌ tato tojol scutej co bꞌa icha dꞌa smojal. Vachꞌchom a ticnaic, ix ach yacꞌoch dꞌa yol in cꞌabꞌ, palta malaj in gana ix vacꞌoch in cꞌabꞌ dꞌayach, yujto a Jehová ach sicꞌanoch reyal. 24 Icha ix aj ticnaic, te nivan elcꞌoch dꞌa yol in sat, ichaton val chiꞌ in gana to ay pax velcꞌoch dꞌa yol sat Jehová. Aocabꞌ Jehová chiꞌ tzin colanel dꞌa masanil yaelal sjavi dꞌa vibꞌan̈, xchi vin̈.

25 Ix yalanxi vin̈aj Saúl chiꞌ icha tic:

—Ach David, yacꞌocabꞌ svachꞌcꞌolal Jehová dꞌa ibꞌan̈ ma. Svojtaquejeli to nivac yelcꞌoch tas ol a cꞌulej, vachꞌn̈ej ol ach ajelcꞌochoc, xchi vin̈.

Ix lajvi chiꞌ, ix pax vin̈aj Saúl chiꞌ dꞌa spalacio, axo vin̈aj David chiꞌ ix bꞌatxican vin̈.