Ix lajvi chiꞌ, ix bꞌatcan vin̈aj David dꞌa tzꞌinan luum dꞌa yol yic Parán. 2 A dꞌa chon̈abꞌ Maón, ay jun vin̈ te bꞌeyum, oxeꞌ mil nocꞌ scalnel vin̈, jun mil nocꞌ schiva vin̈. Ay sluum vin̈ dꞌa slacꞌanil chon̈abꞌ Carmel, ataꞌ sjoxel nocꞌ scalnel vin̈ chiꞌ. 3 A jun vin̈ chiꞌ, Nabal sbꞌi vin̈, yin̈tilal vin̈aj Caleb, juneln̈ej te chuc spensar vin̈. Axo pax ix yetbꞌeyum vin̈, Abigail sbꞌi ix. A jun ix chiꞌ, te vachꞌ yilji ix, te ay pax spensar ix.

4 Ayic ayecꞌ vin̈aj David chiꞌ dꞌa tzꞌinan luum, ix yabꞌan vin̈ to a vin̈aj Nabal chiꞌ ayecꞌ vin̈ sjoxel nocꞌ scalnel dꞌa Carmel chiꞌ. 5 Yuj chiꞌ ix schecbꞌat lajun̈van̈ ebꞌ vin̈ schecabꞌ vin̈ yic bꞌat acꞌji stzatzil scꞌol vin̈aj Nabal chiꞌ, 6 bꞌat yalpax juntzan̈ lolonel tic ebꞌ vin̈ dꞌa vin̈: Syal vin̈aj David: Juncꞌolalocabꞌ ajecꞌ yedꞌ masanil ebꞌ cajan edꞌoc dꞌa yol a pat yedꞌ masanil tas ay dꞌayach. 7 Ix vabꞌi to ayach ecꞌ a joxanel nocꞌ a calnel. Ojtacpaxi to a ebꞌ a tan̈vum calnel ayn̈ejecꞌ ebꞌ quedꞌoc dꞌa Carmel tic. Ayic ayecꞌ ebꞌ quedꞌoc dꞌa tic, malaj jabꞌoc tas ix icꞌan ebꞌ, malaj pax jabꞌoc tas ix quiqꞌuecꞌ dꞌa ebꞌ. 8 Syal a cꞌanbꞌan juntzan̈ chiꞌ dꞌa ebꞌ a checabꞌ chiꞌ. A ebꞌ ol alan dꞌayach chajtil to yel. Dꞌa val scꞌual jun a qꞌuin̈ tzon̈ javi, yuj chiꞌ stevi vin̈aj David dꞌayach to tzon̈ a cha dꞌa vachꞌil, tzacꞌan dꞌayon̈ tastac ay dꞌayach. Acꞌpaxcot yic vin̈aj David a vachꞌcꞌool, xchicot vin̈aj David dꞌayach, xe chi, xchi vin̈.

9 Ayic ix cꞌoch ebꞌ vin̈ schecabꞌ vin̈aj David chiꞌ dꞌa vin̈aj Nabal chiꞌ, ix yalan ebꞌ vin̈ masanil tas ix yalcot vin̈aj David chiꞌ, ix lajvi chiꞌ ix can ebꞌ vin̈ stan̈vej spac ol yal vin̈aj Nabal chiꞌ. 10 Palta ix yalan vin̈aj Nabal chiꞌ icha tic:

—¿Tas yaj vin̈aj David yuninal vin̈aj Isaí chiꞌ? A ticnaic man̈ jantacoc vinac tzꞌel dꞌa ebꞌ yajal, icha chiꞌ yaj jun vin̈ chiꞌ. 11 Max yal-laj vacꞌan svael yuqꞌuel yedꞌ schibꞌej ebꞌ in joxum calnel tic dꞌa ebꞌ anima man̈ vojtacoc, man̈ vojtacocpaxi bꞌaj scoti, xchi vin̈.

12 Icha chiꞌ ix aj smeltzajxi ebꞌ vin̈ schecabꞌ vin̈aj David chiꞌ. Ayic ix cꞌoch ebꞌ vin̈ dꞌa vin̈, ix yalan ebꞌ vin̈ masanil tas ix yal vin̈aj Nabal chiꞌ. 13 Yuj chiꞌ ix yal vin̈aj David chiꞌ dꞌa masanil ebꞌ vin̈ ajun yedꞌoc:

—E masanil, iqꞌuec qꞌuen eyespada, xchi vin̈.

Masanil ebꞌ vin̈ svinac vin̈ chiꞌ, ix yacꞌoch yespada ebꞌ vin̈ dꞌa snan̈al, icha ix yutej yic vin̈ chiꞌ. Chan̈eꞌ ciento ebꞌ vin̈ vinac chiꞌ ix bꞌat yedꞌ vin̈, axo chabꞌ cientoxo ebꞌ vin̈ jun, ix can ebꞌ vin̈ stan̈vej scꞌael ebꞌ vin̈. 14 Axo ix aj jun, ay junoc ebꞌ vin̈ schecabꞌ vin̈aj Nabal ix bꞌat alan dꞌa ix Abigail ix yetbꞌeyum vin̈aj Nabal chiꞌ icha tic:

—Ato dꞌa lum tzꞌinan luum ix scheccot juntzan̈ ebꞌ vin̈ schecabꞌ vin̈aj David dꞌa vin̈ in patrón tic, yic ix ul acꞌji stzatzil scꞌol vin̈ yuj ebꞌ vin̈, palta te chuc ix yutej vin̈ slolon dꞌa ebꞌ vin̈. 15 Palta jun, a juntzan̈ ebꞌ vin̈ chiꞌ, vachꞌn̈ej ix yutej sbꞌa ebꞌ vin̈ dꞌayon̈ ayic ix on̈ ecꞌn̈ej tan̈voj calnel bꞌaj ayecꞌ ebꞌ vin̈ chiꞌ. Maj on̈ stzuntzej jabꞌoc ebꞌ vin̈, malaj jabꞌoc tas ix yiqꞌuecꞌ ebꞌ vin̈ dꞌayon̈. 16 Cꞌual dꞌacꞌval ix on̈ stan̈vej ebꞌ vin̈ taꞌ yacbꞌan sco tan̈vej nocꞌ calnel chiꞌ. 17 Palta icha val vin̈ in patrón tic, toton val juneln̈ej chuc vin̈, max yal-laj co lolon yedꞌ vin̈. Naꞌ a ach tic, tzilan tas tza cꞌulej, yujto dꞌa val yel ay val tas man̈ vachꞌoc ol ja dꞌa quibꞌan̈ yedꞌ vin̈, xchi jun vin̈ checabꞌ chiꞌ.

18 Elan̈chamel ix yal ix Abigail chiꞌ to tzꞌicꞌchajcot chabꞌoc ciento pan, chabꞌoc tzꞌuum bꞌudꞌan yuj vino, ovan̈oc nocꞌ calnel ton̈ej bꞌolbꞌil yedꞌ oyeoc arroba ixim trigo cꞌanbꞌinac, cien bꞌuyan̈oc sat uva tacjinac yedꞌ pax junoc cien quechan̈ teꞌ higo tacjinac yaman yaji. Ix lajvi chiꞌ ix acꞌjioch dꞌa yibꞌan̈ juntzan̈ nocꞌ bꞌuru. 19 Ix yalan ix dꞌa ebꞌ schecabꞌ chiꞌ:

—Bꞌabꞌlajan̈ec, tzacꞌanto ol in bꞌat eyuuj, xchi ix.

Malaj tas ix yal ix dꞌa vin̈ yetbꞌeyum chiꞌ. 20 Ix qꞌue ix dꞌa yibꞌan̈ jun nocꞌ bꞌuru, ix em ix dꞌa jun utzin bꞌe tzꞌem dꞌa jun chꞌolan. Axo ix yilan ix to van yemul vin̈aj David dꞌa yichan̈ ix yedꞌ ebꞌ vin̈ ajun yedꞌoc, yuj chiꞌ ix bꞌat ix scha vin̈.

21 Ix yal vin̈aj David chiꞌ dꞌa ebꞌ vin̈ ajun chiꞌ yedꞌoc icha tic: Nabꞌan̈ej co tan̈vejnac nocꞌ smolbꞌetzal nocꞌ vin̈aj Nabal chiꞌ dꞌa tzꞌinan luum. Malaj val jabꞌoc tas quicꞌnac ecꞌ dꞌa vin̈, palta co tan̈vejn̈ejnac nocꞌ scalnel vin̈ chiꞌ. Te chuclaj syutej vin̈ spactzitan co vachꞌ pensaril chiꞌ. 22 Yuj chiꞌ svalaꞌ: Aocabꞌ Dios tzꞌacꞌanoch in yaelal tato pitzanto vin̈aj Nabal chiꞌ, ma junocxo vinac dꞌa scal ebꞌ scꞌabꞌ yoc vin̈ qꞌuicꞌan yabꞌ icha tic.

23 Ayic ix yilanbꞌat vin̈aj David ix Abigail chiꞌ, ix emta ix dꞌa yibꞌan̈ nocꞌ bꞌuru chiꞌ, ix em n̈ojan ix dꞌa sat luum. 24 Elan̈chamel ix em n̈ojnaj ix dꞌa yichan̈ vin̈, ix yalan ix:

—A chucal ix scꞌulej vin̈ vetbꞌeyum, cotocabꞌ dꞌa vibꞌan̈. Tzin tevi dꞌayach to tzin a cha lolon jabꞌoc, tzabꞌan tas ol valaꞌ. 25 Man̈ acꞌoch vin̈aj Nabal chiꞌ dꞌa a cꞌool. A jun vin̈ chiꞌ, quistal vin̈, smojton val scꞌulan vin̈ icha sbꞌi chiꞌ. Malaj spensar vin̈, yuj chiꞌ an̈ej chucal pensar syal vin̈. A in pax a checabꞌ in tic, maj vil-laj ebꞌ vin̈ a checabꞌ ix a checbꞌati. 26 Palta jun, a Jehová ix ach cachan vanajoc ayic dꞌin̈an a milancham anima yuj a pactzitan schucal ebꞌ dꞌa a patic. Elocabꞌ dꞌa scꞌol Jehová to a ebꞌ ayoch ajcꞌolal dꞌayach yedꞌ ebꞌ snibꞌej tzach ixtani, cotocabꞌ dꞌa yibꞌan̈ ebꞌ icha val tzꞌaj scot dꞌa yibꞌan̈ vin̈aj Nabal chiꞌ. 27 Axo ticnaic jun, tzin tevi dꞌayach to a jabꞌ silabꞌ svicꞌcot tic dꞌayach, tza pucbꞌat dꞌa ebꞌ vin̈ a checabꞌ ajun tic edꞌoc. 28 Tzacꞌan nivancꞌolal dꞌa in patic a in a checabꞌ in tic. Val yel a Jehová ol ochn̈ej edꞌoc dꞌa opisio yedꞌ ebꞌ in̈tilal, ina to yuj Jehová tzacꞌ oval, malaj chucal pax tza cꞌulej. 29 Vachꞌchom ay mach tzach pechan bꞌeyecꞌoc, snibꞌej ebꞌ tzach smilchamoc, malaj tas ol ach icꞌanoc, yujto cꞌubꞌabꞌil ach el yuj Jehová co Diosal. Axo pax ebꞌ ayoch ajcꞌolal dꞌayach jun, a Jehová ol julanel ebꞌ icha junoc mach sjulanel junoc qꞌuen qꞌueen yedꞌ junoc mejmeech. 30-31 Yujto tza cha abꞌ tas svalaꞌ, yuj chiꞌ ayic ol elcꞌoch masanil tas vachꞌ ix yal Jehová dꞌa ibꞌan̈, ol ach tzalajoc ayic ol a naancoti to maj acꞌoch a cꞌabꞌ a milancham ebꞌ malaj smul ayic ijan ix acꞌanecꞌ a pac dꞌa ebꞌ chuc ix yutej sbꞌa dꞌayach. Ayic ol ach yicꞌanchaan̈ Jehová yedꞌ opisio, tzin a nacot a in a checabꞌ in tic, xchi ix dꞌa vin̈.

32 Ix tacꞌvi vin̈aj David chiꞌ dꞌa ix icha tic:

—Aljocabꞌ vachꞌ lolonel dꞌa Jehová co Diosal a on̈ israel on̈ tic to aꞌ ix ach checancot ul in a chaꞌa. 33 Yacꞌocabꞌpax svachꞌcꞌolal dꞌa ibꞌan̈ yujto te vachꞌ a pensar, yujto a ach tzin a cach vanajoc yic max in milcham anima yic svacꞌanecꞌ in pac dꞌa ebꞌ. 34 Palta a ticnaic, svacꞌ in tiꞌ dꞌayach dꞌa yichan̈ Jehová co Diosal, aton jun in cachanoch vaan vacꞌan chucal dꞌayach, tato maj a pil ip a cot ul in a chaꞌa, qꞌuicꞌan man̈xo pitzanoc vin̈aj Nabal, man̈xa pax junoc vinac dꞌa yin̈tilal vin̈ tzato cani, xchi vin̈.

35 Ix lajvi chiꞌ, ix schaanecꞌ vin̈ masanil tastac yedꞌnac ix chiꞌ, ix yalan vin̈:

—Vachꞌ tzach meltzaj dꞌa a pat dꞌa tzalajcꞌolal. Tic val scham ilani to ix vabꞌ tas ix alaꞌ, tzin cꞌanabꞌajan tas ix a cꞌanaꞌ.

36 Ayic ix meltzaj ix Abigail chiꞌ bꞌaj ayecꞌ vin̈aj Nabal chiꞌ, ix yilan ix to ayoch jun qꞌuin̈ yuj vin̈ icha sqꞌuin̈ ebꞌ vin̈ rey. Te chamnac vin̈ yuj an̈, ste tzalaj vin̈, yuj chiꞌ malaj tas ix yal ix dꞌa vin̈, ato dꞌa junxo cꞌu. 37 Ayic ix qꞌuin̈ibꞌi dꞌa junxo cꞌu chiꞌ, ayic toxo ix el an̈ dꞌa sat vin̈aj Nabal chiꞌ, ix yalan ix tas ix uji, yuj chiꞌ ix och jun yabꞌil dꞌa yol sjolom vin̈, ix sicbꞌiel snivanil vin̈ yuuj. 38 Lajun̈eꞌ cꞌual ix och jun yabꞌil chiꞌ dꞌa vin̈, ix cham vin̈ yuj Jehová. 39 Ayic ix yabꞌan vin̈aj David to toxo ix cham vin̈, ix yalan vin̈ icha tic:

—Aljocabꞌ vachꞌ lolonel dꞌa Jehová yujto toxo ix yaqꞌuecꞌ in pac dꞌa vin̈aj Nabal yuj tas ix in yutej vin̈. A Jehová chiꞌ ix in cachanoch vaan yuj tas chuc ijan ix in cꞌulej. An̈ejaꞌ ix acꞌancot yaelal dꞌa yibꞌan̈ vin̈aj Nabal chiꞌ yuj schucal, xchi vin̈.

Ix lajvi chiꞌ ix yacꞌanbꞌat schecabꞌ vin̈ dꞌa ix Abigail yic bꞌat yal ebꞌ vin̈ to snibꞌej vin̈ syicꞌ ix. 40 Ayic ix cꞌoch ebꞌ vin̈ checabꞌ chiꞌ dꞌa ix dꞌa Carmel, ix yalan ebꞌ vin̈:

—A vin̈aj David ix on̈ checancot dꞌayach, to sgana vin̈ tzach och yetbꞌeyumoc, xchi ebꞌ vin̈ dꞌa ix.

41 Ix em n̈ojan ix, ix yalan ix:

—A in tic schecabꞌ in vin̈, te bꞌecan in cꞌol in bꞌican yoc ebꞌ schecabꞌ vin̈, tato icha chiꞌ syal vin̈ dꞌayin, xchi ix.

42 Ayic ix lajvi yalan ix icha chiꞌ, ix sbꞌoan sbꞌa ix elan̈chamel, ix cot ovan̈ ebꞌ ix schecabꞌ ix yedꞌoc, ix qꞌue ix dꞌa yibꞌan̈ jun nocꞌ bꞌuru, ix och tzacꞌan ix yuj ebꞌ vin̈ schecabꞌ vin̈aj David chiꞌ. Icha chiꞌ ix aj yicꞌan ix vin̈aj David chiꞌ.

43 Ix yicꞌanpax ix Ahinoam vin̈, aton jun ix aj Jezreel. A ebꞌ ix chavan̈ chiꞌ ix och yetbꞌeyumoc vin̈. 44 Yujto a vin̈aj Saúl, toxo ix yacꞌ ix yisil vin̈ ix Mical dꞌa vin̈aj Palti, yuninal vin̈aj Lais aj Galim. A ix Mical chiꞌ, aton ix yetbꞌeyumtaxon vin̈aj David chiꞌ.