Maj smil-laj vin̈aj Saúl vin̈aj David
24
Ayic ix lajvi yacꞌan oval vin̈aj Saúl yedꞌ ebꞌ filisteo chiꞌ, ix alji dꞌa vin̈ to a dꞌa tzꞌinan luum dꞌa En-gadi ayecꞌ vin̈aj David chiꞌ. 2 Yuj chiꞌ oxeꞌ mil ebꞌ soldado te jelan dꞌa scal ebꞌ israel ix siqꞌuel vin̈aj Saúl chiꞌ, yic sbꞌat ebꞌ sayecꞌ vin̈aj David chiꞌ yedꞌ ebꞌ ajun yedꞌ vin̈ dꞌa sattac qꞌuen qꞌueen bꞌaj ay nocꞌ cꞌultaquil chiva. 3 Ayic ix cꞌoch vin̈aj Saúl yedꞌ ebꞌ soldado dꞌa juntzan̈ teꞌ macteꞌ calnel dꞌa tiꞌ bꞌe, ix och vin̈ chuljel dꞌa yol jun qꞌuen n̈aqꞌueen ay dꞌa slacꞌanil chiꞌ. Man̈ yojtacoclaj vin̈ tato ataꞌ ayecꞌ vin̈aj David yedꞌ ebꞌ soldado dꞌa yichochcꞌoch qꞌuen chiꞌ. 4 Yuj chiꞌ ix yal ebꞌ vin̈ ajun yedꞌ vin̈aj David chiꞌ:—A ticnaic ix elcꞌoch tas ix yal Jehová to syacꞌoch vin̈ ajcꞌool dꞌa yol a cꞌabꞌ. A ach tza naꞌa tas tzutej, xchi ebꞌ vin̈ dꞌa vin̈.
Ix qꞌue vaan vin̈, te cꞌojancꞌolal ix cot vin̈, ix spolanel jabꞌ stiꞌ sjucan pichul vin̈aj Saúl chiꞌ vin̈. 5 Ix lajvi yutan vin̈ icha chiꞌ, ix cuspaxqꞌue scꞌool vin̈. 6 Ix yalan vin̈ dꞌa ebꞌ vin̈ ajun yedꞌoc chiꞌ icha tic:
—Aocabꞌ Jehová max chaan in milcham vin̈ in reyal tic, yujto aꞌ sicꞌannacoch vin̈ reyal, xchi vin̈.
7 Icha chiꞌ ix yutej vin̈aj David chiꞌ scachan ebꞌ vin̈ ajun yedꞌoc chiꞌ. Maj yal-laj vin̈ to ay tzꞌutaj vin̈aj Saúl chiꞌ yuj ebꞌ vin̈, ton̈ej ix yiloch ebꞌ vin̈ ix elixta vin̈ dꞌa yol qꞌuen n̈aqꞌueen chiꞌ, ix bꞌatxican vin̈. 8 Ix lajvi chiꞌ, ix elta vin̈aj David chiꞌ dꞌa spatic vin̈, ix avajbꞌat vin̈:
—Mamin rey, xchibꞌat vin̈.
Axo ix meltzajbꞌat qꞌuelan vin̈aj Saúl chiꞌ dꞌa spatic, ix em n̈ojnaj vin̈aj David chiꞌ, ix yalan vin̈:
9 —Mamin, ¿tas yuj tza cha abꞌ dꞌa ebꞌ anima tzꞌalani to chuc tas tzin say dꞌa a patic? 10 Naꞌeli to a ticnaic a Jehová ix ach acꞌanoch dꞌa yol in cꞌabꞌ dꞌa yol qꞌuen n̈aqꞌueen tic. A ebꞌ vin̈ ajun vedꞌoc, ix yal ebꞌ vin̈ to tzach in milchamoc, palta maj yal-laj in cꞌool. Ix in naꞌ to rey ach, a Jehová sicꞌannac ach och reyal.
11 Mamin, iltonabꞌ jabꞌ stiꞌ a jucan pichul vedꞌnac tic. Te secojtac ix aj ach in milanchamoc tato ix yal in cꞌool. Yuj chiꞌ a dꞌa jun tic syal snachajel uuj to malaj tas chuc tzin naꞌ dꞌa a patic, malaj bꞌaj ix vicꞌchaan̈ in bꞌa dꞌayach. Palta ¿tas yuj tzin a sayeqꞌui yic tzin a milancham alani?
12 A ticnaic, on̈ bꞌeycꞌolajocabꞌ co chavan̈il yuj Jehová Dios, mach tojol spensar, aocabꞌ tzꞌacꞌan spac dꞌayach yuj tas tzin utej. A inxo tic jun, man̈ ol vacꞌoch in cꞌabꞌ ach in milanchamoc. 13 Ay jun lolonel syal ebꞌ anima dꞌa pecaꞌ icha tic: A dꞌa ebꞌ chuc, ataꞌ scot chucal, xchi. Yuj chiꞌ mamin rey, malaj bꞌaqꞌuin̈ ol vacꞌoch in cꞌabꞌ dꞌayach.
14 Mamin rey, natonabꞌi to a ach tic sreyal ach Israel. A inxo van in a sayanecꞌ tic, tocval ay jabꞌoc velcꞌochi. Lajan in val icha nocꞌ chamnac tzꞌiꞌ, ma icha val nocꞌ cꞌac. 15 Yuj chiꞌ aocabꞌ Jehová tzon̈ bꞌeycꞌolan co chavan̈il, mach on̈ ay co mul. Aocabꞌ tzꞌilan tas tzin utej tic, tzin scolanel dꞌayach, xchi vin̈.
16 Axo ix lajvi slolon vin̈aj David chiꞌ, ix yalan vin̈aj Saúl chiꞌ:
—Ach David, ¿tom a ach tzach lolon chiꞌ ma? xchi vin̈.
—A ach tic te tojol a pensar. Te vachꞌ ix utej a pactzitan in chuc pensaril dꞌayach. 18 A val ticnaic tza chꞌoxeli to vachꞌ tzutej a pensar dꞌayin. Ix in yacꞌvaloch Jehová dꞌa yol a cꞌabꞌ, palta maj in a milchamlaj. 19 Val yel, malaj junoc mach tato tzꞌilchaj junoc yajcꞌol yuuj, malaj tas syutej. A Jehová ol pactzitan dꞌayach yuj jun a vachꞌcꞌolal tic dꞌayin. 20 Ix nachajel vuj ticnaic to a ach val ol ach och reyal, yuj chiꞌ a opisio dꞌa yibꞌan̈ co chon̈abꞌ tic, malaj mach ol yal yicꞌanecꞌ dꞌa yol a cꞌabꞌ.
21 Acꞌcan a tiꞌ dꞌayin ticnaic dꞌa yichan̈ Jehová to man̈ ol a satel-laj vin̈tilal yedꞌ ebꞌ ayto vuj in bꞌa yedꞌoc, palta to ol in bꞌinajn̈ejcanoc, xchi vin̈.
22 Ix yacꞌan stiꞌ vin̈aj David chiꞌ yuj tas ix yal vin̈ chiꞌ. Ix lajvi chiꞌ, ix pax vin̈aj Saúl chiꞌ dꞌa spalacio, axo pax vin̈aj David chiꞌ yedꞌ ebꞌ vin̈ ajun yedꞌoc, ix ochixcan ebꞌ vin̈ dꞌa yoltac qꞌuen n̈aqꞌueen chiꞌ.