—¿Tzam in a chabꞌat vacꞌ oval yedꞌ juntzan̈ filisteo chiꞌ? xchi vin̈.

Ix tacꞌvi Jehová:

—Ixic acꞌ oval, tza colancanel chon̈abꞌ Keila tic, xchi dꞌa vin̈.

3 Axo ebꞌ vin̈ ajun yedꞌ vin̈aj David chiꞌ, ix yal ebꞌ dꞌa vin̈ icha tic:

—Ina to dꞌa xivcꞌolal ayon̈ecꞌ dꞌa Judá tic, ocxom val to tzon̈ bꞌat cacꞌ oval yedꞌ ebꞌ filisteo dꞌa chon̈abꞌ Keila, xchi ebꞌ.

4 Yuj chiꞌ ix scꞌanbꞌejxi vin̈ dꞌa Jehová. Ix tacꞌvixi dꞌa vin̈, ix yalani:

—Ixic dꞌa chon̈abꞌ Keila chiꞌ. A in ol vacꞌoch ebꞌ filisteo chiꞌ dꞌa yol a cꞌabꞌ, xchi.

5 Yuj chiꞌ ix bꞌat vin̈aj David chiꞌ yedꞌ ebꞌ soldado ajun yedꞌoc dꞌa chon̈abꞌ Keila chiꞌ. Ataꞌ ix yacꞌ oval ebꞌ yedꞌ ebꞌ filisteo chiꞌ. Ix acꞌji ganar ebꞌ yuj ebꞌ, yuj chiꞌ ix yicꞌcanecꞌ smolbꞌetzal nocꞌ ebꞌ smasanil. Icha chiꞌ ix aj scolchajcanel ebꞌ cajan dꞌa Keila chiꞌ.

6 A vin̈aj Abiatar yuninal vin̈aj Ahimelec, vin̈ ix el lemnajoc, ix cꞌoch vin̈ bꞌaj ayecꞌ vin̈aj David dꞌa chon̈abꞌ Keila chiꞌ, yedꞌnac jun chaleca vin̈. 7 Ix alchaj dꞌa vin̈aj Saúl to a dꞌa chon̈abꞌ Keila ayecꞌ vin̈aj David chiꞌ. Ix snaan vin̈ icha tic: A ticnaic toxo ix acꞌjioch vin̈aj David chiꞌ dꞌa yol in cꞌabꞌ yuj Dios, yujto toxo ix bꞌat smacbꞌejcanoch sbꞌa vin̈ dꞌa yol jun chon̈abꞌ to te vachꞌ yajoch spuertail smacchaji, xchi vin̈.

8 Ix lajvi chiꞌ, ix yavtan masanil ebꞌ soldado vin̈, yic sbꞌat oymitaj vin̈aj David chiꞌ yedꞌ ebꞌ soldado dꞌa Keila yuj ebꞌ yalani. 9 Palta ix yojtaquejel vin̈aj David chiꞌ to van scot vin̈aj Saúl yacꞌ oval yedꞌ vin̈, yuj chiꞌ ix yal vin̈ dꞌa vin̈aj sacerdote Abiatar to syicꞌcot cꞌapac chaleca vin̈ yic scꞌanbꞌej ebꞌ dꞌa Jehová. 10 Ix yalan vin̈aj David chiꞌ icha tic:

—Mamin Jehová, co Diosal ach a on̈ israel on̈ tic, a in a checabꞌ in tic ix vabꞌi to a vin̈aj Saúl van snaan vin̈ ul satel chon̈abꞌ Keila tic vuuj. 11 ¿Ol am javoc vin̈ icha ix aj vabꞌani? ¿Ol am in yacꞌoch ebꞌ cajan dꞌa chon̈abꞌ Keila tic dꞌa yol scꞌabꞌ vin̈? Tzin tevi dꞌayach Jehová co Diosal a on̈ israel on̈ tic, to tzal dꞌayin, xchi vin̈.

Ix yalan Jehová chiꞌ:

—A vin̈aj Saúl chiꞌ van scot vin̈, xchi.

12 Ix scꞌanbꞌanxi vin̈aj David chiꞌ dꞌa Jehová chiꞌ:

—¿Ol am in yacꞌoch ebꞌ aj chon̈abꞌ Keila tic yedꞌ ebꞌ in soldado dꞌa yol scꞌabꞌ vin̈? xchi vin̈.

Ix yalanxi Jehová chiꞌ:

—Iꞌ, ol ex yacꞌoch ebꞌ, xchi.

13 Yuj chiꞌ ix el vin̈aj David yedꞌ ebꞌ soldado chiꞌ, ay am junoc 600 ebꞌ. Chꞌocchꞌoc bꞌaj ayecꞌ ebꞌ dꞌa juntac el. Ayic ix cꞌochxi yabꞌixal dꞌa vin̈aj Saúl chiꞌ to toxo ix el ebꞌ dꞌa chon̈abꞌ Keila chiꞌ, majxo bꞌatlaj vin̈ taꞌ.

14 Yuj chiꞌ ix aj vin̈aj David chiꞌ dꞌa juntzan̈ qꞌuen n̈aqꞌueen dꞌa siquil luum dꞌa yol yic Zif. Vachꞌchom ix saychajecꞌ vin̈ yuj vin̈aj Saúl chiꞌ dꞌa junjun cꞌu, palta maj acꞌjilaj vin̈ yuj Dios dꞌa yol scꞌabꞌ vin̈. 15 Ayic ix yabꞌan specal vin̈aj David chiꞌ to an̈ejaꞌ sayjiecꞌ vin̈ yuj vin̈aj Saúl chiꞌ yic smilanchamoc, ix canxon̈ej vin̈ dꞌa Hores, dꞌa tzꞌinan luum dꞌa yol yic Zif chiꞌ.

16 Ay jun cꞌual ix bꞌat vin̈aj Jonatán yil vin̈aj David dꞌa Hores chiꞌ. Ix acꞌji stecꞌanil vin̈aj David chiꞌ yuj vin̈ yic syacꞌanoch Dios vin̈ yipoc scꞌool. 17 Ix yalan vin̈ dꞌa vin̈aj David chiꞌ icha tic:

—Man̈ ach xivoc, yujto man̈ ol ach ilchajlaj yuj vin̈ in mam chiꞌ. Yujto a ach tic, ol ach ochn̈ej co reyaloc a on̈ israel on̈ tic, a inxo ol in och dꞌa schabꞌil yajalil dꞌayach. A jun tic yojtacxopax vin̈ in mam chiꞌ, xchi vin̈.

18 Ix snaanxicot strato ebꞌ vin̈ schavan̈il dꞌa yichan̈ Jehová. Ix lajvi chiꞌ, ix meltzajxi vin̈aj Jonatán chiꞌ dꞌa spat, axo pax vin̈aj David chiꞌ, ix cann̈ej vin̈ dꞌa Hores chiꞌ. 19 Axo ebꞌ cajan dꞌa Zif chiꞌ ix bꞌat alan dꞌa vin̈aj Saúl dꞌa Gabaa, ix yalan ebꞌ:

—A vin̈aj David, ayecꞌ vin̈ scꞌubꞌejel sbꞌa dꞌa yol co macbꞌen, dꞌa juntzan̈ qꞌuen n̈aqꞌueen dꞌa svitzal Haquila, dꞌa Hores, dꞌa stojolal sur dꞌa chon̈abꞌ Jesimón. 20 Yuj chiꞌ mamin rey, tato syal a cꞌool tzach bꞌat taꞌ, syal tzach bꞌati, ol co chꞌox vin̈ dꞌayach, xchi ebꞌ.

21 Ix yalan vin̈aj Saúl chiꞌ dꞌa ebꞌ:

—Yacꞌocabꞌ svachꞌcꞌolal Jehová dꞌa eyibꞌan̈, yujto tzꞌocꞌ e cꞌool dꞌayin. 22 A ticnaic, sval dꞌayex to bꞌat eyil val bꞌajvaltil ayecꞌ vin̈, mach ix ilani, yujto svabꞌi tobꞌ te jelan vin̈ scolan sbꞌa. 23 Tzeyil val sicꞌlabꞌil bꞌaj val scꞌubꞌejel sbꞌa vin̈ chiꞌ, tzul eyalanxi dꞌayin dꞌa sjichanil, icha chiꞌ ol aj in bꞌat eyedꞌoc. Tato yel ayecꞌ vin̈ taꞌ, ol bꞌat in sayecꞌ vin̈ dꞌa scal masanil yol yic Judá, xchi vin̈.

24 Ix bꞌabꞌlaj pax ebꞌ aj Zif chiꞌ dꞌa schon̈abꞌ, axo vin̈aj Saúl chiꞌ tzacꞌanto ix bꞌat vin̈ yedꞌ ebꞌ soldado. Axo pax vin̈aj David chiꞌ, ayecꞌ vin̈ yedꞌ ebꞌ vin̈ ajun yedꞌoc dꞌa Maón, dꞌa tzꞌinan luum, dꞌa acꞌlic dꞌa stojolal sur dꞌa chon̈abꞌ Jesimón. 25 Yuj chiꞌ ix bꞌat vin̈aj Saúl chiꞌ yedꞌ ebꞌ soldado say vin̈. Ayic ix alji jun tic dꞌa vin̈aj David chiꞌ, ix emta vin̈ dꞌa sattac qꞌueen, ix cann̈ej vin̈ dꞌa lum Maón dꞌa tzꞌinan luum chiꞌ. Yuj chiꞌ a ix yabꞌan vin̈aj Saúl chiꞌ icha chiꞌ, ix bꞌat vin̈ sayecꞌ vin̈ taꞌ. 26 A dꞌa jun spacꞌul jun vitz chiꞌ, ataꞌ sbꞌat vin̈aj Saúl yedꞌ soldado. Axo dꞌa junxo spatic luum, ataꞌ sbꞌatpax vin̈aj David yedꞌ ebꞌ soldado ajun yedꞌoc yic syacꞌ yip ebꞌ yel dꞌa vin̈aj Saúl chiꞌ. Palta toxo ix oyjichaan̈ vin̈aj David yedꞌ ebꞌ ajun yedꞌ vin̈ yuj vin̈aj Saúl yedꞌ ebꞌ soldado chiꞌ yic syamji ebꞌ. 27 Elan̈chamel ix cꞌoch jun vin̈ checabꞌ dꞌa vin̈aj Saúl chiꞌ, ix yalan vin̈:

—Mamin rey, meltzajan̈ dꞌa elan̈chamel, yujto a ebꞌ filisteo toxo ix och ebꞌ dꞌa yol co chon̈abꞌ, xchi vin̈.

28 Yuj chiꞌ ix bꞌat vin̈aj Saúl chiꞌ yacꞌ oval yedꞌ ebꞌ filisteo chiꞌ. Icha chiꞌ ix aj yoch vaan vin̈ spechan bꞌeyecꞌ vin̈aj David chiꞌ. Atax taꞌ ix scuchcan jun sat qꞌuen chiꞌ icha tic: Sat qꞌuen bꞌaj ix spoj sbꞌa bꞌe.

29 Icha chiꞌ ix aj sbꞌatcan vin̈aj David chiꞌ scꞌubꞌejel sbꞌa dꞌa yoltac qꞌuen n̈aqꞌueen dꞌa yol yic En-gadi.