3 Spetoj vin̈aj David dꞌa Adulam chiꞌ, ix cꞌochcan vin̈ dꞌa Mizpa, dꞌa yol yic Moab. Ix yalan vin̈ dꞌa vin̈ sreyal Moab chiꞌ icha tic:

—Tzin tevi dꞌayach to scan vin̈ in mam yedꞌ ix in nun edꞌoc masanto ol vil tas ol in yutej Dios, xchi vin̈.

4 Icha chiꞌ ix aj yicꞌanbꞌat smam snun vin̈ chiꞌ dꞌa yichan̈ vin̈ sreyal Moab chiꞌ. A yedꞌ vin̈ ix aj ebꞌ yacbꞌan ayecꞌ vin̈aj David chiꞌ scol sbꞌa dꞌa jolomtac vitz. 5 Axo vin̈aj Gad, schecabꞌ Dios ix alan dꞌa vin̈aj David chiꞌ icha tic:

—Man̈ ach can dꞌa tic yuj a colan a bꞌa, palta meltzajan̈ dꞌa yol yic Judá, xchi vin̈.

Icha chiꞌ ix aj sbꞌat vin̈aj David, masanto ix cꞌoch vin̈ dꞌa jun caltac teꞌ dꞌa yol yic Haret.

6 Ay jun cꞌual, cꞌojanem vin̈aj Saúl dꞌa yich jun teꞌ tamarisco dꞌa jolom vitz dꞌa Gabaa, lacꞌbꞌilqꞌue qꞌuen slanza vin̈ yuuj, oyanoch ebꞌ yajalil soldado dꞌa spatic vin̈. Ataꞌ ix yabꞌ vin̈ to ix checlaj bꞌaj ayecꞌ vin̈aj David yedꞌ ebꞌ soldado. 7 Yuj chiꞌ ix yal vin̈ dꞌa ebꞌ soldado oyanoch dꞌa spatic chiꞌ:

—Ex vetchon̈abꞌ yin̈tilal Benjamín, abꞌec tas ol valaꞌ: ¿Tom tzeyacꞌoch dꞌa e cꞌool to a vin̈ yuninal vin̈aj Isaí chiꞌ ol acꞌan e luum yedꞌ teꞌ eyuva? ¿Tom e masanil ol ex och dꞌa comandanteal yedꞌ dꞌa capitanil yuj vin̈? 8 Yuj chiꞌ e masanilxon̈ej a ex ayex ecꞌ tic tzex och ajcꞌolal dꞌayin. Malaj mach tzꞌalan dꞌayin, tato a vin̈ vuninal toxo ix yacꞌ strato vin̈ yedꞌ vin̈ yuninal vin̈aj Isaí chiꞌ. Malaj junoc ex ayex ecꞌ tic tzex och jabꞌoc ilcꞌolal vuuj. Malaj junoc ex tzeyal dꞌayin tato toxo ix och vin̈ vuninal chiꞌ yacꞌan scꞌol jun in checabꞌ, yic tzꞌoch ajcꞌolal dꞌayin in smilan icha scꞌulej ticnaic, xchi vin̈aj Saúl chiꞌ.

9 Aypaxoch vin̈aj Doeg aj Edom dꞌa scal ebꞌ schecabꞌ vin̈aj Saúl chiꞌ, yuj chiꞌ ix tacꞌvi vin̈ icha tic:

—Ix vil vin̈ yuninal vin̈aj Isaí chiꞌ ayic ix bꞌatcan vin̈ dꞌa Nob, ix cꞌoch vin̈ dꞌa vin̈aj Ahimelec yuninal vin̈aj Ahitob. 10 A vin̈aj Ahimelec chiꞌ, ix scꞌanbꞌej vin̈ dꞌa Jehová yuj vin̈aj David chiꞌ, ix acꞌji svael vin̈ yuj vin̈. Ix yacꞌanpax qꞌuen yespada vin̈aj Goliat vin̈ filisteo vin̈ dꞌa vin̈, xchi vin̈aj Doeg chiꞌ.

11 Yuj chiꞌ ix schecan vin̈ rey chiꞌ avtaj vin̈aj sacerdote Ahimelec chiꞌ yedꞌ masanil ebꞌ vin̈ sacerdote ay dꞌa Nob chiꞌ, aton ebꞌ vin̈ scꞌabꞌ yocto sbꞌa yedꞌ vin̈aj Ahimelec chiꞌ. Ayic ix cꞌoch ebꞌ vin̈ smasanil dꞌa yichan̈ vin̈ rey chiꞌ, 12 ix yalan vin̈ dꞌa vin̈aj Ahimelec chiꞌ:

—Ach yuninal vin̈aj Ahitob, abꞌ tas ol valaꞌ, xchi vin̈.

—Ayinecꞌ dꞌa yol a cꞌabꞌ mamin rey, xchi vin̈aj Ahimelec chiꞌ.

13 Ix scꞌanbꞌan vin̈aj Saúl chiꞌ dꞌa vin̈ icha tic:

—¿Tas yuj ayach och ajcꞌolal dꞌayin yedꞌ vin̈ yuninal vin̈aj Isaí chiꞌ? Ix acꞌ svael vin̈, ix acꞌanpax jun qꞌuen espada dꞌa vin̈, ix a cꞌanbꞌan dꞌa Dios yuj vin̈, yic tzꞌoch vin̈ ajcꞌolal dꞌayin yic tzin smilani, ichaton scꞌulej vin̈ ticnaic, xchi vin̈.

14 Ix yalan vin̈aj Ahimelec chiꞌ dꞌa vin̈ rey chiꞌ:

—Mamin rey, ¿mach junoc dꞌa scal ebꞌ a checabꞌ scꞌanabꞌajej val icha vin̈aj David, an̈ejtonaꞌ to a n̈iꞌ pax vin̈, yajal pax yaj vin̈ dꞌa scal ebꞌ a tan̈vumal, te nivan pax yelcꞌoch vin̈ dꞌa a palacio? 15 ¿Tocval bꞌabꞌelto tzin cꞌanbꞌej dꞌa Dios yuj vin̈? Mamin rey, malaj bꞌaj tzin och ajcꞌolal dꞌayach, yuj chiꞌ mocabꞌa tas tza naꞌ dꞌa in patic yedꞌ dꞌa spatic ebꞌ in cꞌabꞌ voc, yujto man̈ vojtacoc jabꞌoc tas yaj jun lolonel tic, xchi vin̈.

16 Palta dꞌa yelcꞌolal ix yal vin̈ rey chiꞌ dꞌa vin̈ icha tic:

—An̈ejto tzacꞌoch dꞌa a cꞌool to ol ach cham yedꞌ masanil ebꞌ a cꞌabꞌ oc tic, xchi vin̈.

17 A val dꞌa jun rato chiꞌ ix schecan ebꞌ stan̈vumal vin̈ rey chiꞌ, ix yalan vin̈:

—Mileccham masanil ebꞌ vin̈ sacerdote yic Jehová tic, yujto ayoch ebꞌ vin̈ yedꞌ vin̈aj David chiꞌ. Yojtac ebꞌ vin̈ to tzꞌel vin̈ elelal dꞌayin, palta maj yal-laj ebꞌ vin̈ vabꞌi, xchi vin̈.

Palta a ebꞌ soldado stan̈vumal vin̈ rey chiꞌ, maj yal-laj scꞌol ebꞌ ix smilcham ebꞌ vin̈ sacerdote yic Jehová chiꞌ. 18 Yuj chiꞌ ix yal vin̈ rey chiꞌ dꞌa vin̈aj Doeg chiꞌ:

—Milcham ebꞌ vin̈ a ach tic, xchi vin̈.

Ix och ijan vin̈aj Doeg chiꞌ smilancham ebꞌ vin̈ sacerdote chiꞌ. A dꞌa jun cꞌu chiꞌ, 85 ebꞌ vinac tzꞌacꞌanoch cꞌapac chaleca nabꞌa lino ix smilcham vin̈aj Doeg chiꞌ. 19 Dꞌa elan̈chamel, ix ochpax vin̈ dꞌa yol chon̈abꞌ Nob, aton schon̈abꞌ ebꞌ vin̈ sacerdote chiꞌ, a yedꞌ qꞌuen espada ix smilcham masanil ebꞌ vinac vin̈, ebꞌ ix ix, ebꞌ unin yedꞌ ebꞌ ato yalji. Ix smilpaxcham nocꞌ vacax vin̈, nocꞌ bꞌuru yedꞌ nocꞌ calnel. 20 Palta ay jun vin̈ yuninal vin̈aj Ahimelec, scuchan Abiatar, ix yacꞌ ganar vin̈ yel lemnaj bꞌaj van yoch chamel chiꞌ, ix bꞌatcan vin̈ bꞌaj ayecꞌ vin̈aj David. 21 Aꞌ vin̈ ix alan dꞌa vin̈aj David chiꞌ to a masanil ebꞌ vin̈ sacerdote yic Jehová, toxo ix miljicham ebꞌ vin̈ yuj tas ix yal vin̈aj Saúl. 22 Ix yalan vin̈aj David chiꞌ:

—A jun chiꞌ vojtactaxoni, yujto a dꞌa yic chiꞌ ix vilaꞌ to ayecꞌ vin̈aj Doeg taꞌ, yuj chiꞌ ix in naꞌa to a vin̈ ol alan dꞌa vin̈aj Saúl chiꞌ. A ticnaic, vuuj ix cham masanil ebꞌ a cꞌabꞌ oc chiꞌ, 23 palta jun, canan̈ vedꞌ dꞌa tic. Man̈ ach xivoc, yujto a vin̈ ayoch ajcꞌolal chiꞌ dꞌayach, aypaxoch vin̈ ajcꞌolal dꞌayin, palta vachꞌ aj vedꞌ dꞌa tic, xchi vin̈.