Ix el vin̈aj David dꞌa vin̈aj Saúl
21
Ix lajvi chiꞌ, ix bꞌatcan vin̈aj David chiꞌ dꞌa chon̈abꞌ Nob, ix ecꞌ vin̈ dꞌa vin̈aj sacerdote Ahimelec. Ix xivqꞌue vin̈ sacerdote chiꞌ ayic ix ul schaan vin̈aj David chiꞌ vin̈, ix yalan vin̈ dꞌa vin̈:—¿Tas yuj a achn̈ej tzach javi, malaj junoc mach edꞌnac? xchi vin̈ dꞌa vin̈aj David chiꞌ.
2 Ix tacꞌvi vin̈aj David chiꞌ:
—Atoni, yujto ay tas ix schec vin̈ rey ul in cꞌulej, palta snibꞌej vin̈ to malaj mach tzꞌojtacaneli, axo pax ebꞌ vin̈ ajun vedꞌ jun, ix val dꞌa ebꞌ vin̈ bꞌajtil ol vil-lajxi in bꞌa yedꞌ ebꞌ vin̈. 3 A ticnaic, ¿ay am jabꞌoc tas sco va dꞌayach? Acꞌ oyeoc co pan, ma yaln̈ej tas ayecꞌ dꞌayach, xchi vin̈.
4 Ix tacꞌvi vin̈ sacerdote chiꞌ:
—Malaj ixim comon pan ayeqꞌui. Ay ixim, palta a ixim tzꞌacꞌjioch dꞌa yichan̈ Jehová. Syal vacꞌan ixim dꞌayach, tato vachꞌ yaj ebꞌ vin̈ ajun chiꞌ edꞌoc, tato maj vay ebꞌ vin̈ yedꞌ ebꞌ ix ix, xchi vin̈.
5 Ix tacꞌvi vin̈aj David chiꞌ icha tic:
—Ayxotax scan ebꞌ ix cuuj, chabꞌjitax on̈ coti. Vachꞌchom yel, man̈ yicoc Jehová jun co checnabꞌil tic, palta yictax on̈ coti, vachꞌxo yaj ebꞌ vin̈ vedꞌnac chiꞌ icha yalan ley, yuj chiꞌ yel vachꞌxo yaj ebꞌ vin̈ ticnaic, xchi vin̈.
6 Ix lajvi chiꞌ, ix yacꞌan ixim pan yic Dios vin̈ sacerdote chiꞌ dꞌa vin̈. Malaj junocxo macan̈ ixim pan ay dꞌa yol scꞌabꞌ vin̈ sacerdote chiꞌ, an̈ej ixim toxo ix icꞌjiel dꞌa yichan̈ Dios dꞌa sat mexa yic tzꞌochixpaxcan ixim cꞌacꞌto sqꞌuexuloc. 7 A dꞌa jun cꞌu chiꞌ, ayecꞌ jun vin̈ schecabꞌ vin̈aj Saúl dꞌa slacꞌanil scajnubꞌ Dios, yujto ay tas ayoch dꞌa yibꞌan̈ vin̈. A jun vin̈ chiꞌ, edomita vin̈, Doeg sbꞌi vin̈, yajal yaj vin̈ dꞌa scal ebꞌ stan̈vumal scalnel vin̈aj Saúl chiꞌ.
8 Ix yalan vin̈aj David chiꞌ dꞌa vin̈aj Ahimelec chiꞌ icha tic:
—¿Ay am junoc qꞌuen lanza, ma junoc qꞌuen espada ayecꞌ dꞌayach? Yujto dꞌa elan̈chamel xon̈ej ix aj in checjicot yuj vin̈ rey chiꞌ, yuj chiꞌ majxo yal vicꞌancot qꞌuen vespada, ma junocxo qꞌuen yamcꞌabꞌ, xchi vin̈.
9 Ix tacꞌvi vin̈ sacerdote chiꞌ:
—A dꞌa tic ayecꞌ qꞌuen yespada vin̈aj Goliat, vin̈ filisteo a milnaccham dꞌa schꞌolanil yic Ela. A dꞌa tic ayecꞌ qꞌueen, pichanoch jun cꞌapac dꞌa qꞌueen, ayecꞌ qꞌuen dꞌa spatic cꞌapac chaleca. Syal icꞌanbꞌat qꞌueen. Tato max scha a cꞌol qꞌuen jun, man̈xalaj junocxo qꞌuen ay dꞌayin, xchi vin̈ dꞌa vin̈.
Ix tacꞌvi vin̈aj David chiꞌ, ix yalan vin̈:
—Malaj junocxo qꞌuen lajan yedꞌ jun qꞌueen chiꞌ. Acꞌ qꞌuen dꞌayin, xchi vin̈.
10 An̈ejaꞌ dꞌa jun cꞌu chiꞌ ix bꞌatn̈ej vin̈aj David chiꞌ scꞌubꞌejel sbꞌa dꞌa vin̈aj Saúl chiꞌ, ix cꞌoch vin̈ dꞌa chon̈abꞌ Gat bꞌaj rey vin̈aj Aquis. 11 Axo ebꞌ schecabꞌ vin̈aj Aquis chiꞌ ix alan icha tic:
—A jun vin̈ tic aton vin̈aj David, icha rey yaj vin̈ dꞌa Israel. Aton vin̈ sbꞌitaj yuj ebꞌ ix ix ayic sqꞌue chennaj ebꞌ ix, syalan ebꞌ ix icha tic:
Smilal ebꞌ ajcꞌol ix smilcham vin̈aj Saúl.
Lajlajun̈ miltac ix smilcham vin̈aj David, xchi ebꞌ ix, xchi ebꞌ.
12 Ix cham val yabꞌan juntzan̈ lolonel chiꞌ vin̈aj David chiꞌ, yuj chiꞌ ix xiv vin̈ dꞌa vin̈aj Aquis chiꞌ. 13 Dꞌa yichan̈ ebꞌ ix qꞌuexvi yilji vin̈aj David chiꞌ, ix yesanoch sbꞌa vin̈ quistalil, comonxon̈ej stzꞌibꞌej chꞌacan spatictac puerta vin̈, tzꞌemta jililoc yal stiꞌ vin̈ dꞌa xil stiꞌ. 14 Ix yalan vin̈aj Aquis chiꞌ dꞌa ebꞌ schecabꞌ chiꞌ: