—¿Tas val in mul? ¿Tom ay val junoc in mul te chuc ix in cꞌulej dꞌa vin̈ a mam, yuj chiꞌ tzin sayecꞌ vin̈ yic tzin smilanchamoc? xchi vin̈.

2 Ix tacꞌvi vin̈aj Jonatán chiꞌ:

—Man̈ jabꞌoc, man̈ ol ach chamlaj. Scham a naani to a masanil tas scꞌulej vin̈ in mam chiꞌ, syaln̈ej vin̈ dꞌayin, vachꞌchom nivan yelcꞌochi, ma quenn̈ej. ¿Tom ijan man̈ ol yal vin̈ dꞌayin yuj jun tic? Maay amlaj, xchi vin̈.

3 Ix och ijan vin̈aj David chiꞌ yalani:

—Yojtac vin̈ a mam chiꞌ to te vachꞌ cacꞌani, yuj chiꞌ max yal-laj vin̈ dꞌayach, max yal-laj scꞌol vin̈ tzojtaquejeli, yic max ach cusi. Palta yojtacxo Jehová to ayxo och chamel dꞌa vibꞌan̈, xchi vin̈.

4 Ix yalan vin̈aj Jonatán chiꞌ:

—Tato ay junoc bꞌaj syal ach in colani, al dꞌayin, xchi vin̈.

5 Ix tacꞌvi vin̈aj David chiꞌ:

—A qꞌuicꞌan tzꞌoch qꞌuin̈ yuj yalji qꞌuen uj, yovalil tzin em cꞌojan in va dꞌa stzꞌey vin̈ rey chiꞌ. Elocabꞌ dꞌa a cꞌool tzin cꞌubꞌejcanel in bꞌa dꞌa caltac teꞌ tic, masanto dꞌa yemcꞌualil chabꞌej. 6 Tato tzin scꞌanbꞌej vin̈ a mam chiꞌ, tzal dꞌa vin̈ to a dꞌayach ix in cꞌanaꞌ to tzin bꞌatcan dꞌa Belén in chon̈abꞌ, yujto a masanil ebꞌ in cꞌabꞌ voc ol acꞌanoch qꞌuin̈ ichataxon dꞌa junjun abꞌil. 7 Yicꞌocabꞌ tas tzal chiꞌ, tato xchi vin̈, vachꞌ vic syal chiꞌ. Tato scot yoval vin̈ jun, syalelcꞌochi to naanxo yuj vin̈ in smilanchamoc. 8 Ina to toxo ix cacꞌ co tiꞌ dꞌa yichan̈ Jehová to vachꞌ cacꞌani, yuj chiꞌ tzin cꞌan jun tic dꞌayach. Palta tato yel ay in mul, syal in a milanchamoc, man̈ yovaliloc tzin icꞌbꞌat dꞌa yichan̈ vin̈ a mam chiꞌ, xchi vin̈.

9 Ix tacꞌvi vin̈aj Jonatán chiꞌ:

—Man̈ a na icha chiꞌ, tato ix vabꞌ specal to snibꞌej vin̈ in mam chiꞌ tzach smilchamoc, toxom ix val dꞌayach, xchi vin̈ dꞌa vin̈.

10 —¿Mach pax ol alan dꞌayin, tato chuc ol aj stacꞌvoc vin̈ dꞌayach? xchi vin̈aj David chiꞌ.

11 Ix yalan vin̈aj Jonatán chiꞌ:

—Con̈ vedꞌoc, con̈ el dꞌa spatiquel chon̈abꞌ tic, xchi vin̈.

Ix bꞌat ebꞌ vin̈ schavan̈il. 12 Ayic ix cꞌoch ebꞌ vin̈ bꞌaj man̈xalaj anima, ix yalan vin̈aj Jonatán chiꞌ:

—Yojtac Jehová co Diosal to yel svalaꞌ. A qꞌuicꞌan, ma chabꞌej yabꞌ icha tic, tzin cꞌanbꞌej dꞌa vin̈ in mam chiꞌ, tas nabꞌil yuj vin̈. Tato vachꞌ tas snaꞌ vin̈ dꞌa a patic, svalcot abꞌi. 13 Tato chuc spensar vin̈ dꞌa a patic jun, aocabꞌ Jehová ol acꞌan in yaelal tato max val dꞌayach yuj tas ol aj a colan a bꞌa. Axo ticnaic, colvajocabꞌ Jehová edꞌoc icha ix aj scolvaj yedꞌ vin̈ in mam chiꞌ. 14 A ticnaic, tato pitzaninto ol ach ochcan reyal, tzin cꞌan dꞌayach to ol ocꞌ a cꞌool dꞌayin icha yoqꞌuelcꞌolal Jehová dꞌayach, man̈ ol in a milchamlaj. 15 Tato toxo in cham jun, tzin cꞌan dꞌayach to tza nacot vin̈tilal dꞌa masanil tiempo. Ayic ol satjiel ebꞌ ajcꞌol yuj Jehová, mocabꞌ satel in bꞌinaj dꞌa a macbꞌen, xchi vin̈. 16 Icha chiꞌ ix aj sbꞌoancan strato vin̈aj Jonatán chiꞌ yedꞌ vin̈aj David chiꞌ, ol bꞌeyn̈ejbꞌat dꞌa scal yin̈tilal vin̈aj David chiꞌ. Ix yalan vin̈aj Jonatán chiꞌ icha tic:

Aocabꞌ Jehová tzꞌacꞌan a yaelal tato man̈ ol elcꞌoch tas scalcan tic, xchi vin̈. 17 Yujto te xajan vin̈aj David chiꞌ yuj vin̈aj Jonatán chiꞌ, yuj chiꞌ ix yal vin̈ to svachꞌ bꞌoejxican jun strato ebꞌ vin̈ chiꞌ. 18 Ix yalanxi vin̈aj Jonatán chiꞌ:

—Qꞌuicꞌan tzꞌoch qꞌuin̈ yuj yalji qꞌuen uj, scheclaji to malaj ach yujto secan tzꞌajcan bꞌaj tzach em cꞌojan. 19 Palta axo chabꞌej dꞌa yemcꞌualil, sbꞌat a cꞌubꞌejel a bꞌa bꞌaj a cꞌubꞌejnaquel a bꞌa junel. Tza tan̈vej dꞌa slacꞌanil qꞌuen qꞌueen scuch Ezel. 20 Tzin julbꞌat oxeoc in jul-labꞌ taꞌ, ichato ay junoc mach bꞌaj van in julvajbꞌati. 21 Slajvi chiꞌ, svalan dꞌa vin̈ in checabꞌ: Ixic bꞌat icꞌcot in jul-labꞌ chiꞌ, xin cham dꞌa vin̈. Tato sval dꞌa vin̈ icha tic: A dꞌa yichan̈cot tic ay, icꞌcot teꞌ, ta xin chi, tzach cot dꞌa juncꞌolal, malaj tas ol ach icꞌan syal chiꞌ. Toxo ix vacꞌ in tiꞌ dꞌa yichan̈ Jehová to icha chiꞌ ol vutej. 22 Palta tato sval jun: A jun in jul-labꞌ chiꞌ, najatto ay dꞌa ichan̈bꞌat chiꞌ, tato xin chi dꞌa vin̈, tzach bꞌat dꞌa najat a col a bꞌa yujto a Jehová tzach checanbꞌati. 23 A pax dꞌa co tiꞌ ix calcan tic jun, a Jehová testigo tzꞌajcan dꞌay to juneln̈ej scalcani, xchi vin̈ dꞌa vin̈.

24 Ix lajvi chiꞌ, ix scꞌubꞌanel sbꞌa vin̈aj David chiꞌ dꞌa caltac teꞌ. Ayic ix chajiel yich yic tzꞌoch qꞌuin̈ yuj yalji qꞌuen uj, ix em cꞌojan vin̈aj rey Saúl svaꞌi. 25 A dꞌa sat pat ix em cꞌojan vin̈ dꞌa bꞌajtaxon tzꞌem cꞌojan. A dꞌa yichan̈ vin̈ ix em cꞌojan vin̈aj Jonatán, axo dꞌa stzꞌey vin̈ ix em cꞌojan vin̈aj Abner, axo pax xila vin̈aj David, malaj mach ix em cꞌojan dꞌay. 26 A dꞌa bꞌabꞌel cꞌu, malaj tas ix yal vin̈aj Saúl chiꞌ, yujto ix sna vin̈ icha tic: Tecan ay junoc tas man̈ vachꞌoc ix scꞌulej vin̈aj David chiꞌ, maj am yal sbꞌoan sbꞌa vin̈ icha yalan ley dꞌa ayocto, xchi vin̈ dꞌa spensar chiꞌ. 27 Schabꞌilxo cꞌual yajoch qꞌuin̈ chiꞌ, colann̈ej xila vin̈aj David chiꞌ, malaj mach tzꞌem cꞌojan dꞌay. Yuj chiꞌ ix scꞌanbꞌej vin̈aj Saúl dꞌa vin̈aj Jonatán icha tic:

—¿Tas yuj maj javi vin̈ yuninal vin̈aj Isaí chiꞌ vael ticnaic yedꞌ evi? xchi vin̈.

28 Ix tacꞌvi vin̈aj Jonatán chiꞌ:

—A vin̈aj David chiꞌ alan dꞌayin evi, 29 tobꞌ masanil ebꞌ scꞌabꞌ yoc vin̈ snaan qꞌuin̈ yic silabꞌ dꞌa schon̈abꞌ, yuj chiꞌ ix avtajbꞌat vin̈ yuj jun vin̈ yucꞌtac. Yal vin̈ dꞌayin icha tic: Tato vachꞌ in dꞌa a sat, cha in bꞌat vacꞌ tzalajbꞌoc in cꞌool yedꞌ ebꞌ vucꞌtac chiꞌ, xchi vin̈. Yuj chiꞌ max javilaj vin̈ vael dꞌa a mexa tic, xchi vin̈.

30 Ayic ix yabꞌan vin̈ rey icha chiꞌ, ix cot yoval vin̈ dꞌa vin̈aj Jonatán chiꞌ, ix yalan vin̈:

—Mitzꞌ unin ach, bꞌajam sicꞌbꞌil ach. Vojtac to vachꞌ acꞌan yedꞌ vin̈ yuninal vin̈aj Isaí chiꞌ, yic qꞌuixvelal tzach ajcan yedꞌ ix a nun. 31 ¿Tom max nachajel jabꞌoc uuj to yacbꞌan pitzan vin̈ yuninal vin̈aj Isaí chiꞌ, man̈ ol ach och reyal yedꞌ pax ebꞌ in̈tilal? A ticnaic, acꞌbꞌat sayumal vin̈, tzicꞌancot vin̈ dꞌayin, ol in milancham vin̈, xchi vin̈.

32 Ix tacꞌvi vin̈aj Jonatán chiꞌ icha tic:

—¿Tas yuj ol cham vin̈? ¿Tom ay junoc tas chuc ix scꞌulej vin̈, yuj chiꞌ icha chiꞌ tzalaꞌ? xchi vin̈.

33 Ayic ix yabꞌan jun chiꞌ vin̈aj Saúl chiꞌ, ix sjulanbꞌat jun qꞌuen slanza vin̈ dꞌa vin̈aj Jonatán chiꞌ yic smilancham vin̈. Icha chiꞌ ix aj snachajel yuj vin̈aj Jonatán chiꞌ to aꞌ vin̈ smam vin̈ chiꞌ, snibꞌej vin̈ smilcham vin̈aj David chiꞌ. 34 Ix cot yoval vin̈aj Jonatán chiꞌ, ix qꞌue jucnaj vin̈, ix elta vin̈. Majxo valaj vin̈ yedꞌ ebꞌ vin̈ dꞌa schabꞌil cꞌual chiꞌ, yujto ix cus vin̈ yuj vin̈aj David chiꞌ, yujto te chuc tas ix yal vin̈aj Saúl chiꞌ ix yabꞌ vin̈. 35 Dꞌa val sacbꞌinaj dꞌa junxo cꞌu, ix bꞌat vin̈ yil vin̈aj David chiꞌ, icha yaj yalancan ebꞌ vin̈, tzacꞌanoch jun vin̈ quelem unin yuj vin̈. 36 Ix yalan vin̈ dꞌa vin̈ quelem chiꞌ:

—Elan̈chamel ol bꞌat icꞌcot in jul-labꞌ ol in julbꞌat tic, xchi vin̈.

Ix bꞌat vin̈ quelem chiꞌ bꞌian. A val sbꞌat vin̈ chiꞌ, ix julvajbꞌat vin̈aj Jonatán chiꞌ dꞌa yichan̈bꞌat vin̈. 37-38 Ayic ix cꞌoch vin̈ bꞌaj ix em jul-labꞌ chiꞌ, te chaan̈ ix avaj vin̈aj Jonatán chiꞌ icha tic:

—Yel a cꞌool, man̈ ach och vaan, ato dꞌa ichan̈bꞌat ix cꞌochi, xchi vin̈.

Ix lajvi chiꞌ ix yalanxi vin̈:

—Yelcꞌolal a bꞌati, man̈ ach och vaan, xchi vin̈.

Ix sicꞌanqꞌue jul-labꞌ chiꞌ vin̈ quelem chiꞌ, ix yicꞌancot vin̈. 39 Palta maj nachajel-laj jabꞌoc yuj vin̈ tas ix scꞌulej vin̈aj Jonatán chiꞌ, an̈ej vin̈ ojtannac yedꞌ vin̈aj David tas yaj jun slolonel chiꞌ. 40 Ix lajvi chiꞌ, ix yacꞌan sjul-labꞌ vin̈aj Jonatán chiꞌ dꞌa vin̈ quelem chiꞌ, ix schecan meltzaj vin̈ vin̈ dꞌa chon̈abꞌ.

41 Ixn̈ej bꞌatcan vin̈ quelem chiꞌ, ix elcancot vin̈aj David dꞌa spatic qꞌuen qꞌueen. Ixn̈ej elta vin̈ chiꞌ, oxel ix em n̈ojan vin̈ dꞌa yichan̈ vin̈aj Jonatán chiꞌ. Ix lajvi chiꞌ ix stzꞌubꞌlanelta stiꞌ ebꞌ vin̈, ix ocꞌ ebꞌ vin̈ schavan̈il, ix sicꞌsicꞌan val vin̈aj David chiꞌ yoqꞌui. 42 Ix lajvi chiꞌ, ix yalan vin̈aj Jonatán chiꞌ dꞌa vin̈:

—Ixic, juncꞌolal a bꞌati yujto a co tiꞌ ix cacꞌ co chavan̈il, dꞌa yichan̈ Jehová ix calaꞌ. Ix co cꞌan dꞌa Jehová chiꞌ to ayn̈ejocabꞌoch quedꞌoc co chavan̈il yedꞌ ebꞌ quin̈tilal yic tzꞌelcancꞌoch bꞌaj ix cacꞌ co tiꞌ, yic vachꞌn̈ej pax cacꞌani yedꞌ ebꞌ quin̈tilal, xchi vin̈.

Ix lajvi chiꞌ, ix bꞌatcan vin̈aj David chiꞌ, axo vin̈aj Jonatán chiꞌ ix meltzajcancot vin̈ dꞌa chon̈abꞌ.