—Van snaan vin̈ in mam ach smilchamoc. Yuj chiꞌ te lista tzutej a bꞌa qꞌuicꞌan, tza cꞌubꞌejel a bꞌa dꞌa junoc bꞌaj te cꞌubꞌeltac. 3 Yujto a qꞌuicꞌan chiꞌ, tzin bꞌat yedꞌ vin̈ in mam chiꞌ dꞌa slacꞌanil bꞌaj ayach ecꞌ chiꞌ, svalan dꞌa vin̈ uuj, tzaxo val dꞌayach tas tzꞌaj yalan vin̈, xchi vin̈.

4 Ix yalan vin̈aj Jonatán dꞌa vin̈ smam chiꞌ yuj tastac vachꞌ scꞌulej vin̈aj David chiꞌ icha tic:

—Mamin, man̈ vachꞌoc tato tzach och ajcꞌolal dꞌa vin̈aj David a checabꞌ, yujto malaj bꞌaj tzꞌoch smul vin̈ dꞌayach, yujto nivan tas vachꞌ ix icꞌ dꞌa spatic vin̈. 5 Ix ilaꞌ to ix sbꞌec sbꞌa vin̈ schami ayic ix smilancham vin̈ filisteo vin̈, icha chiꞌ ix aj scolchaj co chon̈abꞌ tic yuj Jehová. A jun chiꞌ ix il val. Ix ach te tzalaji. ¿Tas yuj tza naꞌ a milcham vin̈, ina to malaj jabꞌoc smul vin̈ dꞌayach? xchi vin̈.

6 Ix scha yabꞌ vin̈aj Saúl chiꞌ tas ix yal vin̈aj Jonatán chiꞌ, ix yalan vin̈:

—Tic svacꞌ can in tiꞌ dꞌa yichan̈ Jehová to man̈ ol in milcham vin̈, xchi vin̈.

7 Ix lajvi chiꞌ ix avtaj vin̈aj David chiꞌ yuj vin̈aj Jonatán chiꞌ, ix yalan vin̈ tas ix aj yalan vin̈ smam chiꞌ dꞌay. Ix yicꞌanbꞌat vin̈aj David chiꞌ vin̈ dꞌa yichan̈ vin̈ smam chiꞌ, ix ochxi vin̈ dꞌa yopisio dꞌa stzꞌey vin̈aj Saúl chiꞌ.

8 Ix lajvi chiꞌ, ix ochxi oval junelxo yedꞌ ebꞌ filisteo, ix elixta vin̈aj David chiꞌ yacꞌ oval yedꞌ ebꞌ, te nivan ebꞌ ix smilcham vin̈, yuj chiꞌ ix el lemnaj ebꞌ dꞌa vin̈. 9 Axo pax vin̈aj Saúl chiꞌ, ix ochxi jun espíritu chuc dꞌa vin̈ yuj Jehová. Cꞌojanem vin̈ dꞌa yol spat, yedꞌnacqꞌue qꞌuen slanza vin̈, axo vin̈aj David chiꞌ van schalan teꞌ arpa vin̈ dꞌa yichan̈ vin̈ rey chiꞌ. 10 Ix yicꞌanchaan̈ qꞌuen slanza vin̈ rey chiꞌ, ix sjulanoch qꞌuen vin̈ dꞌa vin̈aj David yic tzꞌochcan chꞌapan vin̈ dꞌa sat pat chiꞌ yuj qꞌuen yalani, palta ix scol sbꞌa vin̈aj David chiꞌ, yuj chiꞌ ix bꞌatcan chꞌapan qꞌuen lanza chiꞌ dꞌa sat pat chiꞌ. Ix el lemnaj vin̈aj David dꞌa jun acꞌval chiꞌ, ix bꞌat vin̈ dꞌa spat. 11 A dꞌa jun acꞌval chiꞌ, ix yal vin̈aj Saúl chiꞌ to sbꞌat och stan̈vumal vin̈aj David chiꞌ dꞌa spat, yic vachꞌ axo dꞌa junxo qꞌuin̈ibꞌalil, bꞌat miljoccham vin̈. Axo ix Mical yetbꞌeyum vin̈ ix alan dꞌay:

—Tato man̈ ol a col a bꞌa dꞌa jun acꞌval tic, qꞌuicꞌan chamnac achxo, xchi ix.

12 Ix lajvi chiꞌ, ix yacꞌanelta jun chꞌan̈ lasu ix dꞌa jun ventena, ataꞌ ix emta vin̈aj David chiꞌ yic scolan sbꞌa. 13 Ix yicꞌancot jun sdiosal ix, ix yacꞌanecꞌ jichan ix dꞌa sat schꞌat vin̈aj David chiꞌ. Ix yacꞌanoch juntzan̈ xil nocꞌ chiva ix jalbꞌil dꞌa sjolom jun sdiosal chiꞌ, ix yacꞌanbꞌat jun sábana ix dꞌa yibꞌan̈. 14 Ayic ix yacꞌanbꞌat ebꞌ schecabꞌ vin̈aj Saúl bꞌat syam vin̈aj David chiꞌ, ix yalan ix Mical to penaay vin̈. 15 Ix schecanxibꞌat ebꞌ schecabꞌ vin̈aj Saúl chiꞌ, ix yalan vin̈:

—Iqꞌueccot vin̈ dꞌa sat schꞌat chiꞌ dꞌa tic, a in ol in milcham vin̈, xchi vin̈.

16 Ix och ebꞌ dꞌa yol spat vin̈aj David chiꞌ yic syilan ebꞌ, ticni an̈ej jun yechel jichanecꞌ dꞌa sat chꞌat chiꞌ, ayoch jun xil chiva scꞌan̈ jolomoc. Ix bꞌat yalan ebꞌ dꞌa vin̈aj Saúl chiꞌ. 17 Ix yalan vin̈aj Saúl chiꞌ dꞌa ix Mical chiꞌ:

—¿Tas yuj tzin ixtej, tza colanel jun vin̈ vajcꞌol chiꞌ? xchi vin̈. Ix tacꞌvi ix:

—Yujto ix yal vin̈ dꞌayin: Ol ach in milchamoc tato max in a chaeli, xchi vin̈, xchi ix.

18 Icha chiꞌ ix aj scolchaj vin̈aj David chiꞌ. Ix bꞌat scolan sbꞌa vin̈ bꞌaj ay vin̈aj Samuel dꞌa Ramá. Ix yalan vin̈ dꞌa vin̈ tas ix utaj yuj vin̈aj Saúl chiꞌ. Ix lajvi chiꞌ ix bꞌat vin̈aj Samuel chiꞌ yedꞌ vin̈ dꞌa Naiot yic bꞌat cajnaj ebꞌ vin̈ taꞌ. 19 Ayic ix yabꞌan vin̈aj Saúl chiꞌ to a dꞌa Naiot dꞌa yol yic Ramá ayecꞌ vin̈aj David chiꞌ, 20 ix yacꞌanbꞌat schecabꞌ vin̈ yic bꞌat icꞌjoccot vin̈. Ayic ix cꞌoch ebꞌ checabꞌ chiꞌ, ix yilan juntzan̈ ebꞌ schecabꞌ Jehová ebꞌ, van sbꞌitan ebꞌ yuj Yespíritu Dios, axo vin̈aj Samuel chiꞌ scuchbꞌan ebꞌ. A dꞌa jun rato chiꞌ, ix och Yespíritu Dios dꞌa ebꞌ schecabꞌ vin̈aj Saúl chiꞌ, ix och ebꞌ dꞌa scal ebꞌ, ix bꞌitan ebꞌ.

21 Ayic ix yabꞌan jun chiꞌ vin̈aj Saúl chiꞌ, ix yacꞌanbꞌat junxo macan̈ ebꞌ schecabꞌ vin̈. An̈ejaꞌ ix ochpax ebꞌ dꞌa scal ebꞌ van sbꞌitan chiꞌ. 22 Yuj chiꞌ, a val vin̈aj Saúl chiꞌ ix bꞌat ilanoc, axo yic ix cꞌoch vin̈ dꞌa jun nivan ucꞌbꞌilaꞌ ay dꞌa Secú, ix scꞌanbꞌan vin̈ bꞌajtil ayecꞌ vin̈aj Samuel yedꞌ vin̈aj David. Ay mach ix alan dꞌa vin̈ to ato dꞌa Naiot dꞌa yol yic Ramá ayecꞌ ebꞌ vin̈. 23 Yuj chiꞌ ix bꞌat vin̈ taꞌ. Elan̈chamel ix ochpax Yespíritu Dios dꞌa vin̈, yacbꞌan van sbꞌey vin̈, ix och ijan vin̈ sbꞌitani masanto ix cꞌoch vin̈ dꞌa Naiot chiꞌ. 24 Ix yicꞌanel spichul vin̈ yic sreyal, comon animaxon̈ej ix yutej sbꞌa vin̈ dꞌa yichan̈ vin̈aj Samuel chiꞌ ayic ix bꞌitan vin̈ chiꞌ. Ichaxon̈ej chiꞌ ix yutej sbꞌa vin̈ ix ecꞌ cꞌu yedꞌ ix ecꞌ acꞌval. A yuj jun chiꞌ ix elta jun lolonel tzꞌalji: Ipan pax vin̈aj Saúl ayoch dꞌa scal ebꞌ schecabꞌ Dios, xchi.