Ix yamigoej sbꞌa vin̈aj David yedꞌ vin̈aj Jonatán
18
Ayic ix lajvi slolon vin̈aj David yedꞌ vin̈aj Saúl chiꞌ, axo vin̈aj Jonatán yuninal vin̈aj Saúl chiꞌ, te vachꞌ ix yil vin̈aj David chiꞌ vin̈ icha val syutej syailan sbꞌa. 2 An̈ejaꞌ vin̈aj Saúl chiꞌ, a dꞌa jun cꞌu chiꞌ, ix yacꞌcanoch yopisio vin̈aj David chiꞌ vin̈, majxo yacꞌlaj meltzaj vin̈ vin̈ dꞌa spat smam. 3 Ix yacꞌ stiꞌ vin̈aj Jonatán dꞌa vin̈aj David chiꞌ to vachꞌ ol yil-laj sbꞌa ebꞌ vin̈ dꞌa masanil tiempo, yujto te xajan vin̈aj David chiꞌ yuj vin̈. 4 Ix yicꞌanpaxel masanil spichul vin̈aj Jonatán yic oval ayoch yuuj, ix yacꞌan vin̈ dꞌa vin̈aj David chiꞌ yedꞌ qꞌuen yespada, jul-labꞌ yedꞌ cincho ayoch dꞌa snan̈al vin̈.5 Masanil bꞌaj ix checji vin̈aj David yuj vin̈aj Saúl chiꞌ dꞌa oval, te vachꞌn̈ej ix elcꞌoch vin̈, yuj chiꞌ ix acꞌjioch vin̈ yajalil dꞌa jun macan̈ ebꞌ soldado. Yuj chiꞌ ix te tzalaj ebꞌ soldado yedꞌ ebꞌ ayoch yopisio yuj vin̈aj Saúl chiꞌ.
Ix chichon scꞌol vin̈aj Saúl dꞌa vin̈aj David
6 Ayic ix jax ebꞌ soldado smasanil dꞌa oval, ayic toxo ix chamcan vin̈ filisteo yuj vin̈aj David chiꞌ, ix laj elta ebꞌ ix ix dꞌa junjun chon̈abꞌ yic schaan ebꞌ ix sjavi vin̈aj rey Saúl chiꞌ. Sqꞌue chennaj ebꞌ ix tzꞌelta ebꞌ ix, stzin̈an qꞌuen spandereta ebꞌ ix yedꞌ qꞌuen splatillo. 7 Van sbꞌitan ebꞌ ix tzꞌelta ebꞌ ix, syalan ebꞌ ix icha tic:
Smilal ebꞌ ajcꞌool ix smilcham vin̈aj Saúl.
Lajlajun̈ miltac ix smilcham vin̈aj David, xchi ebꞌ ix.
8 A jun chiꞌ, te ya ix och ix yabꞌ vin̈aj Saúl chiꞌ, yuj chiꞌ ix chichonqꞌue scꞌool vin̈, ix yalan vin̈:
—Ste icꞌjivalchaan̈ vin̈aj David dꞌa vichan̈, yuj chiꞌ syal ebꞌ ix ix tic to lajlajun̈ miltac ix smilcham vin̈, a inxo tic jayen̈ej mil ix in milchamoc. Jabꞌxon̈ej val yoch vin̈ tic reyal in qꞌuexuloc, xchi spensar vin̈ chiꞌ.
9 Atax taꞌ ix ochcan chiꞌan scꞌol vin̈ dꞌa vin̈aj David chiꞌ.
10 Axo dꞌa junxo cꞌu, ix och jun espíritu chuc yuj Jehová dꞌa vin̈aj Saúl chiꞌ, ix och locoax vin̈ dꞌa sdespacho, ix och ijan vin̈aj David schalan teꞌ arpa, ichataxon scꞌulej, yedꞌqꞌue jun qꞌuen lanza vin̈aj Saúl chiꞌ. 11 Ix cot val numnaj dꞌa sjolom vin̈ ix yilaꞌ, ix sjulanoch qꞌuen slanza vin̈ chiꞌ dꞌa vin̈aj David chiꞌ, yic tzꞌochcan chꞌapnaj vin̈ yedꞌ qꞌuen dꞌa sat pat chiꞌ snaan vin̈, palta chael ix scol sbꞌa vin̈aj David chiꞌ.
12 Ix xivqꞌue vin̈aj Saúl dꞌa vin̈aj David chiꞌ, yujto a Jehová ayoch yedꞌ vin̈aj David chiꞌ, axo pax yedꞌ vin̈ jun, man̈xo ayoc ochlaj Jehová chiꞌ. 13 Yuj chiꞌ, man̈xooc dꞌa spat vin̈ chiꞌ ix munlaj vin̈aj David chiꞌ, palta to ix yiqꞌuel vin̈ vin̈ dꞌa stzꞌey. Ix yacꞌanoch vin̈ vin̈ yajalil dꞌa jun mil ebꞌ soldado, aton vin̈ edꞌjinac ebꞌ ayic ix xidꞌecꞌ ebꞌ dꞌa oval. 14 Yaln̈ej bꞌaj ix ecꞌ vin̈aj David chiꞌ, vachꞌn̈ej tzꞌaj yelcꞌochi, yujto a Jehová ayoch yedꞌ vin̈. 15 Yuj chiꞌ ix te vachꞌ xiv vin̈aj Saúl chiꞌ dꞌa vin̈. 16 Masanil ebꞌ israel yedꞌ ebꞌ aj Judá, te xajan vin̈aj David chiꞌ yuj ebꞌ. Ste tzalaj ebꞌ yedꞌ vin̈ yujto a vin̈ scuchbꞌan ebꞌ dꞌa oval.
17 Ix lajvi chiꞌ, ix yalan vin̈aj Saúl dꞌa vin̈aj David chiꞌ:
—Svacꞌ ix bꞌabꞌel visil scuchan Merab etbꞌeyumoc, an̈ej to jelann̈ej tzutej a bꞌa dꞌa oval, tzacꞌan oval cuj a on̈ schon̈abꞌ on̈ Jehová tic, xchi vin̈.
Ix sna vin̈aj Saúl icha chiꞌ yujto malaj sgana vin̈ yoch smul smilan vin̈aj David chiꞌ, vachꞌ ama tato a ebꞌ filisteo smilan vin̈ snaan vin̈.
18 Ix tacꞌvi vin̈aj David chiꞌ:
—Mamin rey, malaj jabꞌoc velcꞌochi, man̈ nivanoclaj yelcꞌoch in mam yedꞌ ebꞌ in cꞌabꞌ voc dꞌa scal ebꞌ quetisraelal yic tzin och a n̈iꞌoc, xchi vin̈.
19 Axo yic ix cꞌoch stiempoal yacꞌan ix yisil vin̈aj Saúl chiꞌ yetbꞌeyumoc vin̈, aton ix Merab, axo dꞌa vin̈aj Adriel aj Mehola ix yacꞌ ix vin̈. 20 Axo junxo ix yisil vin̈ scuchan Mical, te ay sgana ix dꞌa vin̈aj David chiꞌ. Ayic ix yabꞌan vin̈aj Saúl chiꞌ icha chiꞌ, te vachꞌ ix yabꞌ vin̈. 21 Yuj chiꞌ ix snaan vin̈ to ol yacꞌ junxo ix yisil vin̈ chiꞌ yetbꞌeyumoc vin̈aj David chiꞌ, yic vachꞌ yuj ix ol miljoccham vin̈aj David chiꞌ yuj ebꞌ filisteo. Ix yalan vin̈aj Saúl dꞌa vin̈aj David dꞌa schaelal:
—A ticnaic, val yel ol ach och in n̈iꞌoc, xchi vin̈.
22 Ix stzꞌacan yal vin̈ dꞌa ebꞌ vin̈ ayoch dꞌa yopisio yuuj:
—Tzex lolon yedꞌ vin̈aj David e chꞌocoj, tzeyalan dꞌa vin̈ icha tic: A vin̈ rey, tzach ste xajanej vin̈, tzach co xajanejpax a on̈ tic. Yuj chiꞌ ach ochocabꞌ sn̈iꞌoc vin̈ rey chiꞌ, xe chi dꞌa vin̈, xchi vin̈aj Saúl chiꞌ.
23 Ix bꞌat ebꞌ vin̈ ay yopisio chiꞌ yal juntzan̈ chiꞌ dꞌa vin̈aj David chiꞌ, ix tacꞌvi vin̈ dꞌa ebꞌ icha tic:
—Am e naani to secojtac voch sn̈iꞌoc vin̈ rey chiꞌ, ina to mebꞌaꞌ in, malaj jabꞌoc velcꞌochi, xchi vin̈.
24 Ix lajvi chiꞌ, ix bꞌat ebꞌ schecabꞌ vin̈aj Saúl chiꞌ yal dꞌay, tas ix aj yalan vin̈aj David chiꞌ. 25 Ix yalanxi vin̈aj Saúl chiꞌ dꞌa ebꞌ ay yopisio chiꞌ:
—Alec dꞌa vin̈, max stuplaj ix visil tic vin̈ icha sbꞌeybꞌal ebꞌ anima, an̈ej syicꞌcot 100-oc sjolom svinaquil ebꞌ vin̈ filisteo vin̈ dꞌayin. Icha chiꞌ tzꞌaj in pacan in bꞌa dꞌa ebꞌ vajcꞌol chiꞌ, xe chi dꞌa vin̈, xchi vin̈ rey chiꞌ. Icha chiꞌ ix yutej vin̈ rey chiꞌ yalani yic smiljicham vin̈aj David chiꞌ yuj ebꞌ filisteo chiꞌ.
26 Ix bꞌatxi ebꞌ ay yopisio chiꞌ yal dꞌa vin̈aj David chiꞌ. Ix schaan scꞌol vin̈ yoch sn̈iꞌoc vin̈ rey chiꞌ. Ayic manto cꞌochlaj scꞌual, 27 ix bꞌat vin̈aj David chiꞌ yedꞌ ebꞌ soldado, ix smilancham 200 ebꞌ vin̈ filisteo vin̈. Tzꞌacan ix yicꞌcot sjolom svinaquil ebꞌ vin̈ vin̈ dꞌa vin̈aj Saúl chiꞌ yic tzꞌochcan vin̈ sn̈iꞌoc vin̈. Ix lajvi chiꞌ, ix yacꞌan ix Mical yisil vin̈aj Saúl chiꞌ yetbꞌeyumoc vin̈.
28 Ix nachajel yuj vin̈aj Saúl chiꞌ, ix yilan vin̈ to a Jehová ayoch yedꞌ vin̈aj David chiꞌ, ix yilanpax vin̈ to te xajan vin̈ yuj ix Mical chiꞌ, 29 yuj chiꞌ ix te vachꞌ xivqꞌue vin̈ dꞌa vin̈, ix te vachꞌ och vin̈ ajcꞌolal dꞌa vin̈. 30 A ebꞌ filisteo ix te ochn̈ej ebꞌ yacꞌ oval yedꞌ ebꞌ israel, palta a vin̈aj David chiꞌ, te jelan vin̈ dꞌa oval dꞌa yichan̈ juntzan̈xo ebꞌ yetyajalil soldado vin̈aj Saúl dꞌa juntac el, yuj chiꞌ ix te bꞌinaj vin̈.