—Ayic ix elcꞌajel qꞌuen mil cien siclo plata dꞌayach, ix a catabꞌej jun elcꞌum chiꞌ. Ix vabꞌ alan juntzan̈ chiꞌ. Palta a dꞌayin ayecꞌ qꞌueen, a in ix velqꞌuej qꞌuen dꞌayach, xchi vin̈ dꞌa ix snun chiꞌ.

Ix yalan ix snun vin̈ chiꞌ dꞌay:

—Yacꞌocabꞌ svachꞌcꞌolal Jehová dꞌa ibꞌan̈ ach vuneꞌ, xchi ix.

3 Ayic ix yacꞌanxi qꞌuen vin̈ dꞌa ix snun chiꞌ, ix yalan ix:

—Ach vuneꞌ, a ticnaic a qꞌuen tumin tic, svacꞌ qꞌuen dꞌa Jehová, yic sbꞌoji junoc comon dios tzeybꞌil yedꞌ junoc sbꞌoji dꞌa yol molde, yuj chiꞌ a in svacꞌxi qꞌuen dꞌayach, xchi ix.

4 Palta ix yacꞌanxi qꞌuen plata chiꞌ vin̈ dꞌa ix snun chiꞌ. Ix yacꞌan 200 siclo qꞌuen ix dꞌa jun vin̈ bꞌoum plata chiꞌ, yic sbꞌoji juntzan̈ ix yal ix chiꞌ. Ix lajvi chiꞌ, ix yacꞌanoch ix dꞌa yol spat vin̈aj Micaía chiꞌ.

5 A spat vin̈aj Micaía chiꞌ, spatiltaxon comon dios. Bꞌobꞌilxo jun chaleca yic sacerdote yedꞌ juntzan̈xo yechel yuj vin̈. Axo jun vin̈ yuninal vin̈ yacꞌnacxooch sacerdoteal. 6 A dꞌa jun tiempoal chiꞌ, malaj sreyal ebꞌ israel, yuj chiꞌ junjun ebꞌ sbꞌoan icha tas snibꞌej.

7 A dꞌa chon̈abꞌ Belén dꞌa yol yic Judá, cajan jun vin̈ quelem levita. 8 Ix el vin̈ dꞌa yol yic Belén chiꞌ, ix bꞌat vin̈ say bꞌaj bꞌat cajnajoc. Ix ecꞌn̈ej vin̈ dꞌa tzalquixtac dꞌa yol yic Efraín, ix cꞌoch vin̈ dꞌa spat vin̈aj Micaía chiꞌ.

9 —¿Bꞌajtil cajan ach? xchi vin̈aj Micaía chiꞌ dꞌa vin̈. Ix yalan vin̈:

—A dꞌa Belén dꞌa yol yic Judá ix in coti. A in tic levita in, van in sayanecꞌ bꞌaj ol in cajnajoc, xchi vin̈.

10 —Tato icha chiꞌ, canan̈ vedꞌ dꞌa in pat tic, yic vachꞌ tzach och in sacerdoteoc, icha val in mam ol ach ajoc. Ol vacꞌ lajun̈eoc siclo plata a tojoloc dꞌa junjun abꞌil. Ol vacꞌanpax a pichul yedꞌ a vael, xchi vin̈aj Micaía chiꞌ dꞌa vin̈.

11 Ix schaan scꞌol vin̈ scan cajan yedꞌ vin̈aj Micaía chiꞌ, icha val yuninal vin̈ ix yutej vin̈. 12 Ix yacꞌanoch jun vin̈ levita chiꞌ vin̈ sacerdoteoc, icha chiꞌ ix aj scajnajcan vin̈ yedꞌ vin̈. 13 Ix snaan vin̈aj Micaía chiꞌ to ol schaꞌ svachꞌcꞌolal Jehová vin̈, yujto a jun vin̈ levita ayoch sacerdoteoc vin̈.