Ix xidꞌecꞌ vin̈aj Sansón dꞌa Gaza
16
Ay jun cꞌual, ix xidꞌecꞌ vin̈aj Sansón dꞌa Gaza. Ataꞌ ix yil jun ix ajmul ix vin̈, ix och vin̈ dꞌa yol spat ix, ix vaycan vin̈ yedꞌ ix dꞌa jun acꞌval chiꞌ. 2 Ayic ix yabꞌan ebꞌ aj Gaza chiꞌ to ataꞌ ayecꞌ vin̈, ix yoyan sbꞌa ebꞌ dꞌa spatictac pat chiꞌ, ix stan̈van spuertail chon̈abꞌ ebꞌ dꞌa jun acꞌval chiꞌ. Numan yaj ebꞌ, ix smaclan ebꞌ yecꞌ acꞌval chiꞌ. Ix snaan ebꞌ to a dꞌa qꞌuin̈ibꞌalil dꞌa junxo cꞌu ol smilcham vin̈ ebꞌ. 3 Palta axo vin̈aj Sansón chiꞌ, ix stan̈vej vin̈ yoch chimilacꞌval, ix qꞌue vaan vin̈. Ix bꞌat vin̈ dꞌa spuertail chon̈abꞌ chiꞌ, ix schocanelta jun nivan puerta chiꞌ vin̈ yedꞌ smarcoal. Ix sjolom jen̈jabꞌan vin̈, ix bꞌat yacꞌancan vin̈ dꞌa jolom vitz dꞌa yichan̈ Hebrón.A vin̈aj Sansón yedꞌ ix Dalila
4 Ix lajvi chiꞌ, ix ochpax spensar vin̈ dꞌa jun ix scuchan Dalila cajan dꞌa jun chꞌolan scuch Sorec. 5 Yuj chiꞌ, ix bꞌat lolon ebꞌ vin̈ yajalil ebꞌ filisteo yedꞌ ix Dalila chiꞌ, ix yalan ebꞌ vin̈ dꞌa ix icha tic:
—Tza montej val vin̈aj Sansón chiꞌ, tza cꞌanbꞌan dꞌa vin̈ bꞌajtil scot jantac yip vin̈ chiꞌ, tas val scutej cacꞌan ganar vin̈ co tzecꞌani, yic vachꞌ maxtzac yal-laj scolan sbꞌa vin̈. Junjun on̈ ol cacꞌ mil 100 siclo qꞌuen plata dꞌayach a tojoloc, xchi ebꞌ vin̈ dꞌa ix.
6 Ix yalan ix dꞌa vin̈aj Sansón chiꞌ icha tic:
—Tzin tevi dꞌayach, to tzal dꞌayin bꞌajtil scot jantac ip tic, ¿ay am val tas tzꞌaj a tzecꞌji yic maxtzac yal-laj a colan a bꞌa? xchi ix dꞌa vin̈.
7 Ix tacꞌvi vin̈ dꞌa ix icha tic:
—Tato tzin tzecꞌchaj dꞌa uqueoc chꞌan̈ chꞌan̈ manto juneloc scꞌanchaji, tzꞌel vip tic, icha yip junoc comon anima tzin ajcani, xchi vin̈ dꞌa ix.
8 Yuj chiꞌ, a ebꞌ yajalil ebꞌ filisteo chiꞌ ix icꞌanbꞌat uqueꞌ chꞌan̈ chꞌan̈ chiꞌ dꞌa ix Dalila chiꞌ, ix stzecꞌan vin̈aj Sansón chiꞌ ix. 9 Ay juntzan̈ ebꞌ vin̈ toxo ix scꞌubꞌejel sbꞌa dꞌa yol spat ix chiꞌ, yuj chiꞌ te chaan̈ ix el yav ix:
—Sansón, sjavi ebꞌ vin̈ filisteo ach smilchamoc, xchi ix.
Dꞌa val jun rato chiꞌ, ix sdꞌin̈chitanbꞌat juntzan̈ chꞌan̈ chꞌan̈ chiꞌ vin̈. Icha scꞌunal sdꞌin̈chaj junoc an̈ chꞌal tzꞌaeltac, icha chiꞌ ix yutej chꞌan̈ vin̈. Axo ebꞌ filisteo chiꞌ maj nachajel-laj yuj ebꞌ bꞌajtil scot yip vin̈ chiꞌ. 10 Ix yalanxi ix dꞌa vin̈:
—Te chuc ach, ix a musej val in sat. Ix esej dꞌayin. A ticnaic tzin tevi dꞌayach to tzal dꞌayin tas val tzꞌaj a tzecꞌchaji, xchi ix.
11 Ix tacꞌvi vin̈ icha tic:
—Tato tzatz tzin utej a tzecꞌan yedꞌ chꞌan̈ lasu manta bꞌaj scꞌanchaji, tzꞌel vip, icha yip junoc comon anima tzin ajcani, xchi vin̈ dꞌa ix.
12 Yuj chiꞌ, ix say juntzan̈ chꞌan̈ lasu chiꞌ ix, ix stzecꞌan vin̈ ix dꞌa chꞌan̈. Ix elxi yav ix:
—Sansón, sjavi ebꞌ vin̈ filisteo ach smilchamoc, xchi ix.
An̈ejaꞌ dꞌa junelxo chiꞌ ayxo ebꞌ vin̈ ix scꞌubꞌejel sbꞌa dꞌa yol scuarto ix. Icha val tzꞌaj sdꞌin̈chaj an̈ chꞌal, icha chiꞌ ix yutej chꞌan̈ lasu chiꞌ vin̈. 13 Ix yalanxi ix dꞌa vin̈ icha tic:
—Ichan̈ej tic in ixtani. Tzesejn̈ej dꞌayin. Al val dꞌayin tas val tzꞌaj ach co tzecꞌani, xchi ix.
Ix tacꞌvi vin̈ dꞌa ix:
—Tato uqueꞌ tzutej a pachꞌuchꞌan xil in jolom jucan tic yedꞌ an̈ chꞌal, tzatz tzutejcanoch dꞌa teꞌ jal-labꞌ, tato icha chiꞌ, tzꞌelcan vip, icha val yip junoc comon anima tzin ajcani, xchi vin̈ dꞌa ix.
Ix bꞌoji vay vin̈ yuj ix. Ayic toxo ix vay vin̈ chiꞌ, ix sjalancanoch xil sjolom vin̈ chiꞌ ix yedꞌ an̈ chꞌal dꞌa teꞌ jal-labꞌ chiꞌ. 14 Ix stzatzbꞌitanem teꞌ jal-labꞌ chiꞌ ix, ix avaj ix:
—Sansón, sjavi ebꞌ vin̈ filisteo ach smilchamoc, xchi ix. Ix qꞌue jucnaj vin̈, ix stocꞌanqꞌueta te jal-labꞌ chiꞌ vin̈ yedꞌ an̈ chꞌal chiꞌ. 15 Yuj chiꞌ ix yalan ix dꞌa vin̈ icha tic:
—A ach tic, te esalvum ach. ¿Tas yuj tzalaꞌ to tzin a xajanej? Yoxelalxo in ixtan tic. Man̈ jabꞌoc tzal dꞌayin bꞌajtil scot jantac ip tic, xchi ix.
16 Junjun cꞌu ayn̈ejoch ijan ix scꞌanbꞌan dꞌa vin̈ bꞌajtil scot yip vin̈ chiꞌ, yuj chiꞌ ix tzactzajqꞌue vin̈ yedꞌ ix. 17 Yuj chiꞌ ix yalelta vin̈, bꞌajtil scot yip vin̈ chiꞌ, ix yalan vin̈:
—Manto juneloc sjoxjiel xil in jolom yictax in alji, yujto ayic manto in alji chiꞌ, ix in sicꞌjicanel yuj Dios yic tzin och nazareoal, syalelcꞌochi to yictaxon Dios vaji. Yuj chiꞌ tato ay mach sjoxanel xil in jolom tic, tzꞌelcan vip chiꞌ, icha junoc comon anima tzin ajcani, xchi vin̈.
18 Ix nachajel yuj ix to a ticnaic yel syal vin̈. Ix yalanbꞌat ix dꞌa ebꞌ vin̈ yajalil ebꞌ filisteo chiꞌ icha tic:
—A ticnaic, cotan̈ec dꞌa val junelxo tic, toxo ix yalelta vin̈ tas yuj te ay yip vin̈ chiꞌ, xchi ix.
Yuj chiꞌ ix cꞌoch ebꞌ vin̈ yil ix, yedꞌnac qꞌuen tumin ebꞌ vin̈.
19 Ix yacꞌan vay vin̈aj Sansón chiꞌ ix dꞌa sat xubꞌ, ix yavtan jun vin̈ joxvajum ix. Axo jun vin̈ chiꞌ ix joxanel uqueꞌ macan̈ xil sjolom vin̈ pachꞌuchꞌabꞌil chiꞌ. Icha chiꞌ ix aj yel yip vin̈ yuj ix, majxo yal scolan sbꞌa vin̈. 20 Ix avaj ix icha tic:
—Sansón, sjavi ebꞌ vin̈ filisteo ach smilchamoc, xchi ix.
Ix el svayan̈ vin̈, am snaan vin̈ to olto yal scolan sbꞌa vin̈ ichataxon dꞌa juntac el. Man̈ yojtacoc vin̈ tato toxo ix actajcan vin̈ yuj Jehová. 21 Ix lajvi chiꞌ, ix ja ebꞌ vin̈ filisteo, ix stzecꞌan vin̈ ebꞌ vin̈, ix yicꞌanqꞌueta yol sat vin̈ ebꞌ vin̈, ix yicꞌanbꞌat vin̈ ebꞌ vin̈ dꞌa chon̈abꞌ Gaza. Ataꞌ ix yacꞌoch qꞌuen cadena nabꞌa bronce ebꞌ vin̈ dꞌa vin̈. Ix yacꞌanoch vin̈ ebꞌ vin̈ dꞌa preso. Ix yacꞌanoch vin̈ ebꞌ vin̈ munlajel dꞌa qꞌuen jaxum trigo dꞌa yol preso chiꞌ. 22 Palta axo xil sjolom vin̈, ix syamxioch sqꞌuibꞌi.
A schamel vin̈aj Sansón
23 Ix smolbꞌan sbꞌa ebꞌ yajalil ebꞌ filisteo dꞌa tzalajcꞌolal, yujto ix yamchaj vin̈aj Sansón yuj ebꞌ, ix yacꞌan silabꞌ ebꞌ dꞌa scomon diosal scuch Dagón, ix och ijan ebꞌ sbꞌitan icha tic:
A co diosal tic ix acꞌanoch vin̈aj Sansón dꞌa yol co cꞌabꞌ. Aton jun vin̈ cajcꞌool, xchi ebꞌ.
24 An̈ejaꞌ pax ebꞌ anima, ayic ix yilanoch vin̈aj Sansón chiꞌ ebꞌ, ix sbꞌitan sdiosal ebꞌ icha tic:
A co diosal ix acꞌanoch jun vin̈ cajcꞌol dꞌa yol co cꞌabꞌ,
a vin̈ n̈usannactzꞌa cavbꞌen.
Tzijtum ebꞌ quetchon̈abꞌ smacꞌnaccham vin̈, xchi ebꞌ.
25 Ix te tzalaj ebꞌ anima chiꞌ, ix scꞌanancot vin̈aj Sansón chiꞌ ebꞌ yic smatzꞌan vin̈ ebꞌ. Ix yicꞌanelta vin̈ ebꞌ dꞌa yol preso, ix yacꞌanoch vin̈ ebꞌ dꞌa scal snan̈al yoyal stemplo ebꞌ, yic syixtan vin̈ ebꞌ. 26 Ix yalan vin̈ dꞌa jun vin̈ quelem unin edꞌjinac:
—Iqꞌuinbꞌat dꞌa yoyal snan̈al yol templo tic, dꞌa juntzan̈ yipumal yaji yic tzin och ijan jabꞌoc dꞌay, xchi vin̈.
27 Masanil ebꞌ yajalil chon̈abꞌ, molanecꞌ ebꞌ dꞌa yol templo chiꞌ, te bꞌudꞌan yuj anima, ebꞌ vin̈ vinac yedꞌ ebꞌ ix ix. Ay am oxeꞌ miloc anima ayqꞌue dꞌa schabꞌil piso, van smatzꞌan ebꞌ tas tzꞌutaj vin̈aj Sansón chiꞌ. 28 Ix lajvi chiꞌ, ix yalan vin̈ dꞌa Jehová: Ach in Dios Vajalil, tzin cꞌan dꞌayach to tzin a nacot dꞌa junelxo tic, tzacꞌan vip yic tzin pacan in bꞌa dꞌa ebꞌ vin̈ filisteo tic, yujto ix yicꞌqꞌueta yol in sat ebꞌ vin̈, xchi vin̈. 29 Ix och vetzꞌvetzꞌ vin̈ dꞌa chabꞌ nivac yoyal templo chiꞌ dꞌa snan̈al yool, aton juntzan̈ cuchjinac yalil jun templo chiꞌ. 30 Ix el yav vin̈ ix yalan vin̈: Junn̈ejocabꞌ tzꞌaj in cham yedꞌ ebꞌ vin̈ filisteo tic, xchi vin̈.
Ix lajvi chiꞌ ix yacꞌan yip vin̈ yecan lan̈chaj chabꞌ nivac yoyal templo chiꞌ. Ix cot lan̈naj templo chiꞌ dꞌa yibꞌan̈ masanil ebꞌ yajalil chon̈abꞌ chiꞌ yedꞌ dꞌa yibꞌan̈ masanil anima ayecꞌ taꞌ. Ecꞌalto sbꞌisul anima ix cham yuj vin̈ ayic ix cham vin̈ chiꞌ dꞌa yichan̈ ebꞌ ix smacꞌcham vin̈ ayic pitzanto.
31 Ix lajvi chiꞌ, ix cꞌoch ebꞌ yucꞌtac vin̈ yedꞌ scꞌabꞌ yoc vin̈, ix bꞌat yicꞌancot snivanil vin̈ chiꞌ ebꞌ. Ix smucan ebꞌ dꞌa snan̈al Zora yedꞌ Estaol bꞌaj mucan vin̈ smam vin̈, aton vin̈aj Manoa. A vin̈aj Sansón chiꞌ, 20 abꞌil ix yacꞌ yajalil vin̈ dꞌa Israel.