—Tzin nibꞌej tzin och vil ix vetbꞌeyum dꞌa yol scuarto, xchi vin̈.

Majxo chajiochlaj vin̈ yuj vin̈ sn̈iꞌ chiꞌ. 2 An̈ej to ix yal vin̈ dꞌa vin̈ icha tic:

—A in naani to man̈xalaj a gana dꞌa ix, yuj chiꞌ ix vacꞌ ix dꞌa jun vin̈ ajun edꞌoc dꞌa qꞌuin̈ chiꞌ. Palta ay val junxo ix snulej ix tzacꞌanto dꞌay, te ecꞌbꞌalto svachꞌil yilji ix dꞌa yichan̈ ix etbꞌeyum chiꞌ, syal a ix tzicꞌbꞌati, xchi vin̈ sn̈iꞌ vin̈ chiꞌ.

3 Ix tacꞌvi vin̈ dꞌa vin̈ sn̈iꞌ chiꞌ icha tic:

—A ticnaic jun, max yal-laj scotcan dꞌa vibꞌan̈ yuj tas ol vutoc ebꞌ etchon̈abꞌ tic yuj in pacan in bꞌa, xchi vin̈.

4 Ix bꞌat vin̈ bꞌian, ix bꞌat syamancot 300 nocꞌ vaax vin̈, ix stzecꞌanoch junjun tobꞌan te taj vin̈ dꞌa sn̈e chatacvan̈ nocꞌ. 5 Ix lajvi chiꞌ, ix yacꞌanoch scꞌacꞌal teꞌ vin̈, ix yactanbꞌat nocꞌ vin̈ dꞌa scal ixim strigo ebꞌ vin̈ filisteo chiꞌ. Masanil ixim cun̈cun̈bꞌaxo yaj sjochchaji yedꞌ ixim aytooch dꞌa yoc ix tzꞌabꞌati. Ix tzꞌapaxbꞌat teꞌ uva yedꞌ teꞌ olivo. 6 Ix och ijan ebꞌ filisteo scꞌanbꞌaneqꞌui mach ix cꞌulan jun chiꞌ. Ix alchaj dꞌa ebꞌ to a vin̈aj Sansón, yujto ix chichon scꞌol vin̈ yuj tas ix utaj yuj vin̈ sn̈iꞌ, vin̈ aj Timnat, to ix icꞌjiecꞌ ix yetbꞌeyum vin̈, ix acꞌji ix dꞌa jun vin̈ ajun yedꞌ vin̈ dꞌa qꞌuin̈ yic snupnajel. Yuj chiꞌ ix javi ebꞌ filisteo sn̈usantzꞌa ix ix chiꞌ yedꞌ smam. 7 Ix lajvi chiꞌ, ix yalan vin̈aj Sansón chiꞌ icha tic:

—Yujto icha tic ix e cꞌulej, yuj chiꞌ man̈ ol in och vaan ex vixtani, masanto ol vacꞌcanecꞌ in pac dꞌayex, xchi vin̈.

8 Ix cot val yoval vin̈ sicꞌlabꞌil, yuj chiꞌ tzijtum anima ix smacꞌcham vin̈. Ix lajvi chiꞌ ix bꞌat cajnaj vin̈ dꞌa qꞌuen n̈aqꞌueen dꞌa Etam.

9 Ix javi ebꞌ vin̈ filisteo sbꞌoqꞌue scampamento dꞌa yol yic Judá dꞌa slacꞌanil Lehi. 10 Ix scꞌanbꞌan ebꞌ vin̈ aj Judá chiꞌ dꞌa ebꞌ vin̈:

—¿Tas yuj tzex javi eyacꞌ oval quedꞌoc? xchi ebꞌ vin̈.

Ix tacꞌvi ebꞌ vin̈ filisteo chiꞌ:

—A vin̈aj Sansón tzul co yamaꞌ, ol cacꞌanoch syaelal vin̈, yujto nivan chucal ix yacꞌ vin̈ dꞌayon̈, xchi ebꞌ vin̈.

11 Ayic ix yabꞌan jun chiꞌ ebꞌ vin̈ aj Judá chiꞌ, oxeꞌ mil ebꞌ vin̈ ix bꞌat ilan vin̈aj Sansón dꞌa qꞌuen n̈aqꞌueen dꞌa Etam chiꞌ, ix yalan ebꞌ vin̈ dꞌa vin̈:

—¿Tom man̈ ojtacoc to ayon̈ och dꞌa yol scꞌabꞌ ebꞌ vin̈ filisteo tic? ¿Tas yuj tzacꞌoch chucal dꞌa co cal yedꞌ ebꞌ vin̈? xchi ebꞌ vin̈ dꞌa vin̈.

Ix tacꞌvi vin̈ dꞌa ebꞌ vin̈:

—Icha in yutej ebꞌ vin̈, icha pax ix vutej ebꞌ vin̈, xchi vin̈.

12 Ix yalan ebꞌ vin̈ dꞌa vin̈ icha tic:

—Yuj chiꞌ to tzul ach co tzecꞌbꞌat ticnaic yic bꞌat ach cacꞌan dꞌa ebꞌ vin̈ chiꞌ, xchi ebꞌ vin̈.

Ix tacꞌvi vin̈ dꞌa ebꞌ vin̈:

—Aqꞌuec e tiꞌ dꞌayin an, tato yel man̈ ol in e milchamlaj, xchi vin̈.

13 Ix tacꞌvi ebꞌ vin̈ dꞌa vin̈ icha tic:

—Maay, man̈ ol ach co milchamlaj, an̈ej to ol ach co tzecꞌbꞌati, bꞌat ach cacꞌan dꞌa ebꞌ vin̈ filisteo chiꞌ, xchi ebꞌ vin̈.

Ix lajvi chiꞌ, ix stzecꞌan vin̈ ebꞌ vin̈ dꞌa chabꞌ chꞌan̈ lasu te acꞌto, ix yicꞌanelta vin̈ ebꞌ vin̈ dꞌa yol qꞌuen n̈aqꞌueen chiꞌ.

14 Axo ix cꞌoch ebꞌ vin̈ dꞌa Lehi chiꞌ, ix cot ebꞌ vin̈ filisteo scha ebꞌ vin̈, toxon̈ej tzꞌavaj ebꞌ vin̈ yuj tzalajcꞌolal. Elan̈chamel ix ochxi Yespíritu Jehová dꞌa vin̈aj Sansón chiꞌ, ix te och yip vin̈, ix sdꞌin̈chitanbꞌat chabꞌ lasu chiꞌ vin̈, icha tzꞌaj sn̈icꞌchajbꞌat junoc cꞌapac cꞌapac tzꞌanac, ix em lan̈naj chꞌan̈ dꞌa scꞌabꞌ vin̈. 15 Elan̈chamel ix yicꞌqꞌue jun sbꞌaquil yalan̈ stiꞌ nocꞌ bꞌuru vin̈, yaxtacto val jun bꞌac chiꞌ. A yedꞌ jun bꞌac chiꞌ, mil ebꞌ vin̈ filisteo chiꞌ ix smacꞌcham vin̈. 16 Ix lajvi chiꞌ ix yalan vin̈:

17 Ix lajvi yalan jun chiꞌ vin̈, ix sjulancanel jun sbꞌaquil yalan̈ stiꞌ nocꞌ bꞌuru chiꞌ vin̈. Yuj chiꞌ a jun lugar chiꞌ, Ramat-lehi ix sbꞌiejcani, syalelcꞌochi, “tzalan bꞌaquil yalan̈ stiꞌ nocꞌ nocꞌ”. 18 Ix te tacji stiꞌ vin̈aj Sansón chiꞌ, yuj chiꞌ ix yavtej Jehová vin̈, ix yalan vin̈:

—A ach ix acꞌ vip, yuj chiꞌ ix vacꞌ ganar ebꞌ vin̈ filisteo tic, palta ¿tom ol in a cha cham a in a checabꞌ in tic yuj taquin̈tial dꞌa yol scꞌabꞌ juntzan̈ chꞌoc chon̈abꞌil tic? xchi vin̈.

19 Ix lajvi chiꞌ, ix pacꞌqꞌueta jun a aꞌ dꞌa Lehi chiꞌ yuj Jehová. Ix yucꞌan aꞌ vin̈, ix jax stzalajcꞌolal vin̈, ix te ochxi yip vin̈ ix yabꞌi. Yuj chiꞌ, a jun a yuneꞌ aꞌ chiꞌ, En-hacore ix sbꞌiejcan aꞌ, syalelcꞌochi “yucꞌbꞌilaꞌ mach tzꞌavajqꞌuei”. A jun aꞌ chiꞌ, ix cann̈ej aꞌ dꞌa Lehi chiꞌ.

20 A vin̈aj Sansón chiꞌ, 20 abꞌil ix och vin̈ yajaliloc ebꞌ israel chiꞌ, yacbꞌan ayoch ebꞌ dꞌa yol scꞌabꞌ ebꞌ filisteo.