—Ay jun ix cobꞌes ix vil dꞌa Timnat dꞌa scal ebꞌ ix filistea, ix can in gana dꞌa ix, yuj chiꞌ sval dꞌayex to bꞌat e cꞌan ix vicꞌaꞌ, xchi vin̈.

3 Ix tacꞌvi smam snun vin̈ chiꞌ, ix yalan ebꞌ icha tic:

—¿Tas yuj a dꞌa scal ebꞌ chꞌoc chon̈abꞌil ol bꞌat a say ix etbꞌeyum? ¿Tom man̈xa junoc ix ix vachꞌ icꞌan dꞌa scal ebꞌ ayto cuj co bꞌa yedꞌoc, mato dꞌa scal ebꞌ quetchon̈abꞌ tic? xchi ebꞌ dꞌa vin̈.

Ix tacꞌvi vin̈ icha tic:

—A val jun ix chiꞌ in gana. A ix bꞌat e cꞌan vicꞌaꞌ, xchi vin̈.

4 Te man̈ yojtacoc ebꞌ smam snun vin̈ chiꞌ tas spensar Jehová, to van snaan tas ol aj yel yich junoc oval yedꞌ ebꞌ filisteo chiꞌ, yujto ayoch ebꞌ israel dꞌa yalan̈ smandar ebꞌ dꞌa jun tiempoal chiꞌ. 5 Yuj chiꞌ ix bꞌat vin̈aj Sansón yedꞌ ebꞌ smam snun dꞌa chon̈abꞌ Timnat chiꞌ. Ayic ix ecꞌ ebꞌ dꞌa jun macan̈ teꞌ uva avabꞌil yuj ebꞌ aj Timnat chiꞌ, ix elta jun nocꞌ quelem choj dꞌa vin̈aj Sansón chiꞌ, tzꞌel yav nocꞌ scot nocꞌ dꞌa vin̈. 6 Dꞌa val jun rato chiꞌ, ix och Yespíritu Jehová dꞌa vin̈, ix te och yip vin̈, malaj val jabꞌoc tas yedꞌnac vin̈ yedꞌ val scꞌabꞌ vin̈ ix sjecchitanbꞌat jun nocꞌ choj chiꞌ, icha tzꞌaj sjecchitajbꞌat junoc yuneꞌ chiva. Maj yal-laj vin̈ dꞌa smam snun tas ix scꞌulej chiꞌ. 7 Ix lajvi chiꞌ, ix cꞌoch ebꞌ dꞌa chon̈abꞌ Timnat chiꞌ, ix lolon vin̈ yedꞌ ix cobꞌes chiꞌ, ix cann̈ej sgana vin̈ dꞌa ix.

8 Axo yic ix ecꞌbꞌat jayeꞌ cꞌual, ayic van sbꞌat vin̈aj Sansón yic ol nupnaj yedꞌ ix filistea chiꞌ, ix ecꞌ vin̈ bꞌaj ix smilcham nocꞌ choj chiꞌ. Axo ix cꞌoch vin̈, ix yilan vin̈, ayxo och jun nocꞌ chabꞌ dꞌa yol sjoyumteal sbꞌaquil nocꞌ, te bꞌudꞌan yool chiꞌ yuj yal nocꞌ chabꞌ chiꞌ. 9 Ix yicꞌanelta nocꞌ vin̈, ix sloan vin̈, ix bꞌat vin̈. Axo ix cꞌoch vin̈ dꞌa spatic smam snun chiꞌ, ix yacꞌan nocꞌ yalchabꞌ chiꞌ vin̈ slo ebꞌ. Maj yal-laj vin̈ dꞌa ebꞌ tato a dꞌa yol sjoyumteal sbꞌaquil nocꞌ choj ix yiqꞌuelta nocꞌ yalchabꞌ chiꞌ vin̈.

10 Ix emcꞌoch smam snun vin̈ chiꞌ dꞌa spat ix cobꞌes chiꞌ, ix yacꞌanoch jun qꞌuin̈ yic nupnajel vin̈aj Sansón chiꞌ, ichataxon sbꞌeybꞌal ebꞌ vin̈ quelemtac dꞌa jun chon̈abꞌ chiꞌ. 11 Ayic ix yilan vin̈aj Sansón ebꞌ vin̈ filisteo chiꞌ, ix yavtancot 30 ebꞌ vin̈ quelemtac ebꞌ vin̈ yic syil qꞌuin̈ nupnajel chiꞌ ebꞌ vin̈. 12 Ix yalan vin̈aj Sansón dꞌa ebꞌ vin̈ quelemtac chiꞌ icha tic:

—Ay jun lolonel ol val dꞌayex, a exxo ol e naꞌa tas syalelcꞌochi: Tato a dꞌa uqueꞌ cꞌual qꞌuin̈ tic ol eyal tas syalelcꞌochi, ol vacꞌ junjunoc e pichul nabꞌa lino yedꞌ junjunoc e pichul yic qꞌuin̈. 13 Tato man̈ ol nachajel eyuj jun, a ex ol eyacꞌ junjunoc cꞌapac nabꞌa lino chiꞌ dꞌayin yedꞌ junjunoc mojan̈ in pichul yic qꞌuin̈, xchi vin̈.

Ix tacꞌvi ebꞌ vin̈ dꞌa vin̈ icha tic:

—Al naic cabꞌ an, ol cabꞌi tas jun lolonel chiꞌ, xchi ebꞌ vin̈.

14 Ix yalan vin̈ icha tic:

Axo dꞌa yoxil cꞌual qꞌuin̈ chiꞌ, maj yal-laj spacan jun lolonel chiꞌ ebꞌ vin̈ quelemtac chiꞌ. 15 Yuj chiꞌ axo dꞌa schan̈il cꞌual, ix yalan ebꞌ vin̈ dꞌa ix yetbꞌeyum vin̈aj Sansón chiꞌ icha tic:

—Montej abꞌ dꞌa vin̈ etbꞌeyum chiꞌ tas syalelcꞌoch jun lolonel ix yal vin̈ dꞌayon̈, slajvi chiꞌ tzalan dꞌayon̈. Tato maay, ol ach co n̈ustzꞌa yedꞌ a mam a nun yedꞌ masanil mach ayecꞌ dꞌa yol a pat tic. Ichato ton̈ej tzon̈ eyavtejcot dꞌa tic, yic tze cꞌananecꞌ tas ay dꞌayon̈, xchi ebꞌ vin̈ dꞌa ix.

16 Ix lajvi chiꞌ, van yocꞌ ix, ix bꞌat yalan ix dꞌa vin̈aj Sansón chiꞌ:

—Tzin a chac a ach tic. Max in a xajanejlaj. Ix al jun a lolonel yic snael ebꞌ vin̈ vetchon̈abꞌ, palta man̈ val jabꞌoc tzal dꞌayin tas syalelcꞌochi, xchi ix dꞌa vin̈.

Ix tacꞌvi vin̈ dꞌa ix icha tic:

—Max valtax dꞌa in mam in nun, atobꞌ val dꞌayach ol valaꞌ, xchi vin̈.

17 Ix och val ijan ix yocꞌ dꞌa vin̈ dꞌa uqueꞌ cꞌual chiꞌ, yuj chiꞌ axo dꞌa yuquil cꞌual chiꞌ, ix yalan vin̈ dꞌa ix tas syalelcꞌochi. Ixn̈ej lajvi yabꞌan ix, ix bꞌat yalan ix dꞌa ebꞌ yetchon̈abꞌ chiꞌ. 18 Axo dꞌa qꞌuicꞌbꞌalil dꞌa yuquil cꞌual chiꞌ, ix bꞌat yalan ebꞌ vin̈ dꞌa vin̈aj Sansón chiꞌ icha tic:

Ix tacꞌvi vin̈ icha tic:

Yujn̈ej to ix e montej eyabꞌ dꞌa ix vetbꞌeyum tic, yuj chiꞌ ix nachaj eyalan tas syalelcꞌochi, xchi vin̈.

19 Ix lajvi chiꞌ ix ochxi Yespíritu Jehová dꞌa vin̈, ix te och yip vin̈. Ix bꞌat vin̈ dꞌa chon̈abꞌ Ascalón, ix bꞌat smacꞌancham 30 ebꞌ vin̈ filisteo vin̈ taꞌ. A spichul ebꞌ vin̈ ayochi, a ix yiqꞌuelta vin̈, ix yacꞌan vin̈ stojoloc tas ix yal chiꞌ. Ix lajvi chiꞌ, van ste chichon scꞌol vin̈ ix meltzaj vin̈ dꞌa spat vin̈ smam. 20 Axo ix yetbꞌeyum vin̈ chiꞌ, a dꞌa jun vin̈ ajun yedꞌ vin̈ dꞌa jun qꞌuin̈ chiꞌ, a dꞌa vin̈ ix acꞌji ix.