2 A dꞌa chon̈abꞌ Zora, dꞌa yol smacbꞌen ebꞌ yin̈tilal Dan, ay jun vin̈ scuchan Manoa. A ix yetbꞌeyum vin̈, malaj yuneꞌ ix, yujto max unevilaj ix. 3 Ix schꞌox sbꞌa Yángel Jehová dꞌa ix, ix yalani:

—A ach tic val yel malajtaxon junoc uneꞌ ix il sat. Palta a ticnaic, ol a cuchcanoch uneꞌ, ol aljoc jun a vinac unin. 4 Ayic ol bꞌeybꞌat tic, man̈xo ucꞌlaj vino, man̈xo ucꞌpaxlaj junoc tas pajbꞌinac. Man̈xo a chipaxlaj tas ay yovalil dꞌa yichan̈ ley. 5 Ayic ol aljoc jun uneꞌ chiꞌ, man̈ ol joxjiel-laj xil sjolom, yujto nazareo ol ajoc, yujto yic Dios yaji ayic manto aljoc. Aꞌ ol chaanel yich ex scolanel dꞌa yol scꞌabꞌ ebꞌ filisteo, xchi dꞌa ix.

6 Ix bꞌat ix bꞌaj ayecꞌ vin̈ yetbꞌeyum, ix yalan ix dꞌa vin̈: Ay jun schecabꞌ Dios ix ulecꞌ bꞌaj ayin eqꞌui. Ix te sat in cꞌool yuuj, icha val to Yángel Dios ix vilaꞌ. Maj in cꞌanbꞌejlaj dꞌay bꞌajtil ix coti, maj yalpaxlaj sbꞌi dꞌayin. 7 An̈ej to ix yal dꞌayin, tobꞌ ol aljoc junoc vuneꞌ. Ix yalani to man̈xo ol vucꞌlaj vino yedꞌ junocxo tas pajbꞌinac yedꞌ junoc tas to ay yovalil co chiꞌan dꞌa yichan̈ ley. Axobꞌ jun unin chiꞌ, tobꞌ yic Dios yaji ayic ol aljoc chiꞌ, masanto ol chamoc, xchi ix.

8 Yuj chiꞌ ix lesalvi vin̈aj Manoa chiꞌ dꞌa Jehová icha tic: Mamin, eloc val dꞌa a cꞌool to tza checxicot a checabꞌ chiꞌ dꞌayon̈, yic vachꞌ ol yal dꞌayon̈ tas val ol co cꞌulej yedꞌ jun unin ol aljoc chiꞌ, xchi vin̈.

9 Ix yabꞌ Dios tas ix scꞌan vin̈ chiꞌ, ix schꞌoxanxi sbꞌa Yángel Jehová chiꞌ dꞌa ix yetbꞌeyum vin̈ chiꞌ ayic van yicꞌan yip ix dꞌa cal munlajel, palta man̈ ayoquecꞌlaj vin̈aj Manoa chiꞌ taꞌ yedꞌ ix. 10 Elan̈chamel ix bꞌat lemnaj ix yal dꞌa vin̈:

—Lemach, yujto ix schꞌoxxi sbꞌa jun checabꞌ dꞌayin, jun ul lolon dꞌayin dꞌa junel, xchi ix.

11 Ix cot lemnaj vin̈aj Manoa chiꞌ, ix bꞌat vin̈ yedꞌ ix yetbꞌeyum chiꞌ, ix cꞌoch vin̈ bꞌaj ayecꞌ Yángel Jehová chiꞌ, ix scꞌanbꞌan vin̈ dꞌay:

—¿Tom a ach tic ul ach ecꞌ lolonel dꞌa ix vetbꞌeyum tic dꞌa junel? xchi vin̈ dꞌay.

—Iꞌ, a in toni, xchi dꞌa vin̈.

12 Ix scꞌanbꞌanxi vin̈ dꞌay:

—Ayic ol elcꞌoch tas ix al chiꞌ, ¿tas val ol cutej quilan qꞌuibꞌ vin̈ unin chiꞌ yedꞌ tas yopisio vin̈? xchi vin̈ dꞌay.

13 Ix tacꞌvi Yángel Jehová chiꞌ:

—Yovalil scꞌanabꞌajej ix etbꞌeyum tic tas ix valaꞌ: 14 Jantacn̈ej tas scot dꞌa sat teꞌ uva, man̈xo ol slolaj ix. Mocabꞌ yucꞌ vino ix yedꞌ junocxo tas pajbꞌinac, ma tas ay yovalil schiji dꞌa yichan̈ ley. A tas ix val chiꞌ dꞌa ix, yovalil scꞌanabꞌajej ix, xchi dꞌa vin̈.

15-16 A vin̈aj Manoa chiꞌ, man̈ yojtacoc vin̈ tato Yángel Jehová jun chiꞌ, yuj chiꞌ ix yal vin̈:

—Sval dꞌayach, comonoc tzꞌel dꞌa a cꞌool tzon̈ a tan̈vej, tic bꞌat co bꞌo junoc nocꞌ yuneꞌ chiva a chiꞌa, xchi vin̈ dꞌay.

Ix tacꞌvi jun Ángel chiꞌ:

—Vachꞌchom tzin can eyedꞌoc, palta man̈ ol in valaj. Syal eyacꞌan nocꞌ chiꞌ silabꞌil dꞌa Jehová, xchi.

17 Ix lajvi chiꞌ, ix yalan vin̈aj Manoa chiꞌ dꞌay icha tic:

—Alcan a bꞌi dꞌayon̈ yic vachꞌ ayic tzꞌelcꞌoch tas ix ul alcan tic dꞌayon̈, ol cacꞌ yuj diosal dꞌayach, xchi vin̈ dꞌay.

18 Ix tacꞌvi Ángel chiꞌ dꞌa vin̈:

—¿Tas yuj tze cꞌanbꞌej in bꞌi chiꞌ? A jun chiꞌ te satubꞌtac yochi, xchi.

19 Ix yicꞌancot nocꞌ chiva vin̈aj Manoa chiꞌ yedꞌ juntzan̈ ixim sat trigo dꞌa ofrendail. Ix sn̈usantzꞌa silabꞌ vin̈ dꞌa Jehová dꞌa yibꞌan̈ jun qꞌuen qꞌueen. Ix lajvi chiꞌ, ix schꞌoxan jun milagro Jehová dꞌa yichan̈ vin̈ yedꞌ ix yetbꞌeyum chiꞌ. 20 Ayic ix qꞌue n̈ilnaj cꞌacꞌ dꞌa yibꞌan̈ altar chiꞌ, ix och Yángel Jehová chiꞌ dꞌa scal cꞌacꞌ chiꞌ, ix paxqꞌuei. Ayic ix yilan ebꞌ icha chiꞌ, ix em cumnaj ebꞌ, ix em n̈ojan ebꞌ dꞌa sat luum. 21 Ichato chiꞌ ix nachajel yuj vin̈aj Manoa chiꞌ to Yángel Jehová jun chiꞌ. Majxo schꞌoxlaj sbꞌa junelxo dꞌa vin̈ yedꞌ dꞌa ix yetbꞌeyum vin̈ chiꞌ. 22 Ix yalan vin̈ dꞌa ix yetbꞌeyum chiꞌ icha tic:

—A ticnaic dꞌa val yel ol on̈ chamoc, yujto ix quil val och Dios, xchi vin̈ dꞌa ix.

23 Ix tacꞌvi ix dꞌa vin̈ icha tic:

—Tato sgana Jehová to tzon̈ chami, maj am scha co silabꞌ ix cacꞌ dꞌay yedꞌ cofrenda, maj am schꞌox juntzan̈ tic quilaꞌ, maj am yal juntzan̈ tic dꞌayon̈, xchi ix.

24 Ayic ix alji yuneꞌ ix chiꞌ, Sansón ix yacꞌ ix sbꞌiej. Ix qꞌuibꞌ vin̈ unin chiꞌ, ix yacꞌ svachꞌcꞌolal Jehová dꞌa yibꞌan̈ vin̈. 25 Ix schaanel yich schꞌoxan sbꞌa Yespíritu Jehová dꞌa vin̈ ayic ayecꞌ vin̈ dꞌa scampamento ebꞌ yin̈tilal Dan, dꞌa scal chon̈abꞌ Zora yedꞌ Estaol.