—¿Tas yuj maj al dꞌayon̈ ayic ach bꞌat dꞌa oval yedꞌ ebꞌ amonita? Tato ix al dꞌayon̈, ix am on̈ bꞌat edꞌoc. A ticnaic ol ach co n̈ustzꞌa dꞌa yol a pat tic, xchi ebꞌ vin̈ dꞌa vin̈.

2 Ix tacꞌvi vin̈aj Jefté chiꞌ dꞌa ebꞌ vin̈:

—A in tic yedꞌ ebꞌ vetchon̈abꞌ, ay jun nivan oval dꞌa co cal yedꞌ ebꞌ amonita chiꞌ. Ix ex vavtej, palta maj ex javoclaj on̈ e coloꞌ. 3 Yujto ix vilaꞌ to maj ex javoclaj on̈ e coloꞌ, yuj chiꞌ ix in bꞌec in bꞌa in cham dꞌa oval chiꞌ. Ix vacꞌan oval yedꞌ ebꞌ amonita chiꞌ. Ix cacꞌ ganar ebꞌ yujto a Jehová ix acꞌanoch ebꞌ dꞌa yol co cꞌabꞌ. Yuj chiꞌ ¿tas yuj tzex javi eyacꞌ oval dꞌayin ticnaic? xchi vin̈.

4 Ix bꞌuchji ebꞌ aj Galaad yuj ebꞌ aj Efraín chiꞌ, ix yalan ebꞌ icha tic: A ex tic, dꞌa co cal elnac ex yedꞌ dꞌa scal ebꞌ yin̈tilal Manasés, xchi ebꞌ. Yuj chiꞌ masanil ebꞌ anima cajan dꞌa Galaad chiꞌ, ix smolbꞌej ebꞌ vin̈aj Jefté chiꞌ, ix yacꞌan oval ebꞌ yedꞌ ebꞌ yin̈tilal Efraín chiꞌ, ix acꞌji ganar ebꞌ yuj vin̈. 5 A ebꞌ aj Galaad chiꞌ, ix och ebꞌ smac dꞌa sjayil stiꞌ aꞌ Jordán, yuj chiꞌ a ebꞌ yin̈tilal Efraín chiꞌ tzꞌel lemnajoc yic scꞌaxpaj ebꞌ dꞌa aꞌ Jordán chiꞌ, scꞌanbꞌan ebꞌ aj Galaad chiꞌ dꞌa ebꞌ tato yin̈tilal Efraín ebꞌ. Maay, tato xchi ebꞌ, 6 syalan ebꞌ aj Galaad chiꞌ dꞌa ebꞌ icha tic: “Xibolet”, xe chi an̈, xchi ebꞌ. Tato “Sibolet” xchi ebꞌ, syalelcꞌochi to yin̈tilal Efraín ebꞌ, yujto man̈ vachꞌoc tzꞌaj yalan ebꞌ. Icha chiꞌ tzꞌaj syamchajelta ebꞌ, smiljicham ebꞌ dꞌa stiꞌ aꞌ Jordán chiꞌ yuj ebꞌ aj Galaad chiꞌ. 42 mil val ebꞌ vinac dꞌa yin̈tilal Efraín ix cham taꞌ. 7 Vaqueꞌ abꞌil ix och vin̈aj Jefté yajalil dꞌa scal ebꞌ yetisraelal. Axo ix cham vin̈, ix mucji vin̈ dꞌa schon̈abꞌ dꞌa yol yic Galaad.

8 Ayic ayxo scham vin̈aj Jefté chiꞌ, ix och vin̈aj Ibzán aj Belén yajaliloc ebꞌ yetisraelal chiꞌ. 9 A vin̈ chiꞌ, 30 ebꞌ yuninal vin̈ yedꞌ 30 ebꞌ ix yisil vin̈. Ix och yetbꞌeyum ebꞌ ix yisil vin̈ chiꞌ dꞌa scal ebꞌ man̈xalaj yuj sbꞌa yedꞌoc. An̈ejaꞌ pax ebꞌ yuninal vin̈ chiꞌ, a ebꞌ ix man̈xalaj yuj sbꞌa ebꞌ vin̈ yedꞌoc ix yicꞌaꞌ. A vin̈aj Ibzán chiꞌ, uqueꞌ abꞌil ix yacꞌ yajalil vin̈ dꞌa scal ebꞌ yetisraelal chiꞌ. 10 Ayic ix cham vin̈, a dꞌa Belén ix mucji vin̈.

11 Ix lajvi chiꞌ, axo vin̈aj Elón dꞌa yin̈tilal Zabulón ix acꞌan yajalil dꞌa scal ebꞌ yetisraelal chiꞌ. Lajun̈eꞌ abꞌil ix yacꞌ yajalil chiꞌ vin̈. 12 Ayic ix cham vin̈, ix mucji vin̈ dꞌa Ajalón dꞌa smacbꞌen ebꞌ yin̈tilal Zabulón chiꞌ.

13 Ix lajvi chiꞌ, axo vin̈aj Abdón yuninal vin̈aj Hilel aj Piratón ix acꞌan yajalil dꞌa scal ebꞌ yetisraelal chiꞌ. 14 Vajxaqueꞌ abꞌil ix yacꞌ yajalil chiꞌ vin̈. 40 yuninal vin̈ yedꞌ 30 yixchiquin vin̈. Junjun ebꞌ vin̈ chiꞌ, sqꞌue ebꞌ vin̈ dꞌa yibꞌan̈ nocꞌ bꞌuru. 15 Ayic ix cham vin̈, ix mucji vin̈ dꞌa Piratón, dꞌa yol smacbꞌen ebꞌ yin̈tilal Efraín dꞌa tzalquixtac dꞌa yol yic ebꞌ Amalec.