Slajvubꞌ lolonel vin̈aj Jacob
49
Ix lajvi chiꞌ ix yavtancot ebꞌ yuninal vin̈aj Jacob chiꞌ smasanil, ix yalan vin̈: Ex vuninal, nitzeccot e bꞌa dꞌa in tzꞌey. Abꞌec tas ol ex aj dꞌa yic bꞌaqꞌuin̈:2 Nitzeccot e bꞌa dꞌa in tzꞌey, ol valan dꞌayex. Abꞌec tas ol val a in Israel e mam in tic:
3 Ach Rubén, a ach ton in bꞌabꞌel unin ach, schꞌoxel sbꞌa vip dꞌayach. A ach tic toxonton ay a may, nivan elcꞌoch dꞌa yichan̈ ebꞌ ucꞌtac.
4 A ticnaic, man̈xalaj ol aj elcꞌochi, yujto lajan ach icha junoc elumaꞌ, yujto qꞌuixveltac ix in utej dꞌa in vaynubꞌ ayic ix ach vay yedꞌ ix schabꞌil vetbꞌeyum.
5 A ach tic ach Simeón yedꞌ ach tic Leví, eyucꞌtac e bꞌa, a eyamcꞌabꞌ yic oval ix eyacꞌlabꞌej ayic ix e cꞌulan chucal.
6 Juneln̈ej malaj in gana tzin cꞌoch bꞌaj tzꞌoch e molchajel, yujto ayic ix cot oynaj ix eyilaꞌ, ix e milcham anima. Ina ayic ix cot eyoval ix e macꞌqꞌuichaj yoc nocꞌ mam vacax.
7 Cotocabꞌcan catabꞌ dꞌa eyibꞌan̈ yuj yoval e jolom chiꞌ, ina man̈ jabꞌoc tzꞌocꞌ e cꞌool. Yuj chiꞌ ol ex in saclemejcanbꞌat dꞌa scal ebꞌ eyetchon̈abꞌ Israel.
8 Ach vuninal Judá, ol alchaj val vachꞌ lolonel dꞌayach yuj ebꞌ ucꞌtac tic. Ol ach och bꞌinbꞌin dꞌa sjaj ebꞌ ayoch ajcꞌolal dꞌayach. Ol em n̈ojjabꞌ ebꞌ ucꞌtac tic dꞌayach.
9 Lajan ach val icha junoc nocꞌ quelem choj, ayic slajvi schianbꞌat junoc nocꞌ nocꞌ ix smilaꞌ, spaxta dꞌa sn̈aqꞌueen. Tzꞌem n̈ojan, tzꞌem cutzan dꞌa sat lum. Icha val junoc nivaquil choj, ¿mach val junoc ol stecꞌbꞌej sbꞌa ach stzuntzani?
10 Malaj mach syal yicꞌanecꞌ snivanil elcꞌochi. Malaj mach syal yicꞌanecꞌ a cꞌococh dꞌa yol a cꞌabꞌ, masanto ol ja jun Mach ay yicoꞌ, jun mach to masanil nación ol cꞌanabꞌajanoc.
11 Ol yetzbꞌanoch sbꞌuru dꞌa jun yibꞌ teꞌ uva yelxo val vachꞌ, ol sjucꞌan spichul dꞌa yal uva.
12 A yol sat, te qꞌuicꞌ yilji dꞌa yichan̈ vino, axo qꞌuen ye, yelxo val te sac dꞌa yichan̈ nocꞌ lech.
13 A achxo tic ach Zabulón, a dꞌa stiꞌ aꞌ mar bꞌaj scꞌoch teꞌ barco ol ach cajnajoc. A stzꞌacan̈il lum a luum, ol cꞌoch dꞌa Sidón.
14 A achxo tic ach Isacar, lajan ach icha junoc nocꞌ bꞌuru cuchum icatz syicꞌ yip dꞌa yol macteꞌ.
15 Ayic ol ilanochi to te vachꞌ junoc lugar, vachꞌ ol icꞌ ip taꞌ, tzacꞌanoch yich a patic dꞌa yalan̈ icatz, man̈xalaj tas tzalaꞌ tzach ochxon̈ejcan checabꞌoc.
16 A achxo tic ach Dan, a ach val ol a chꞌolbꞌitej a chon̈abꞌ icha val smojal tzꞌaj schꞌolbꞌitaj junoc macan̈ ebꞌ etisraelal.
17 A ach tic, lajan tzutej a bꞌa icha val junoc nocꞌ ajavchan tzꞌecꞌ bꞌacꞌacꞌoc dꞌa ti bꞌe, to schiji yoc nocꞌ chej yuj nocꞌ, yuj chiꞌ sjulcanel nocꞌ mach ayqꞌue dꞌa yibꞌan̈.
18 Mamin Jehová tzin tan̈vej in a colani.
19 A achxo tic ach Gad, scꞌoch ebꞌ ajcꞌol yacꞌ oval edꞌoc, palta slajvubꞌalxo ol acꞌ ganar ebꞌ.
20 A achxo tic ach Aser, ol yacꞌn̈ej sobre tas ol a vaꞌa. Ol acꞌanpax tas ol sva ebꞌ vin̈ rey.
21 A achxo tic ach Neftalí, libre aj icha junoc nocꞌ cobꞌes cꞌultaquil chej. A val vachꞌ pensaril ol alaꞌ.
22 A achxo tic ach José, lajan ach val icha junoc te teꞌ ay dꞌa stiꞌ junoc a aꞌ, ste el cꞌuyan, man̈ jantacoc sat syacꞌaꞌ, scꞌaxpajecꞌ scꞌabꞌ dꞌa yibꞌan̈ smacteꞌal.
23 Te ajcꞌol syutej sbꞌa ebꞌ anima dꞌayach, sjulvaj ebꞌ yedꞌ sjul-labꞌ dꞌayach, tzꞌoch val ijan ebꞌ ach stzuntzani.
24 A ach tic, te ay val yip a cꞌabꞌ, te vachꞌ yaj a jul-labꞌ yuj val yip in Diosal Syaln̈ej yuuj, aton Vilumal yedꞌ in Columal a in Israel in tic,
25 yuj val yip in Diosal, aton ol ach colanoc. A Dios Syal Yuj Smasanil ol yacꞌ svachꞌcꞌolal dꞌa ibꞌan̈, aton n̈abꞌ scot dꞌa satchaan̈ yedꞌ syaxil sat lum luum. Yuj svachꞌcꞌolal ol qꞌuibꞌ sbꞌisul ebꞌ uninal yedꞌ nocꞌ a molbꞌetzal nocꞌ.
26 Ach José, masanil juntzan̈ vachꞌ lolonel svalcan tic dꞌa ibꞌan̈ a in a mam in tic, yelxo val te nivan yelcꞌoch dꞌa yichan̈ vachꞌ lolonel ix yalcan in mam dꞌa vibꞌan̈, yelxo val nivan dꞌa yichan̈ juntzan̈ vitz aytax ecꞌ dꞌa pecaꞌ. A masanil juntzan̈ tic svalcan dꞌa ibꞌan̈, to sicꞌbꞌilachcanel dꞌa scal ebꞌ vin̈ ucꞌtac tic.
27 A achxo tic ach Benjamín, lajan ach val icha junoc nocꞌ oques te ov. Ayic van sacbꞌi qꞌuinal schianbꞌat schibꞌej nocꞌ smilaꞌ, ayic qꞌuicꞌbꞌalilxo spucanbꞌat tas tzꞌilchaj yuuj, xchi vin̈aj Israel chiꞌ.
28 Aton val stzolal ebꞌ lajchavan̈ yuninal vin̈aj Israel tic. Masanil juntzan̈ lolonel tic ix yal vin̈ ayic ix yalancanel vachꞌ lolonel vin̈ dꞌa yibꞌan̈ junjun ebꞌ vin̈ yuninal chiꞌ, icha val smojal tas ol aj junjun ebꞌ.
A schamel vin̈aj Jacob
29 Ix lajvi chiꞌ, ix yalan vin̈ dꞌa ebꞌ vin̈ yuninal chiꞌ: Toxo val ol in chamoc, yuj chiꞌ a bꞌaj mucbꞌil ebꞌ in mam vicham tzin e mucuꞌ, aton lum manbꞌil dꞌa vin̈aj Efrón hitita 30 dꞌa yol yic Canaán. A tas ix val tic, syalelcꞌochi, aton dꞌa qꞌuen olan qꞌuen yic Macpela dꞌa slacꞌanil lum yic vin̈aj Mamre, manbꞌilcan yuj vin̈ co mam quicham aj Abraham yic bꞌaj smucchaj schamnac vin̈. 31 Ataꞌ smucnaccan ix Sara vin̈, aton ix yetbꞌeyum vin̈. Ataꞌ mucchajnacpax vin̈. Ataꞌ mucancan vin̈ co mam aj Isaac yedꞌ ix co nun ix Rebeca. Ataꞌ in mucnacpaxcan ix Lea. 32 A jun lum chiꞌ yedꞌ qꞌuen olan qꞌuen chiꞌ, manbꞌilcan dꞌa ebꞌ vin̈ hitita, xchi vin̈ dꞌa ebꞌ vin̈ yuninal chiꞌ.
33 Ix lajvi yalan vin̈ dꞌa ebꞌ vin̈ yuninal chiꞌ yuj tas ol aj smucchaj snivanil yuj ebꞌ vin̈, ix ecꞌ jichan vin̈, ix cham vin̈ bꞌian.