—A Dios Syal Yuuj Masanil, aꞌ ix schꞌox sbꞌa dꞌayin dꞌa chon̈abꞌ Luz, dꞌa yol yic Canaán. Ataꞌ ix yal vachꞌ lolonel dꞌa vibꞌan̈, ix yalan icha tic: 4 Abꞌ jun, tzijtum sbꞌisul in̈tilal ol vacꞌaꞌ. A jantac in̈tilal, tzijtum nación ol ajelcꞌochoc. Ol vacꞌanpax jun luum tic dꞌayach yedꞌ dꞌa masanil ebꞌ in̈tilal chiꞌ, ol eyiquej lum dꞌa juneln̈ej, xchi Dios chiꞌ. 5 Yuj chiꞌ, a val chavan̈ uninal ix alji dꞌa Egipto tic ayic manto in javoc, aton vin̈aj Manasés yedꞌ vin̈aj Efraín, victaxon yaj ebꞌ vin̈, icha vuninal tzꞌajcan ebꞌ vin̈, icha val yaj vin̈aj Rubén yedꞌ vin̈aj Simeón. 6 A jantacto ebꞌ uninal toto ol aljoc, icxo ol aj ebꞌ, a dꞌa smacbꞌen chavan̈ ebꞌ yucꞌtac ebꞌ tic ol yicꞌ yic ebꞌ. 7 Ayic in meltzajnac dꞌa Padán-aram, chamnaccan ix a nun dꞌa Canaán ayic manto in javilaj dꞌa Efrata. A dꞌa sbꞌeal Efrata chiꞌ ix in muccan ix, xchi vin̈. (A jun lugar chiꞌ Belén sbꞌi ticnaic.)

8 Ix lajvi chiꞌ, ix bꞌat qꞌuelan vin̈aj Israel chiꞌ dꞌa ebꞌ vin̈ chavan̈ yuninal vin̈aj José chiꞌ, ix scꞌanbꞌan vin̈ icha tic:

—A ebꞌ vin̈ tic, ¿mach ebꞌ vin̈? xchi vin̈.

9 —A ebꞌ vin̈ vuninal ix yacꞌ Dios dꞌayin dꞌa Egipto tic, xchi vin̈aj José chiꞌ. Ix lajvi chi, ix yalan vin̈ smam vin̈ chiꞌ:

—Elocabꞌ dꞌa a cꞌool, snitzocabꞌcot sbꞌa ebꞌ vin̈ dꞌa in tzꞌey tic yic vachꞌ ol valcan vachꞌ lolonel dꞌa yibꞌan̈ ebꞌ vin̈, xchi vin̈.

10 Yujto te icham vinacxo vin̈aj Israel chiꞌ, maxtzac yal-laj yilan vin̈. Yuj chiꞌ ix nitzchajcot ebꞌ vin̈ yuj vin̈aj José chiꞌ dꞌa stzꞌey vin̈. Ix och lacꞌlacꞌ vin̈ dꞌa ebꞌ vin̈, ix tzꞌubꞌjielta stiꞌ ebꞌ vin̈ yuj vin̈. 11 Ix lajvi chiꞌ ix yalan vin̈ dꞌa vin̈aj José icha tic:

—Te maxtzac in nalaj tato olto ach vilaꞌ. Tic val man̈oc achn̈ej tzato ach vilaꞌ, palta ix el dꞌa scꞌol Dios to ixto val viloch ebꞌ vin̈ uninal tic, xchi vin̈.

12 Ix lajvi chiꞌ, ix yicꞌanelta ebꞌ vin̈ vin̈aj José chiꞌ dꞌa scal yoc vin̈ smam chiꞌ, ix em n̈ojan vin̈ dꞌa yichan̈ vin̈ smam chi. 13 Ix yicꞌanxibꞌat ebꞌ vin̈ yuninal vin̈ chiꞌ: A vin̈aj Efraín dꞌa svachꞌ vin̈, axo vin̈aj Manasés dꞌa sqꞌuexan̈ vin̈. Ix yicꞌanbꞌat ebꞌ vin̈ bꞌaj ay vin̈ smam chiꞌ. Yuj chiꞌ a vin̈aj Efraín chiꞌ ix can dꞌa sqꞌuexan̈ vin̈aj Israel chiꞌ, axo vin̈aj Manasés ix can dꞌa svachꞌ vin̈. 14 Ayic ix yacꞌanbꞌat scꞌabꞌ vin̈ chiꞌ dꞌa yibꞌan̈ ebꞌ vin̈, culus ix yutejbꞌat scꞌabꞌ vin̈ chiꞌ dꞌa yibꞌan̈ ebꞌ vin̈. Yuj chiꞌ, a svachꞌ vin̈ ix cꞌoch dꞌa yibꞌan̈ vin̈aj Efraín chiꞌ, axo sqꞌuexan̈ vin̈ ix cꞌoch dꞌa yibꞌan̈ vin̈aj Manasés chiꞌ, vachꞌchom bꞌabꞌel vinac vin̈aj Manasés chiꞌ. 15 Ix yalan vachꞌ lolonel vin̈ dꞌa yibꞌan̈ vin̈aj José chiꞌ, icha tic:

17 Max schalaj scꞌol vin̈aj José chiꞌ to a dꞌa yibꞌan̈ vin̈aj Efraín chiꞌ ix yacꞌqꞌue svachꞌ cꞌabꞌ vin̈ smam chiꞌ. Yuj chiꞌ ix yacꞌlej vin̈ yicꞌanel svachꞌ cꞌabꞌ vin̈ smam chiꞌ dꞌa yibꞌan̈ vin̈aj Efraín chiꞌ, ix yacꞌanqꞌue vin̈ dꞌa yibꞌan̈ vin̈aj Manasés yalani.

18 Ix yalan vin̈ icha tic:

—Maay mamin, man̈ ichoctaꞌ tzutej, a dꞌa vin̈ bꞌabꞌel tic, ataꞌ tzacꞌqꞌue a vachꞌ cꞌabꞌ, xchi vin̈.

19 Maj yal-laj scꞌol vin̈ smam vin̈ chiꞌ, ix yalan vin̈ icha tic:

—Vojtacxo ach vuninal. A vin̈ tic, nivan chon̈abꞌ ol aj yelcꞌoch vin̈ dꞌa bꞌaqꞌuin̈, palta a vin̈ tzacꞌan tic yelxo val nivan ol aj yelcꞌoch vin̈ dꞌa vin̈ bꞌabꞌel tic, axo yin̈tilal vin̈, tzijtum nación ol ajelcꞌochoc, xchi vin̈.

20 Ix lajvi chiꞌ, ix yalan vachꞌ lolonel vin̈ dꞌa yibꞌan̈ ebꞌ schavan̈il:

—Icha tic ol aj e bꞌinaj yuj ebꞌ e cꞌabꞌ eyoc dꞌa bꞌaqꞌuin̈ ayic ol snibꞌej ebꞌ yalan vachꞌ lolonel dꞌa yibꞌan̈ junoc anima: Yacꞌocabꞌ svachꞌcꞌolal Dios dꞌa ibꞌan̈, icha ix aj yacꞌan dꞌa vin̈aj Efraín yedꞌ dꞌa vin̈aj Manasés, xcham ebꞌ, xchi vin̈aj Israel chiꞌ.

A dꞌa aloj vachꞌ lolonel chiꞌ, bꞌabꞌel ix yacꞌ bꞌinaj vin̈aj Efraín chiꞌ vin̈ dꞌa yichan̈ vin̈aj Manasés chiꞌ. 21 Dꞌa elan̈chamel ix yalanxi vin̈ dꞌa vin̈aj José chiꞌ:

—Ach vuninal, a in tic toxo ol in chamoc, palta ayn̈ejoch Dios eyedꞌoc, ayn̈ejpaxoch yedꞌ ebꞌ eyin̈tilal. A ol ex icꞌan meltzaj dꞌa slum co mam quicham. 22 Svacꞌ junxo macan̈ macbꞌen dꞌayach ecꞌto dꞌa yichan̈ yic ebꞌ ucꞌtac, aton lum pacꞌan ix vicꞌcanecꞌ dꞌa ebꞌ amorreo dꞌa scal oval, xchi vin̈aj Israel chiꞌ dꞌa vin̈aj José chiꞌ.