—Jacob, xchi. Ix tacꞌvi vin̈:

—Oy, ina vajecꞌ tic Mamin, xchi vin̈.

3 Ix yalan Dios dꞌa vin̈ icha tic:

—A in ton a Diosal in yedꞌ vin̈ a mam, man̈ ach xiv a bꞌat dꞌa Egipto chiꞌ. Yacbꞌan ayex ecꞌ taꞌ ol in bꞌo jun nivan chon̈abꞌ dꞌa in̈tilal. 4 Ol in bꞌatn̈ej edꞌoc dꞌa Egipto chiꞌ, axo yic ol cꞌoch stiempoal, ol in ochn̈ej yedꞌ ebꞌ in̈tilal ayic ol meltzajxicot ebꞌ dꞌa jun lugar tic. Axo yic ol ach chamoc, a vin̈ uninal aj José chiꞌ, ayecꞌ vin̈ dꞌa a tzꞌey, xchi Dios dꞌa vin̈.

5 Ix lajvi chiꞌ, ix acꞌjiqꞌue vin̈ yuj ebꞌ vin̈ yuninal dꞌa yol carreta ix yacꞌcot vin̈ sreyal Egipto chiꞌ. Ix yacꞌanpaxqꞌue ebꞌ unin yedꞌ ebꞌ ix yetbꞌeyum ebꞌ vin̈. Ichato chiꞌ ix el ebꞌ vin̈ dꞌa Beerseba chiꞌ. 6 Ix cot ebꞌ vin̈ dꞌa Egipto, ix yicꞌancot nocꞌ scalnel ebꞌ vin̈ yedꞌ nocꞌ svacax yedꞌ masanil tastac ix yicꞌ ebꞌ vin̈ dꞌa Canaán chiꞌ. 7 Ix yicꞌancot masanil ebꞌ vin̈ yuninal vin̈aj Jacob chiꞌ yedꞌ ebꞌ ix yisil yedꞌ ebꞌ yixchiquin.

8-15 A ebꞌ yin̈tilal vin̈ yedꞌ ix Lea ix cot yedꞌoc dꞌa Egipto, 33 ebꞌ dꞌa smasanil, ayoch ebꞌ vinac yedꞌ ebꞌ ix ix sbꞌisuloc. A ebꞌ yuninal vin̈ yedꞌ ix, aton ebꞌ tic: Vin̈aj Rubén, aton vin̈ bꞌabꞌel unin, vin̈aj Simeón, vin̈aj Leví, vin̈aj Judá, vin̈aj Isacar, vin̈aj Zabulón yedꞌ ix Dina. A ebꞌ tic ix alji ayic ayecꞌ vin̈ dꞌa Padán-aram.

A ebꞌ yuninal vin̈aj Rubén: Aton vin̈aj Hanoc, vin̈aj Falú, vin̈aj Hezrón yedꞌ vin̈aj Carmi.

A ebꞌ yuninal vin̈aj Simeón: Aton vin̈aj Jemuel, vin̈aj Jamín, vin̈aj Ohad, vin̈aj Jaquín, vin̈aj Zohar yedꞌ vin̈aj Saúl, vin̈ yuneꞌ jun ix aj Canaán.

A ebꞌ yuninal vin̈aj Leví: Aton vin̈aj Gersón, vin̈aj Coat yedꞌ vin̈aj Merari.

A ebꞌ vin̈ yuninal vin̈aj Judá: Aton vin̈aj Er, vin̈aj Onán, vin̈aj Sela, vin̈aj Fares yedꞌ vin̈aj Zara. (A vin̈aj Er yedꞌ vin̈aj Onán chiꞌ, chamnacxo ebꞌ vin̈ dꞌa Canaán). A ebꞌ yuninal vin̈aj Fares chiꞌ, aton vin̈aj Hezrón yedꞌ vin̈aj Hamul.

A ebꞌ yuninal vin̈aj Isacar: Aton vin̈aj Tola, vin̈aj Fúa, vin̈aj Job yedꞌ vin̈aj Simrón.

A ebꞌ yuninal vin̈aj Zabulón: Aton vin̈aj Sered, vin̈aj Elón yedꞌ vin̈aj Jahleel.

16-18 A ebꞌ yin̈tilal vin̈aj Jacob chiꞌ yedꞌ ix Zilpa, 16 ebꞌ dꞌa smasanil. A ix Zilpa chiꞌ, aton ix scriada ix Lea ix acꞌji yuj vin̈ sman, aton vin̈aj Labán. A ebꞌ yuninal vin̈ yedꞌ ix, aton ebꞌ tic: Vin̈aj Gad yedꞌ vin̈aj Aser.

A ebꞌ yuninal vin̈aj Gad: Aton vin̈aj Zifión, vin̈aj Hagui, vin̈aj Ezbón, vin̈aj Suni, vin̈aj Eri, vin̈aj Arodi yedꞌ vin̈aj Areli.

A ebꞌ yuninal vin̈aj Aser: Aton vin̈aj Imna, vin̈aj Isúa, vin̈aj Isúi, vin̈aj Bería yedꞌ ix yanabꞌ ebꞌ vin̈ scuchan Sera. A ebꞌ yuninal vin̈aj Bería chiꞌ, aton vin̈aj Heber yedꞌ vin̈aj Malquiel.

19-22 A ebꞌ yin̈tilal vin̈aj Jacob chiꞌ yedꞌ ix Raquel, 14 ebꞌ dꞌa smasanil. A ebꞌ yuninal vin̈ yedꞌ ix: Aton vin̈aj José yedꞌ vin̈aj Benjamín.

A ebꞌ yuninal vin̈aj José chiꞌ yedꞌ ix Asenat yisil vin̈aj Potifera sacerdote dꞌa chon̈abꞌ On: Aton vin̈aj Manasés yedꞌ vin̈aj Efraín, aton ebꞌ ix alji dꞌa Egipto.

A ebꞌ yuninal vin̈aj Benjamín chiꞌ: Aton vin̈aj Bela, vin̈aj Bequer, vin̈aj Asbel, vin̈aj Gera, vin̈aj Naamán, vin̈aj Ehi, vin̈aj Ros, vin̈aj Mupim, vin̈aj Hupim yedꞌ vin̈aj Ard.

23-25 A ebꞌ yin̈tilal vin̈aj Jacob chiꞌ yedꞌ ix Bilha, ucvan̈ ebꞌ. A ix Bilha chiꞌ, aton ix scriada ix Raquel ix acꞌji yuj vin̈aj Labán. A ebꞌ yuninal vin̈ yedꞌ ix, aton ebꞌ tic: Vin̈aj Dan yedꞌ vin̈aj Neftalí.

A yuninal vin̈aj Dan chiꞌ, an̈ej vin̈aj Husim.

A ebꞌ yuninal vin̈aj Neftalí chiꞌ: Aton vin̈aj Jahzeel, vin̈aj Guni, vin̈aj Jezer yedꞌ vin̈aj Silem.

26 66 ebꞌ yin̈tilal vin̈aj Jacob chiꞌ dꞌa smasanil, aton ebꞌ tic ajun yedꞌ vin̈ ayic ix cꞌoch vin̈ dꞌa Egipto. Aton val ebꞌ tic yin̈tilal vin̈, chꞌoc pax ebꞌ ix alibꞌal. 27 Chꞌoc pax yaj vin̈aj José yedꞌ chavan̈ ebꞌ yuninal ix alji dꞌa Egipto chiꞌ, yuj chiꞌ 70 sbꞌisul vin̈aj Jacob chiꞌ yedꞌ ebꞌ yin̈tilal ayic ayxoecꞌ vin̈ taꞌ.

28 Ix bꞌabꞌlajbꞌat vin̈aj Judá yuj vin̈aj Jacob chiꞌ, yic sbꞌat vin̈ yal yabꞌ vin̈aj José chiꞌ to scot vin̈ chaval dꞌa yol yic Gosén. Axo yic ix cꞌoch ebꞌ dꞌa Gosén chiꞌ, 29 ix schecan vin̈aj José chiꞌ acꞌchaj lista scarruaje yic bꞌat schaan vin̈ smam vin̈ dꞌa Gosén chiꞌ. Ayic ix cꞌoch vin̈ dꞌa yichan̈ vin̈ smam chiꞌ, ix och lacꞌnaj vin̈ dꞌa vin̈. Te junip ix em n̈ojan vin̈ yocꞌ dꞌa sjolom sjen̈jabꞌ vin̈ smam chiꞌ. 30 Axo ix yalan vin̈ smam vin̈ chiꞌ icha tic:

—A ticnaic, tic val ix vilxioch a sat, tic val pitzan achto, juncꞌolalxo ol in cham ticnaic, xchi vin̈.

31 Ix lajvi chiꞌ, ix yalan vin̈aj José chiꞌ dꞌa ebꞌ vin̈ yucꞌtac yedꞌ dꞌa masanil ebꞌ ayecꞌ yedꞌ vin̈ smam vin̈ chiꞌ:

—Tic tzin bꞌat val dꞌa vin̈ rey: Masanil ebꞌ vin̈ vucꞌtac yedꞌ masanil ebꞌ yin̈tilal vin̈ in mam ay dꞌa Canaán, toxo ix ja ebꞌ vedꞌoc. 32 Yedꞌnac masanil nocꞌ scalnel ebꞌ, nocꞌ svacax yedꞌ masanil tas ay dꞌa ebꞌ, yujto a smunlajel ebꞌ aton moloj calnel yedꞌ moloj vacax, xin chama. 33 Yuj chiꞌ, ayic ol ex avtajbꞌat yuj vin̈ rey chiꞌ, ol scꞌanbꞌan vin̈ dꞌayex tas bꞌaj tzex munlaji, 34 tzeyalani to moloj calnel yedꞌ moloj vacax tze cꞌulej. An̈ej nocꞌ calnel co molbꞌetz yaji yictax on̈ cotoch uninal icha val ebꞌ co mam quicham, xe chi. Yuj chiꞌ ol ex can dꞌa lum Gosén tic, yujto a ebꞌ vin̈ aj Egipto tic ay yovalil tato junn̈ej tzꞌaj ebꞌ vin̈ yedꞌ ebꞌ vin̈ molum calnel, xchi vin̈aj José chiꞌ.