—Acꞌ bꞌudꞌjoc scoxtal ebꞌ vin̈ tic dꞌa ixim trigo, yaln̈ej jantac syal yicꞌanbꞌat ebꞌ vin̈. Tzacꞌanpaxem qꞌuen tumin dꞌa yol stiꞌ scoxtal junjun ebꞌ vin̈, aton qꞌuen bꞌaj sman ixim trigo chiꞌ ebꞌ vin̈. 2 Tzacꞌanpaxem qꞌuen in copa plata yedꞌ qꞌuen tumin dꞌa yol stiꞌ scoxtal vin̈ tzacꞌan unin, xchi vin̈. Ix scꞌanabꞌajan vin̈ tas ix yal vin̈aj José chiꞌ. 3 Ayic ix ja copnaj yoc cꞌu dꞌa qꞌuin̈ibꞌalil, ix chaji meltzaj ebꞌ vin̈ yedꞌ nocꞌ schej dꞌa schon̈abꞌ. 4 Quenanto val sbꞌat ebꞌ vin̈, ix yalan vin̈aj José dꞌa vin̈ yilumal spat chiꞌ icha tic:

—Ixic tzacꞌan yuj ebꞌ vin̈ chiꞌ. Ayic syamchaj ebꞌ vin̈ uuj, tzalani: ¿Tas yuj a svachꞌcꞌolal vin̈ in patrón, chucxo tzeyutej e pactzitancani? ¿Tas yuj ix eyelqꞌuejcot scopa vin̈, aton jun nabꞌa plata, 5 jun scopa vin̈ bꞌaj syucꞌ svino, scꞌananpax vin̈ yic snaanel junoc lolonel? Te chuc ix eyutej e bꞌa a ex tic, xa chi dꞌa ebꞌ vin̈, xchi vin̈aj José chiꞌ.

6 Ix bꞌat vin̈ yilumal spat vin̈aj José chiꞌ bꞌian. Axo yic ix yamchaj ebꞌ vin̈ yuj vin̈, ix yalan vin̈ dꞌa ebꞌ vin̈ icha ix aj yalan vin̈aj José chiꞌ. 7 Ix tacꞌvi ebꞌ vin̈ dꞌa vin̈:

—Mamin, ¿tas yuj icha chiꞌ tzutej alan dꞌayon̈? ¿Tom malaj co pensar, yuj chiꞌ ol quelqꞌuejcot junoc tasi? 8 Ina ato dꞌa Canaán cajan on̈. Dꞌa sbꞌabꞌel, a qꞌuen tumin ix checlaj dꞌa stiꞌ co coxtal, ix quicꞌxicot qꞌueen. ¿Tom ato val junoc plata ma oro yic vin̈ a patrón chiꞌ ol quelqꞌuejcot dꞌa spat? 9 A junoc on̈ bꞌaj scheclajelta qꞌuen copa chiꞌ dꞌa yol scoxtal, vachꞌ tato smiljichamoc, a on̈xo co masanil, tzon̈ ochcan a checabꞌoc, xchi ebꞌ vin̈.

10 Ix tacꞌvi vin̈ icha tic:

—Yicꞌocabꞌ icha tzeyal chiꞌ, palta an̈ej vin̈ bꞌaj ol ilchajelta jun copa chiꞌ vuuj, a vin̈ chiꞌ ol ochcan in checabꞌoc. A exxo tic, e masanil libre ex, xchi vin̈.

11 Dꞌa elan̈chamel ix yaqꞌuem scoxtal ebꞌ vin̈ chiꞌ smasanil, ix stijan stiꞌ ebꞌ vin̈. 12 Ix sayan yil masanil yoltac coxtal chiꞌ vin̈. Dꞌa stzolal ix say yil vin̈, ix sbꞌabꞌlaj sayej yil yic vin̈ bꞌabꞌel vinac vin̈ masanto dꞌa vin̈ tzacꞌan unin. Axo dꞌa yol yic vin̈ tzacꞌan unin chiꞌ ix qꞌueta qꞌuen copa chiꞌ, aton vin̈aj Benjamín. 13 Ix och ijan ebꞌ vin̈ sn̈icꞌchitan spichul yuj scuscꞌolal. Ix yacꞌanxioch yicatz nocꞌ sbꞌuru ebꞌ vin̈ chiꞌ, ix meltzajxi ebꞌ vin̈ dꞌa spatic. 14 Ayto ecꞌ vin̈aj José chiꞌ dꞌa spat, ix cꞌoch vin̈aj Judá yedꞌ ebꞌ yucꞌtac chiꞌ, ix em n̈ojan ebꞌ vin̈ dꞌa sat luum dꞌa yichan̈ vin̈. 15 Ix yalan vin̈ dꞌa ebꞌ vin̈ icha tic:

—¿Tas yuj icha chiꞌ tzeyutej e bꞌa? ¿Tom man̈ eyojtacoc to a junoc vinac ay yopisio icha in tic, syal snachajel junoc tas yuuj? xchi vin̈. 16 Ix tacꞌvi vin̈aj Judá icha tic:

—Mamin, ¿tasto val ol aj co tacꞌvi dꞌayach? ¿Tasto ol cutoc quilanoch co bꞌa tato vachꞌ on̈ calani? Ay co mul dꞌa yichan̈ co Mam Dios, tic ayon̈ ecꞌ dꞌa ichan̈. Syal tzon̈ och a checabꞌoc yedꞌ vin̈ bꞌaj ix ilchajelta qꞌuen copa chiꞌ, xchi vin̈.

17 Ix yalanxi vin̈aj José chiꞌ icha tic:

—Maay, an̈ej vin̈ bꞌaj ix ilchajelta qꞌuen in copa chiꞌ, an̈ej vin̈ scan in checabꞌoc. A exxo tic, meltzajan̈ec dꞌa juncꞌolal bꞌaj ay vin̈ e mam, xchi vin̈.

18 Ix snitz val bꞌat sbꞌa vin̈aj Judá dꞌa stzꞌey vin̈aj José chiꞌ, ix yalan vin̈:

—Mamin, tzoc el val dꞌa a cꞌool svalan dꞌayach tas in pensar. Tzin tevi dꞌayach, mocabꞌ cot oval dꞌayin, vachꞌchom icha ach vin̈ rey. 19 A ach val ix a cꞌanbꞌej dꞌayon̈ tato aytoecꞌ vin̈ co mam a on̈ tic, tato aytopax junocxo cucꞌtac. 20 Yuj chiꞌ, ix calan dꞌayach to aytoecꞌ vin̈ co mam, an̈ejto te icham vinacxo vin̈. A junxo vin̈ cucꞌtac tzacꞌan unin, dꞌa yicham vinaquilxo vin̈ co mam chiꞌ ix alji vin̈. Axo junxo vin̈ junn̈ej snun vin̈ yedꞌoc, chamnacxo vin̈, yuj chiꞌ te xajan vin̈ yuj vin̈ co mam chiꞌ, yujto axon̈ej vin̈. 21 A ach ix alaꞌ to squicꞌcot vin̈, yic tzojtaquejel vin̈. 22 Ix calan dꞌayach to max yal scꞌol vin̈ co mam chiꞌ tzꞌelta vin̈ dꞌa stzꞌey, yujto ijanxo scham vin̈ yuj cuscꞌolal yalani tato tzꞌel vin̈ dꞌa stzꞌey vin̈. 23 Palta ix alpax dꞌayon̈ tato max quicꞌcot vin̈, maxtzac yal co jax dꞌa ichan̈ alani.

24 Ayic ix on̈ cꞌoch dꞌa co pat chiꞌ, ix calan dꞌa vin̈ co mam chiꞌ tas ix aj alan dꞌayon̈. 25 Axo vin̈ ix alan dꞌayon̈ to tzon̈ cotxi manoj trigo. 26 Ix calan dꞌa vin̈ icha tic: Max on̈ bꞌatlaj tato max quicꞌbꞌat vin̈ cucꞌtac tzacꞌan unin tic, yujto tato max bꞌat vin̈ quedꞌoc, maxtzac yal-laj co cꞌoch dꞌa yichan̈ vin̈ yajal chiꞌ, xco chi. 27 Ix yalan vin̈ co mam chiꞌ dꞌayon̈: Eyojtac to chavan̈n̈ej vuninal ix vil yedꞌ ix vetbꞌeyum chamnac. 28 Jun vin̈ juneln̈ej bꞌatnaccani, man̈xa bꞌaj ix vil sat vin̈, ay am val junoc nocꞌ nocꞌ chium anima chiꞌannacbꞌat vin̈. 29 Tato tzeyicꞌxibꞌat junxo vin̈ tic, tato ay pax tas tzꞌicꞌan vin̈, eyuj am val tzin cham yuj cuscꞌolal, xchi vin̈ dꞌayon̈.

30 Yuj chiꞌ, icha val to sqꞌuinal vin̈ co mam chiꞌ yajoch vin̈ vucꞌtac tic. Tato man̈xo ol meltzaj vin̈ quedꞌoc 31 ol cham vin̈ co mam yuj cuscꞌolal, a on̈ tic tzꞌoch co mul. 32 A in ix in tecꞌbꞌej in bꞌa yuj vin̈ dꞌa vin̈ in mam chiꞌ, ix valani: Tato man̈xo ol jax vin̈ vuuj, te chuc tzin can dꞌa yol a sat dꞌa juneln̈ej, xin chi dꞌa vin̈ in mam chiꞌ. 33 Yuj val chiꞌ tzin tevi dꞌayach, tato syalaꞌ, a in tzin can sqꞌuexuloc vin̈ vucꞌtac tic a checabꞌoc. Yuj chiꞌ tzactejel vin̈, spax vin̈ yedꞌ ebꞌ vin̈ vucꞌtac tic. 34 Tato maay jun, ¿tasto val ol aj in bꞌat vil vin̈ in mam chiꞌ, tato man̈oc jun vin̈ vedꞌoc? Man̈ jabꞌoc syal in cꞌol svil scuscꞌolal vin̈ in mam tato icha chiꞌ tzuji, xchi vin̈aj Judá chiꞌ.