—Ixiquecxi dꞌa Egipto, bꞌat manec jabꞌocxo tas sco vaꞌa, xchi vin̈.

3 Ix yalan vin̈aj Judá icha tic:

—Te jichan ix yutej vin̈ schon̈an ixim trigo chiꞌ yalani: Tato max eyicꞌcot vin̈ eyucꞌtac tzacꞌan unin chiꞌ, man̈xo ol eyil in sat dꞌa tic, xchi vin̈. 4 Yuj val chiꞌ, tato sbꞌat vin̈ cucꞌtac tic quedꞌoc, tzon̈ bꞌat manoj trigo chiꞌ. 5 Tato max a chabꞌat vin̈ quedꞌ jun, man̈xo ol on̈ bꞌatlaj, icha ix aj yalan vin̈ chon̈um trigo chiꞌ: Tato max eyicꞌcot vin̈ eyucꞌtac tzacꞌan unin chiꞌ, man̈xo ex javoclaj dꞌa vichan̈, xchi vin̈.

6 Ix yalan vin̈aj Israel chiꞌ icha tic:

—¿Tas yuj ix eyal dꞌa jun vin̈ chiꞌ to ay junocxo eyucꞌtac? Tzin eyacꞌ val och dꞌa ilcꞌolal, xchi vin̈.

7 Ix tacꞌvi ebꞌ vin̈ icha tic:

—Ix scꞌanbꞌej vin̈ tastac caji, mach ayon̈ yin̈tilal. Ix scꞌanbꞌanpax vin̈ tato aytoecꞌ co mam, tato aytopax cucꞌtac. Yuj chiꞌ ix cal dꞌa vin̈ to aytoecꞌ co mam, aytopax junxo cucꞌtac. ¿Tocval cojtac tato ol yal vin̈ to squicꞌbꞌat vin̈ cucꞌtac tic? xchi ebꞌ vin̈.

8 Ix yalanxi vin̈aj Judá dꞌa vin̈ smam chiꞌ:

—Tato max yal a cꞌol tzon̈ cham yuj vejel co masanil, chabꞌat vin̈ cucꞌtac tic quedꞌoc. A in tzin tecꞌbꞌej in bꞌa in tan̈van vin̈, tato icha chiꞌ, tic tzon̈ bꞌat dꞌa elan̈chamel. 9 A in tzin tecꞌbꞌej in bꞌa tato ay tas tzꞌicꞌan vin̈, tato man̈xo ol ja vin̈ vuuj, te chuc ol in can dꞌa a sat. 10 Tato maj ecꞌ co tiempo dꞌa tic, toxo ix cacꞌ chaeloc naic, xchi vin̈.

11 Ix tacꞌvi vin̈ smam ebꞌ vin̈ chiꞌ icha tic:

—Tato man̈xa tas vachꞌ scutej, yicꞌocabꞌ icha tzeyal chiꞌ, ixiquec. Iqꞌuecbꞌat jabꞌoc e silabꞌ dꞌa vin̈. A juntzan̈ tas vachꞌ sqꞌuibꞌ dꞌa tic, aꞌ tzeyicꞌbꞌati: Aton bálsamo, nocꞌ yalchabꞌ, perfume, mirra, teꞌ nueces yedꞌ teꞌ almendras. 12 Iqꞌuecbꞌat e tumin yic tze manan ixim trigo chiꞌ, tzeyicꞌanxibꞌat qꞌuen tumin ix yacꞌ meltzaj ebꞌ vin̈ dꞌayex dꞌa stiꞌ e coxtal chiꞌ, tecan ton̈ej ix sat scꞌol ebꞌ vin̈, yuj chiꞌ ayem qꞌueen. 13 Iqꞌuecbꞌat vin̈ eyucꞌtac tic, tzex bꞌatxi eyil vin̈ yajal chiꞌ. 14 A Dios Syal Yuj Smasanil, aꞌ ol och dꞌa spensar vin̈ yic ol actajel vin̈ eyucꞌtac aj Simeón. Vachꞌ ol aj smeltzajcot vin̈aj Benjamín tic eyedꞌoc. A inxo tic, tato tzin can man̈ uninal, in canocabꞌi, ¿tasto val ol vutej? xchi vin̈ smam ebꞌ vin̈ chiꞌ.

15 Ix lajvi chiꞌ, ix yacꞌanem silabꞌ ebꞌ vin̈ chiꞌ dꞌa yol scoxtal yedꞌ qꞌuen tumin. Ix yicꞌanbꞌat vin̈aj Benjamín ebꞌ vin̈, ix bꞌatxi ebꞌ vin̈ dꞌa Egipto chiꞌ. Axo yic ix cꞌoch ebꞌ vin̈ dꞌa yichan̈ vin̈aj José, 16 ix yilan vin̈ to ajun vin̈aj Benjamín chiꞌ. Ix yalan vin̈ dꞌa vin̈ yilumal spat icha tic:

—Icꞌbꞌat juntzan̈ ebꞌ vin̈ tic dꞌa in pat, tzacꞌan miljoccham junoc nocꞌ vacax, yic sbꞌo junoc vael, to ol va ebꞌ vin̈ vedꞌoc dꞌa chimcꞌualil tic, xchi vin̈aj José chiꞌ.

17 Ix lajvi chiꞌ, ix icꞌjibꞌat ebꞌ vin̈ yuj vin̈ ilum pat chiꞌ, ix scꞌanabꞌajan vin̈ tas ix yal vin̈aj José chiꞌ. 18 Ix te xiv chaan̈ ebꞌ vin̈ yujto ix icꞌchajbꞌat ebꞌ vin̈ dꞌa spat vin̈, ix yal-lan yabꞌ ebꞌ vin̈ icha tic:

—Chuc tas sna vin̈ dꞌa quibꞌan̈. Tecan yuj qꞌuen tumin ix yacꞌ meltzaj ebꞌ vin̈ dꞌayon̈, yuj chiꞌ tzon̈ icꞌchajcot dꞌa tic. Tecan ol on̈ yacꞌoch vin̈ schecabꞌoc yedꞌ nocꞌ co chej tic, xchi ebꞌ vin̈.

19 Yuj chiꞌ, ayic ix cꞌoch ebꞌ vin̈ dꞌa spuertail pat chiꞌ, ix och tean ebꞌ vin̈ dꞌa vin̈ yilumal teꞌ chiꞌ. 20 Ix yalan ebꞌ vin̈ icha tic:

—Mamin, ina a on̈ tic, ix on̈ ulecꞌ manoj trigo junel, 21 axo yic ix on̈ meltzaji, ix on̈ vay dꞌa yol bꞌe. Ayic ix co jacan co coxtal, ix quilani tzꞌacan yajem qꞌuen tumin dꞌa stiꞌ co coxtal chiꞌ, aton qꞌuen ix co cꞌanaꞌ ayic ix co manan ixim co trigo. Ix quicꞌanxi meltzaj qꞌuen tumin chiꞌ ticnaic, tzꞌacan ol cutej cacꞌanxi qꞌuen dꞌayach. 22 Man̈ cojtacoc mach ix acꞌanem qꞌuen dꞌa yol stiꞌ co coxtal chiꞌ. Chꞌoc ix quicꞌpaxcot qꞌuen stojol ixim ol co man chiꞌ ticnaic, xchi ebꞌ vin̈.

23 Ix yalan vin̈ chiꞌ icha tic:

—Man̈ eyacꞌ pensar yuj jun chiꞌ. Man̈ ex xivoc. A sDiosal e mam yedꞌ ex paxi, a ix acꞌanem qꞌuen dꞌa stiꞌ e coxtal chiꞌ. A in ix in cha qꞌuen tumin ix eyacꞌ stojoloc ixim e trigo ix eyicꞌ chiꞌ, xchi vin̈ dꞌa ebꞌ vin̈.

Ix lajvi chiꞌ, ix icꞌjielta vin̈aj Simeón dꞌa yol preso yuj vin̈ yilumal chiꞌ, ix elul vin̈ bꞌaj ayecꞌ ebꞌ yucꞌtac chiꞌ. 24 Ix icꞌchajbꞌat ebꞌ vin̈ smasanil yuj vin̈ dꞌa spat vin̈aj José chiꞌ, ix yacꞌan a aꞌ vin̈ yic sbꞌiquel yoc ebꞌ vin̈, ix acꞌjipax yan̈ schej ebꞌ vin̈. 25 Ix lajvi chiꞌ, ix yicꞌanqꞌueta silabꞌ ebꞌ vin̈ dꞌa yol scoxtal ol yacꞌ dꞌa vin̈aj José ayic ol cꞌoch vin̈ dꞌa chimcꞌualil chiꞌ, yujto yojtacxo ebꞌ vin̈ to ol va ebꞌ vin̈ yedꞌ vin̈.

26 Axo ix cꞌoch vin̈aj José chiꞌ, ix yacꞌan silabꞌ ebꞌ vin̈ chiꞌ dꞌa vin̈, ix em n̈ojjabꞌ ebꞌ vin̈ dꞌa sat lum dꞌa yichan̈ vin̈. 27 Ix lajvi chiꞌ ix scꞌanbꞌan vin̈ dꞌa ebꞌ vin̈ tato vachꞌn̈ej scꞌol ebꞌ vin̈, ix yalan vin̈:

—¿Janicꞌ scꞌol vin̈ e mam, vin̈ te ichamxo ix eyal dꞌayin? ¿Pitzan tom vin̈? xchi vin̈ dꞌa ebꞌ vin̈.

28 Ix em n̈ojan ebꞌ vin̈, ix yalan ebꞌ vin̈:

—A vin̈ co mam chiꞌ, aytoecꞌ vin̈, vachꞌto scꞌol vin̈, xchi ebꞌ vin̈.

29 Axo ix yilanoch vin̈aj Benjamín vin̈, aton vin̈ junn̈ej snun vin̈ yedꞌoc, ix yalan vin̈:

—¿A am vin̈ eyucꞌtac tzacꞌan unin ix eyal tic dꞌayin? xchi vin̈.

—Aton vin̈, xchi ebꞌ vin̈.

—Yacꞌocabꞌ svachꞌcꞌolal Dios dꞌa ibꞌan̈, xchi vin̈ dꞌa vin̈aj Benjamín chiꞌ.

30 Ix lajvi yalan jun chiꞌ vin̈, ix te sat val scꞌol vin̈ yilan vin̈ yucꞌtac chiꞌ. Ix och pitzꞌan dꞌa spixan vin̈, ijan val ix ocꞌ vin̈. Elan̈chamel ix bꞌat lemnaj vin̈ dꞌa yol scuarto yic sbꞌat ocꞌ taꞌ. 31 Axo yic ix ecꞌbꞌat scuscꞌolal vin̈ chiꞌ, ix sbꞌicanel sat vin̈, ix elta vin̈, ix yalan vin̈ dꞌa ebꞌ schecabꞌ: Iqꞌuequelta co vael chiꞌ chinaic, xchi vin̈.

32 Jun smexa vin̈aj José chiꞌ schꞌocojil. Chꞌoc junxo mexa bꞌaj ix och ebꞌ vin̈ yucꞌtac vin̈ chiꞌ, chꞌoc pax junxo mexa bꞌaj sva ebꞌ vin̈ aj Egipto chiꞌ, aton ebꞌ svataxon yedꞌ vin̈aj José chiꞌ, yujto a ebꞌ vin̈ aj Egipto chiꞌ ay yovalil tato junn̈ej sva ebꞌ vin̈ yedꞌ ebꞌ vin̈ hebreo chiꞌ. 33 A ebꞌ vin̈ yucꞌtac vin̈aj José chiꞌ, dꞌa stzolal ix aj yacꞌjiem cꞌojan ebꞌ vin̈ yuj vin̈ schecabꞌ vin̈aj José chiꞌ, ato syalaꞌ jantac sqꞌuinal junjun ebꞌ vin̈, yujto icha chiꞌ ix aj yalan vin̈aj José chiꞌ. Vin̈ bꞌabꞌel masanto vin̈ tzacꞌan unin. Toxon̈ej ste sat scꞌol ebꞌ vin̈ yil-lanoch sbꞌa. 34 A vael ay dꞌa smexa vin̈aj José chiꞌ, aꞌ ix acꞌji dꞌa ebꞌ vin̈. Axo pax dꞌa vin̈aj Benjamín chiꞌ, oyeꞌto macan̈ ecꞌbꞌal yic vin̈ ix acꞌji dꞌa yichan̈ yic juntzan̈xo ebꞌ vin̈ chiꞌ. Ichato chiꞌ ix va ebꞌ vin̈, ix yucꞌan vino ebꞌ vin̈ dꞌa tzalajcꞌolal.