3 Yuj chiꞌ, ix bꞌat lajun̈van̈ yucꞌtac vin̈aj José manoj trigo dꞌa Egipto chiꞌ. 4 Axo vin̈aj Benjamín, yucꞌtac vin̈aj José chiꞌ, maj chajibꞌatlaj vin̈ yuj vin̈aj Jacob chiꞌ, yujto ix snaꞌ vin̈: Ay talaj tas tzꞌicꞌan vin̈ vuninal tic, xchi vin̈. 5 Tzijtum juntzan̈xo ebꞌ vin̈ manum trigo ix bꞌat yedꞌ ebꞌ vin̈ yuninal vin̈aj Israel chiꞌ, yujto dꞌa masanil yol yic Canaán chiꞌ, ix te em vejel.

6 A vin̈aj José yajal yaj dꞌa yol yic Egipto chiꞌ, a vin̈ tzꞌacꞌanelta ixim trigo dꞌa ebꞌ manvajum scꞌoch chiꞌ. Ayic ix cꞌoch ebꞌ yucꞌtac vin̈ chiꞌ dꞌa yichan̈, ix em n̈ojjabꞌ ebꞌ vin̈ dꞌa sat luum. 7 Dꞌa jun rato chi, ix yiloch ebꞌ yucꞌtac vin̈aj José chiꞌ, palta axo ix yutej sbꞌa vin̈ ichato man̈ yojtacoc vin̈, ov ix yutej vin̈ slolon dꞌa ebꞌ vin̈:

—¿Bꞌajtil ix ex cot a ex tic? xchi vin̈.

—Aj Canaán on̈, to tzon̈ javi manoj trigo, xchi ebꞌ vin̈.

8 Vachꞌchom a vin̈aj José chiꞌ yojtac vin̈ to yucꞌtac sbꞌa vin̈ yedꞌ ebꞌ vin̈, axo pax ebꞌ vin̈ jun, maj nachajel-laj yuj ebꞌ vin̈. 9 Ichato chiꞌ ix snaancot vin̈aj José tas ix svayichej dꞌa yibꞌan̈ ebꞌ vin̈ dꞌa yalan̈taxo. Ix yalan vin̈:

—A ex tic ton̈ej tzul on̈ eyileli, ton̈ej tzex javi eyilaꞌ tato ay bꞌaj syal yochul ebꞌ ajcꞌol dꞌa yol jun chon̈abꞌ tic, xchi vin̈.

10 —Maay mamin, a on̈ a checabꞌ on̈ tic, manoj trigon̈ej tzon̈ javi. 11 A on̈ tic junn̈ej co mam, cucꞌtacn̈ej co bꞌa, vachꞌn̈ej co pensar, malaj bꞌaj ton̈ej tzecꞌ quileli, xchi ebꞌ vin̈.

12 —Val yel a ex tic ton̈ej tzex ja eyilbꞌati ta secojtac tzꞌochul ebꞌ ajcꞌol dꞌa tic, xchi vin̈.

13 Ix tacꞌvi ebꞌ vin̈ icha tic:

—Maay mamin, a on̈ a checabꞌ on̈ tic, lajchavan̈ on̈, cucꞌtacn̈ej co bꞌa, junn̈ej co mam, cajan on̈ dꞌa Canaán. A vin̈ cucꞌtac tzacꞌan unin, aycan vin̈ yedꞌ vin̈ co mam chiꞌ, ay junxo vin̈, man̈xo ayoc ecꞌlaj vin̈, xchi ebꞌ.

14 —Val yel svalaꞌ, a ex tic ton̈ej tzex ja eyileli tas yaj dꞌa tic. 15 Ol to yal sbꞌa tas ol aj jun tic: Tzin loc sbꞌi vin̈ rey to man̈ ol ex actajeloc tato man̈ ol eyicꞌcot vin̈ eyucꞌtac tzacꞌan unin chiꞌ. 16 A ticnaic tzex bꞌat junoc ex eyicꞌ vin̈, a exxo tic ol ex cann̈ej preso dꞌa tic, yic vachꞌ squilaꞌ tato yel tzeyalaꞌ. Tato ton̈ej tzeyalaꞌ, toxo ix in loc sbꞌi vin̈ rey to ton̈ej tzul on̈ eyileli, xchi vin̈aj José chi.

17-18 Ix och ebꞌ vin̈ preso yuj vin̈. Ato dꞌa schabꞌjial chiꞌ ix yalan vin̈aj José chiꞌ dꞌa ebꞌ vin̈ icha tic:

—A in tic tzin xiv dꞌa Dios. Tato tze cꞌanabꞌajej jun tas sval tic, tzex colchajcani. 19 Tato yel vachꞌ ex, junxon̈ej ex tzex can dꞌa yol preso tic, tzex bꞌat e masanil dꞌa e chon̈abꞌ chiꞌ, tzeyicꞌanbꞌat ixim trigo sva ebꞌ ix eyetbꞌeyum yedꞌ eyuninal van scham yuj vejel chiꞌ. 20 Slajvi chiꞌ, tzeyicꞌancot vin̈ eyucꞌtac tzacꞌan unin chiꞌ. Ichato chiꞌ ol vilani tato yel tzeyalaꞌ, man̈ ol ex chamlaj, xchi vin̈aj José chiꞌ.

Ichocabꞌ taꞌ, xchi ebꞌ vin̈. 21 Ix yalan ebꞌ vin̈ dꞌay junjun icha tic:

—A yuj tas cutejnac vin̈ cucꞌtac, yuj chiꞌ sja jun yaelal tic dꞌa quibꞌan̈. Val yel te chuc cutejnac co bꞌa dꞌa vin̈, man̈ co chanacoc cabꞌi ayic stevinac vin̈ dꞌayon̈ to tzꞌocꞌ co cꞌol dꞌa vin̈, vachꞌchom quilnac to te cusnac vin̈, xchi ebꞌ vin̈.

22 Ix yalanpax vin̈aj Rubén dꞌa ebꞌ vin̈ yucꞌtac chiꞌ icha tic:

—Valnac dꞌayex to max eyutej e bꞌa dꞌa vin̈ icha chiꞌ, palta man̈ e chanacoc eyabꞌi tas valnac chiꞌ. A ticnaic, tic val scot dꞌa quibꞌan̈ yuj schamel vin̈, xchi vin̈.

23 Maj nachajel yuj ebꞌ vin̈ tato van yabꞌan vin̈aj José tas syal ebꞌ vin̈ chiꞌ, yujto dꞌa stiꞌ ebꞌ aj Egipto slolon vin̈, an̈ej to ay junoc mach tzꞌalaneli tas syal vin̈. 24 Ix el vin̈aj José chiꞌ dꞌa stzꞌey ebꞌ vin̈, ix och ijan vin̈ yoqꞌui. Ix jax vin̈, ix lolonxi vin̈ yedꞌ ebꞌ vin̈. Ix yicꞌanel vin̈aj Simeón vin̈, dꞌa yichan̈ ebꞌ vin̈ ix tzecꞌchajcan vin̈. 25 Ix lajvi chiꞌ, ix yalan vin̈aj José chiꞌ to tzꞌacꞌji bꞌudꞌjoc scoxtal ebꞌ vin̈, ix acꞌjiem qꞌuen stumin ebꞌ vin̈ dꞌa yol stiꞌ scoxtal chiꞌ, ix acꞌjibꞌat svael ebꞌ vin̈ yic yol sbꞌe. Icha chiꞌ ix scꞌulej vin̈ yedꞌ ebꞌ vin̈. 26 Ix lajvi chiꞌ, ix yacꞌanoch yicatz nocꞌ sbꞌuru ebꞌ vin̈, ix paxta ebꞌ vin̈ bꞌian.

27 Axo ix cꞌoch ebꞌ vin̈ bꞌaj ol vayoc, ix sjacan scoxtal junoc ebꞌ vin̈ yic syicꞌanqꞌueta chabꞌoc strigo nocꞌ sbꞌuru vin̈ chiꞌ yalani. Axo ix yilan vin̈ to ayem qꞌuen tumin dꞌa yol stiꞌ scoxtal, qꞌuen ix yacꞌlabꞌej ebꞌ vin̈ smanan ixim strigo chiꞌ. 28 Ix yalan vin̈ dꞌa ebꞌ vin̈ yucꞌtac chiꞌ icha tic:

—Ilecnabꞌi, ix acꞌjixi meltzaj qꞌuen in tumin. Ay val em qꞌuen dꞌa yol stiꞌ in coxtal tic, xchi vin̈.

Masanil ebꞌ vin̈ ix ibꞌxiqꞌue yuj xivelal, ix yalan ebꞌ vin̈ icha tic:

—¿Tas yuj icha tic tzon̈ yutej Dios? xchi ebꞌ vin̈.

29 Axo yic ix jax ebꞌ vin̈ dꞌa yol yic Canaán chiꞌ, ix yalan ebꞌ vin̈ dꞌa vin̈ smam tastac ix ecꞌ dꞌa yibꞌan̈. Ix yalan ebꞌ vin̈ icha tic:

30 —A vin̈ ayoch yajalil dꞌa jun chon̈abꞌ chiꞌ, te ov ix yutej vin̈ slolon dꞌayon̈. Ix yalan vin̈ to ton̈ej on̈ xidꞌ quilelta tas yaj schon̈abꞌ chiꞌ. 31 Ix calani to vachꞌ on̈, man̈ chucoc co pensar tzon̈ eqꞌui, malaj bꞌaj ton̈ej tzecꞌ quilel tas yaj ebꞌ. 32 Ix calani to lajchavan̈ co bꞌeyi, junn̈ej co mam, jun vin̈ cucꞌtac man̈xo ayoquecꞌlaj, axo vin̈ tzacꞌan unin, aycan vin̈ yedꞌ vin̈ co mam dꞌa Canaán, xco chi dꞌa vin̈. 33 Ix lajvi chiꞌ, ix yalan vin̈ icha tic: Tato yel vachꞌ ex, canocabꞌ junoc vin̈ eyucꞌtac dꞌa tic, tzeyicꞌanbꞌat jabꞌoc ixim trigo dꞌa ebꞌ ix eyetbꞌeyum yedꞌ dꞌa eyuninal van scham yuj vejel chiꞌ. 34 Slajvi chiꞌ, tzeyicꞌancot junxo vin̈ eyucꞌtac tzacꞌan unin chiꞌ vil dꞌa tic. Ichato chiꞌ ol vojtacaneli to man̈ chucoc e pensar syal chiꞌ. Masanto sjavi junxo vin̈ eyucꞌtac tzacꞌan unin chiꞌ, ol in jacanelta vin̈ eyucꞌtac ix can dꞌa preso tic, yic icha chiꞌ libre ex e bꞌeyeqꞌui, xchi vin̈, xchi ebꞌ vin̈.

35 Axo ix sjacan scoxtal ebꞌ vin̈ chiꞌ, ix yilan ebꞌ vin̈ to ayem junjun yunetac mucuc tumin yol stiꞌ coxtal chiꞌ, aton qꞌuen tumin chiꞌ ix yacꞌlabꞌej ebꞌ vin̈ smanan ixim trigo. Ix acꞌchajxi meltzaj qꞌueen. Ix te xiv chaan̈ ebꞌ vin̈, ix te xivpax vin̈ smam ebꞌ vin̈ chi. 36 Ix lajvi chiꞌ ix yalan vin̈ dꞌa ebꞌ vin̈ icha tic:

—Te chuc tzeyutej e bꞌa dꞌayin. Man̈xo junoc vuninal scan eyuuj. Vin̈aj José, man̈xo ayoquecꞌlaj vin̈, vin̈aj Simeón, ix can vin̈ dꞌa preso, e gana tzeyicꞌpaxbꞌat vin̈aj Benjamín. A mach tzꞌabꞌan syail, a in toni, xchi vin̈.

37 Ix yalan vin̈aj Rubén dꞌa vin̈ smam chiꞌ icha tic:

—Man̈ ach xiv mamin. Acꞌbꞌat vin̈ cucꞌtac tzacꞌan unin tic quedꞌoc. A in svacꞌ in bꞌa yuj vin̈, tato man̈xo ol jax vin̈ vuuj, vachꞌchom tza macꞌcham chavan̈ vuninal tic yuj vin̈, xchi vin̈.

38 Ix tacꞌvi vin̈aj Jacob chiꞌ icha tic:

—Man̈ ol bꞌatlaj vin̈ vuninal tic eyedꞌoc, axon̈ej vin̈ ayecꞌ vedꞌoc. Ina vin̈ yucꞌtac vin̈, chamnacxo vin̈, talaj ay tas tzꞌicꞌanpax junxo vin̈ tic dꞌa yol bꞌe, tic a ex val tzeyacꞌoch e mul yic tzin cham yuj cuselal, xchi vin̈aj Jacob chiꞌ.