Ix yal vin̈aj José tas syalelcꞌoch chabꞌ vayich
40
Ix lajvi chiꞌ, ay chavan̈ vinac ix och preso: A jun vin̈, yajal yaj vin̈ dꞌa ebꞌ vin̈ tzꞌacꞌan svino vin̈ rey, axo junxo vin̈, yajal yaj vin̈ dꞌa ebꞌ vin̈ bꞌoum pan sva vin̈ rey chiꞌ. Ay smul ebꞌ vin̈ ix och dꞌa vin̈ rey chiꞌ. 2 Yuj chiꞌ ix cot yoval vin̈ dꞌa ebꞌ vin̈. 3 Ix yalan vin̈ rey to tzꞌacꞌjioch ebꞌ vin̈ dꞌa preso dꞌa spat vin̈ yajal dꞌa ebꞌ soldado stan̈van vin̈, aton taꞌ aypaxoch vin̈aj José dꞌa preso. 4 An̈ejaꞌ dꞌa yol scꞌabꞌ vin̈aj José chiꞌ ix can ebꞌ vin̈ chavan̈ smunlajvum vin̈ rey chiꞌ yuj vin̈ yajal preso chiꞌ yic a vin̈ tzꞌacꞌan servil ebꞌ vin̈. Ix can ebꞌ vin̈ jun tiempoal dꞌa preso chiꞌ.5 Axo dꞌa jun acꞌval ix och svayich ebꞌ vin̈ chavan̈ chiꞌ, junjun vayich chiꞌ ay syalelcꞌochi. 6 Axo ix sacbꞌi ix cꞌoch vin̈aj José yil ebꞌ vin̈. Ix yilan vin̈ to te ayoch ebꞌ vin̈ dꞌa ilcꞌolal. 7 Ix scꞌanbꞌan vin̈ dꞌa ebꞌ vin̈:
—¿Tas yuj te cuseltac yilji e sat? xchi vin̈ dꞌa ebꞌ vin̈.
8 —Ay val co vayich ix och dꞌa jun acꞌval tic, palta malaj mach dꞌa tic tzꞌalan dꞌayon̈ tas syalelcꞌochi, xchi ebꞌ vin̈.
—¿Tom man̈oc Dios syal yalani tas syalelcꞌoch vayich? Alec dꞌayin tas ix e vayichej chiꞌ, xchi vin̈aj José chiꞌ.
9 Yuj chiꞌ a vin̈ yajal yaj dꞌa ebꞌ vin̈ tzꞌacꞌan svino vin̈ rey, ix och ijan vin̈ yalan svayich chiꞌ dꞌa vin̈aj José icha tic:
—A dꞌa in vayich, ix vil jun teꞌ uva, 10 ay oxeꞌ scꞌabꞌ teꞌ. Ix vil sqꞌueta svol, ix yacꞌan xumaquil, axo xumaquil chiꞌ, ix och bꞌuyan sat, te qꞌuin̈xo. 11 A ix vilani to yambꞌilqꞌue scopa vin̈ rey vuuj, ix vicꞌancot sat teꞌ uva chiꞌ, ix in pitzꞌanem yal dꞌa yol scopa vin̈ rey chiꞌ, ix vacꞌanoch dꞌa yol scꞌabꞌ vin̈, xchi vin̈.
12 Ix yalan vin̈aj José dꞌa vin̈ icha tic:
—Ichaton tic syalelcꞌoch a vayich chiꞌ: A oxeꞌ scꞌabꞌ teꞌ uva ix il chiꞌ, oxeꞌ cꞌual syalaꞌ. 13 Ayic chabꞌej ticnaic ol sbꞌeycꞌolej a mul vin̈ rey chiꞌ. Ol lajvoc chiꞌ ol ach yacꞌanxioch vin̈ dꞌa a munlajel, ol acꞌxi scopa vin̈ chiꞌ icha dꞌa yalan̈taxo. 14 Ayic ol elcꞌoch jun sval tic, tzin a naancot dꞌa vin̈ rey chiꞌ, yic vachꞌ tzin elpax dꞌa yol preso tic. Ocꞌocabꞌ a cꞌol dꞌayin. 15 A in tic ichato elcꞌabꞌil in cot dꞌa scal ebꞌ vin̈ hebreo. Man̈ in mojoc ay in och dꞌa preso tic, yujto malaj jabꞌoc tas chuc ix in cꞌulej, xchi vin̈aj José chiꞌ.
16 Ayic ix yabꞌan vin̈ yajalil ebꞌ vin̈ sbꞌoan ixim pan to a vin̈aj José vachꞌ ix aj yalanel svayich vin̈ chiꞌ vin̈, ix yalanpax vin̈ icha tic:
—A in tic ix in vayichej to ayqꞌue oxeꞌ mooch ixim pan dꞌa in jolom. 17 A dꞌa yol jun yuneꞌ mooch dꞌa jun yoxil ayqꞌue dꞌa in jolom chiꞌ, tzijtum macan̈il ixim pan ayem dꞌa yool yic sva vin̈ rey, palta axo nocꞌ much ix javi ix stzocꞌanqꞌueta ixim nocꞌ dꞌa yol teꞌ mooch chiꞌ, xchi vin̈.
18 Ix yalanxi vin̈aj José dꞌa vin̈ icha tic:
—A tas syalelcꞌoch a vayich chiꞌ, aton tic: A oxeꞌ mooch chiꞌ schꞌoxcot oxeꞌ cꞌual. 19 Yuj chiꞌ yic chabꞌej ticnaic, ol sbꞌeycꞌolej vin̈ rey tas yaj a mul. Slajvi chiꞌ ol schecan vin̈ icꞌchajel a jolom, a a nivanil ol acꞌjocqꞌue dꞌa schon jun te teꞌ, axo nocꞌ ostoc ol ja schibꞌat a nivanil chiꞌ, xchi vin̈aj José chiꞌ dꞌa vin̈.
20 Schabꞌjial val yalan svayich ebꞌ vin̈ chavan̈ chiꞌ vin̈aj José chiꞌ, ix yacꞌan sqꞌuin̈al yabꞌilal vin̈ rey. Ix yavtancot vin̈ masanil ebꞌ vin̈ nivac vinac ayoch yajalil yedꞌoc. Dꞌa yichan̈ ebꞌ vin̈ nivac yajal chiꞌ ix checji icꞌchajelta ebꞌ vin̈ chavan̈ ayoch dꞌa preso chiꞌ. 21 A vin̈ tzꞌacꞌan svino vin̈ rey, ix acꞌchajxioch vin̈ dꞌa smunlajel. 22 Axo vin̈ yajal yaj dꞌa ebꞌ sbꞌoan ixim pan, ix yal vin̈ rey to smiljicham vin̈ icha val ix aj yalan vin̈aj José. 23 Palta majxo nachajcot vin̈aj José yuj vin̈ tzꞌacꞌan svino vin̈ rey chiꞌ.