Yabꞌixal vin̈aj José yedꞌ ix yetbꞌeyum vin̈aj Potifar
39
Ayic ix cꞌoch vin̈aj José yuj ebꞌ vin̈ ismaelita dꞌa Egipto chiꞌ, ay jun vin̈ scuch Potifar ix mananel vin̈. A jun vin̈ chiꞌ, nivan yopisio vin̈ dꞌa vin̈ sreyal Egipto, yajal yaj vin̈ dꞌa ebꞌ soldado stan̈van vin̈ rey chiꞌ. 2 A Jehová ayoch yedꞌ vin̈aj José chiꞌ, te vachꞌn̈ej yajecꞌ vin̈ dꞌa spat vin̈ spatrón chiꞌ. 3 Ix nachajel yuj vin̈ spatrón vin̈ chiꞌ to ay val och Jehová yedꞌ vin̈, vachꞌn̈ej tzꞌelcꞌoch vin̈ dꞌa smasanil. 4 Yuj chiꞌ, te vachꞌn̈ej vin̈aj José dꞌa yichan̈ vin̈ spatrón chiꞌ. Ix yacꞌoch vin̈ vin̈ stan̈vumaloc spat yedꞌ masanil tastac ay dꞌay. 5 Yictax ix yacꞌanoch vin̈ vin̈aj Potifar chiꞌ stan̈vumaloc spat chiꞌ, ix yacꞌ svachꞌcꞌolal Jehová dꞌa yibꞌan̈ vin̈aj Potifar chiꞌ yedꞌ masanil tas ay dꞌa vin̈. Yujn̈ej vin̈aj José chiꞌ ix qꞌuechaan̈ svachꞌcꞌolal dꞌa spat vin̈ yedꞌ dꞌa najateli. 6 Ix cann̈ej vin̈aj José chiꞌ stan̈vumaloc smasanil, yuj chiꞌ man̈xalaj tas ix snaꞌ vin̈aj Potifar chiꞌ, palta an̈ej tas tzꞌaj sbꞌo svael vin̈ syilaꞌ.Te vachꞌ yilji vin̈aj José chiꞌ, te vachꞌ pax snivanil vin̈ smasanil. 7 Ix ecꞌ jabꞌoc tiempoal, axo ix yetbꞌeyum vin̈aj Potifar chiꞌ, ix te can sgana ix dꞌa vin̈aj José chiꞌ. Ix yalan ix dꞌa vin̈ icha tic:
—Octom val syal a cꞌool tzach vay vedꞌoc, xchi ix.
8 Te maj schalaj scꞌol vin̈aj José tas ix yal ix chiꞌ. Ix yalan vin̈ icha tic:
—Maay, ojtac ach tic to ix in yacꞌoch vin̈ etbꞌeyum stan̈vumaloc masanil stastac dꞌa tic. Ina man̈xo jabꞌoc tas snaꞌ vin̈ yuj masanil stastac yacbꞌan ay in eqꞌui. 9 Malaj junocxo mach nivan yelcꞌoch dꞌa vichan̈ dꞌa jun pat tic. Masanil tastac ayoch dꞌa yol in cꞌabꞌ, an̈ej dꞌayach a ach tic, max yal-laj vacꞌanoch in cꞌabꞌ, yujto yetbꞌeyum ach vin̈ in patrón, ¿tom ol yal in cꞌulan jun nivan chucal, yic tzꞌoch in mul dꞌa sat Dios? xchi vin̈.
10 Ix ochn̈ej ijan ix stevioch dꞌa vin̈. Junjun cꞌu syal ix to svay vin̈ yedꞌ ix, palta juneln̈ej max ochlaj dꞌa scꞌol vin̈ svay yedꞌ ix, max yalpaxlaj scꞌol vin̈ scꞌoch bꞌaj ayecꞌ ix. 11 Ay jun cꞌu ix och vin̈aj José chiꞌ dꞌa yol pat yic smunlaji, malaj junocxo mach ayeqꞌui, an̈ej ix. 12 Axo taꞌ ix och tzuctzuc ix dꞌa spichul vin̈, ix yalan ix icha tic:
—Vayan̈ vedꞌoc, xchi ix.
Axo ix yabꞌan jun chiꞌ vin̈, ix spichꞌanel sbꞌa vin̈ dꞌa yol scꞌabꞌ ix. Ix elta lemnaj vin̈ dꞌa ti pat, axo spichul vin̈ ix can dꞌa yol scꞌabꞌ ix. 13 Ayic ix yilan ix to ix el lemnaj vin̈, ix can spichul vin̈ dꞌa yol scꞌabꞌ ix, 14 ix el yav ix, ix yavtancot ebꞌ munlajvum ix dꞌa slacꞌanil pat chiꞌ, ix yalan ix:
—Ilec val jun vin̈ hebreo ix yicꞌcot vin̈ vetbꞌeyum tic. A vin̈ tic, snibꞌej vin̈ tzin yixtej. Ix ochul lemnaj vin̈ dꞌa yol pat tic, snibꞌej vin̈ svay vedꞌoc, palta chaan̈ ix el vav. 15 Ayic ix yabꞌan vin̈ yel vav chiꞌ, ix el lemnaj vin̈, axon̈ej spichul vin̈ ix cani, xchi ix.
16 Ix sicꞌancan jun spichul vin̈ chiꞌ ix masanto ix jax vin̈ spatrón vin̈ chiꞌ dꞌa spat. 17 Ix yalan ix icha ix aj yalan dꞌa sbꞌabꞌelal chiꞌ:
—A vin̈ hebreo ix icꞌcot checabꞌoc tic, ix ochul vin̈ dꞌa yol in cuarto, sgana vin̈ ix vay vedꞌoc. 18 Palta te chaan̈ ix el vav, yuj chiꞌ ix el lemnaj vin̈, axon̈ej spichul vin̈ ix yactejcan dꞌa tic. 19 Icha val chiꞌ ix in yutej jun vin̈ a checabꞌ tic, xchi ix. Axo vin̈ spatrón vin̈aj José chiꞌ, ix te cot yoval vin̈ sicꞌlabꞌil ayic ix yabꞌan vin̈ tas ix yal ix yetbꞌeyum chiꞌ. 20 Ix schecan yamjoc vin̈aj José chiꞌ vin̈, ix yalan vin̈ to tzꞌoch vin̈ dꞌa preso bꞌaj ayoch juntzan̈ ebꞌ vin̈ dꞌa preso yuj vin̈ rey. 21 Palta ayn̈ejoch Jehová yedꞌ vin̈aj José chiꞌ, ix schꞌoxn̈ej svachꞌcꞌolal dꞌa vin̈. Yuj chiꞌ te vachꞌ ix elcꞌoch vin̈ dꞌa yol sat vin̈ tan̈vum preso chiꞌ. 22 Axo vin̈ tan̈vum preso chiꞌ ix acꞌanoch vin̈ stan̈vumaloc ebꞌ yetpresovumal chiꞌ. Ix acꞌjipaxoch vin̈ yilumaloc tastac ix sbꞌo ebꞌ dꞌa preso chiꞌ. 23 A vin̈ stan̈vumal preso chiꞌ, man̈xalaj tas sna vin̈, masanil tas aycanoch dꞌa yol scꞌabꞌ vin̈aj José chiꞌ yuj vin̈. Yujto ayn̈ejoch Jehová yedꞌ vin̈, yuj chiꞌ vachꞌn̈ej ix elcꞌoch smasanil.