6 Axo yic ix quelemax vin̈aj Er bꞌabꞌel unin chiꞌ, ix sayji yetbꞌeyum vin̈ yuj vin̈aj Judá chiꞌ, ix yicꞌan ix Tamar vin̈. 7 Te chuc ix yutej sbꞌa vin̈aj Er chiꞌ dꞌa yichan̈ Jehová, yuj chiꞌ ix cham vin̈ yuuj. 8 Ix lajvi chiꞌ ix yalan vin̈aj Judá dꞌa vin̈aj Onán icha tic:

—Icꞌlaj a bꞌa yedꞌ ix yetbꞌeyum vin̈ ucꞌtac chamnac, tza cꞌanabꞌajej co ley, ichato yin̈tilal vin̈ ucꞌtac chiꞌ ol elcan uuj yedꞌ ix, xchi vin̈aj Judá chiꞌ.

9 Palta yojtac vin̈aj Onán chiꞌ to a unin ol aljoc chiꞌ, man̈ yicoc vin̈ ol aj yedꞌ ix smuꞌ chiꞌ, yuj chiꞌ juntac el svay vin̈ yedꞌ ix, axo yin̈atil vin̈ syacꞌcanem vin̈ dꞌa sat luum yic max och ix yabꞌixal, yic vachꞌ max elcanlaj yin̈tilal vin̈ yucꞌtac vin̈ chiꞌ snaani. 10 A tas ix scꞌulej vin̈ chiꞌ, chuc dꞌa sat Jehová, yuj chiꞌ ix cham vin̈. 11 Ix lajvi chiꞌ, ix yalan vin̈aj Judá dꞌa ix yalibꞌ chiꞌ icha tic:

—A ticnaic vachꞌ tzach paxcan yedꞌ a mam a nun. Malaj junocxo vinac vachꞌ tzicꞌaꞌ. Ato yic ol cꞌoch sqꞌuinal vin̈aj Sela vuninal, ichato chiꞌ ol yal icꞌan a bꞌa yedꞌ vin̈, xchi vin̈aj Judá chiꞌ.

Ton̈ej ix yal vin̈ icha chiꞌ, qꞌuinaloc schampax vin̈aj Sela chiꞌ snaan vin̈, icha ix aj scham chavan̈ ebꞌ vin̈ yucꞌtac. Icha chiꞌ ix aj sbꞌat ix Tamar yic scajnaj ix yedꞌ smam snun.

12 Pecatax chiꞌ ix cham ix yetbꞌeyum vin̈aj Judá chiꞌ, ix yisil vin̈aj Súa. Ix lajvi yecꞌbꞌat scuscꞌolal vin̈, ix bꞌat vin̈ dꞌa chon̈abꞌ Timnat bꞌaj van sjoxchajel xil nocꞌ scalnel, axo jun vin̈ yamigo vin̈ scuchan Hira ix bꞌat yucꞌlevoc. 13 Axo yic ix yabꞌan specal ix Tamar to van sbꞌat vin̈aj Judá dꞌa Timnat yil sjoxchajel nocꞌ scalnel, 14 dꞌa elan̈chamel ix yiqꞌuel spichul ix, aton cꞌapac syacꞌoch ebꞌ ix chamnac yetbꞌeyum. Ix yacꞌanoch jun smusil sat ix, yic vachꞌ malaj mach snaaneli tato a ix. Ix em cꞌojan ix dꞌa stiel chon̈abꞌ bꞌaj scꞌoch sbꞌeal chon̈abꞌ Enaim, dꞌa sbꞌeal Timnat chiꞌ. Ix scꞌulej jun tic ix, yujto ix nachajel yuj ix to a vin̈aj Sela ix qꞌuibꞌel vin̈, palta maxto yicꞌlaj sbꞌa vin̈ yedꞌ ix.

15 Ayic ix yilanbꞌat ix vin̈aj Judá chiꞌ, ix snaan vin̈ to ajmul ix jun ix chiꞌ, yujto musabꞌil sat ix. 16 Ix el vin̈aj Judá chiꞌ dꞌa yol bꞌe, ix bꞌat vin̈ yilbꞌat ix. Man̈ yojtacoc vin̈ tato a ix yalibꞌ vin̈. Ix yalan vin̈ dꞌa ix icha tic:

—¿Max am yal a cꞌool tzin vay edꞌoc? xchi vin̈.

—Tato syal in cꞌool ¿tas junoc tzacꞌ dꞌayin? xchi ix.

17 —Ol vacꞌcot junoc yuneꞌ a chiva, xchi vin̈ dꞌa ix.

—Tzam yalaꞌ, an̈ej tato ay junoc tas tzacꞌcan dꞌayin ticnaic. Ayic sjavi nocꞌ in yuneꞌ chiva chiꞌ, svacꞌanxi meltzaj dꞌayach, xchi ix.

18 —¿Tas pax tza nibꞌej svacꞌcan dꞌayach? xchi vin̈aj Judá chiꞌ.

—Acꞌcan a sello yedꞌ schꞌan̈al yedꞌ a cꞌococh edꞌnac, xchi ix.

—Syalaꞌ, canocabꞌi, xchi vin̈. Ix lajvi chiꞌ ix vay vin̈ yedꞌ ix, ix scuchancanoch yuneꞌ ix. 19 Ix lajvi chiꞌ, ix bꞌat ix, ix yicꞌanel smusil sat ix chiꞌ, ix yacꞌanxioch scꞌapac ix syacꞌoch ebꞌ ix chamnac yetbꞌeyum.

20 Ayic ix cꞌoch vin̈aj Judá bꞌaj ayecꞌ nocꞌ scalnel chiꞌ, ix schecancot vin̈ yamigo vin̈, aton vin̈ aj Adulam, ix bꞌat yacꞌancan nocꞌ yuneꞌ chiva chiꞌ vin̈ dꞌa ix ix chiꞌ yic syicꞌpaxta tas aycan chiꞌ dꞌa ix yuj vin̈aj Judá chiꞌ yalani, palta majxo ilchajlaj ix yuj vin̈ schecabꞌ vin chiꞌ. 21 Ix scꞌanbꞌanecꞌ vin̈ dꞌa ebꞌ aj chon̈abꞌ chiꞌ icha tic:

—¿Bꞌajtil ay jun ix ajmul ix dꞌa tic, jun ix tzꞌemn̈ej cꞌojan dꞌa stiꞌ sbꞌeal Enaim tic? xchi vin̈ checabꞌ chiꞌ.

—Malaj junoc ix ajmul ix dꞌa tic, xchi ebꞌ vin̈.

22 Ix lajvi chiꞌ ix meltzajxi vin̈ dꞌa vin̈aj Judá chiꞌ, ix yalan vin̈:

—Majxo ilchajlaj ix vuuj, ix yal ebꞌ vin̈ ayecꞌ chiꞌ taꞌ to malaj junoc ix ajmul ix bꞌaj ay ebꞌ chiꞌ, xchi vin̈.

23 Ix tacꞌvi vin̈aj Judá icha tic:

—Canocabꞌ ix yedꞌ juntzan̈ chiꞌ, yic vachꞌ max el co qꞌuixvelal. Ix in cꞌanabꞌajej, ix vacꞌanbꞌat nocꞌ yuneꞌ chiva, an̈ej to majxo ilchaj ix uuj, xchi vin̈.

24 Yoxil xom ujal chiꞌ, ix bꞌat alchaj dꞌa vin̈aj Judá icha tic:

—A ix Tamar, ix alibꞌ, ay am mach ix scꞌumej ix, yuj chiꞌ yabꞌixxo ix ticnaic, xchi ebꞌ vin̈ dꞌa vin̈.

Ix yalan vin̈:

—Iqꞌuequel ix dꞌa stiel chon̈abꞌ yic tze n̈usantzꞌa ix, xchi vin̈.

25 Ayic van yicꞌjielta ix yuj ebꞌ vin̈, ix yacꞌanbꞌat schecabꞌ ix dꞌa vin̈aj Judá chiꞌ, ix yalan icha tic: A vin̈ ay yic juntzan̈ svacꞌbꞌat tic, aton vin̈ ay yic unin vedꞌnac tic. Bꞌeycꞌolej mach ay yic jun sello yedꞌ schꞌan̈al tic yedꞌ jun cꞌococh tic, xchibꞌat ix dꞌa vin̈. 26 Ayic ix yilanoch vin̈aj Judá to yic masanil juntzan̈ chiꞌ vin̈, ix yalan vin̈ icha tic: A ix ix chiꞌ vachꞌ tas ix scꞌulej ix. A in chuc tas ix in cꞌulej. Ay in mul. Maj vacꞌlaj yicꞌ sbꞌa ix yedꞌ vin̈ vuninal aj Sela, xchi vin̈. Yuj chiꞌ maj n̈usjitzꞌalaj ix. Majxo vaylaj vin̈ yedꞌ ix junelxo.

27 Axo ix bꞌo scꞌol ix Tamar chiꞌ, tiox ebꞌ unin ix alji chiꞌ. 28 Ayic van yalji ebꞌ unin chiꞌ, ayic ix elul scꞌabꞌ jun bꞌabꞌel, ix spixanoch jabꞌ chac chꞌal ix vetzꞌvajum dꞌa sjaj scꞌabꞌ jun unin chiꞌ, ix yalan ix: Aton jun bꞌabꞌel tic, xchi ix. 29 Palta ix yicꞌanxioch scꞌabꞌ jun neneꞌ chiꞌ, axo junxo yucꞌtac chiꞌ ix alji sbꞌabꞌelal, yuj chiꞌ Fares^* ix sbꞌiej yuj ix vetzꞌvajum chiꞌ. Ix yalan ix: ¿Tas yuj ix a bꞌabꞌlaj equejelta a bꞌa? xchi ix. 30 Ix lajvi chiꞌ ix alji vin̈ neneꞌ ayoch an̈ chac chꞌal chiꞌ dꞌa sjaj scꞌabꞌ, Zara^* ix sbꞌiej yuj ix.