A vin̈aj José yuninal vin̈aj Jacob, 17 abꞌil sqꞌuinal vin̈, tan̈voj calnel syacꞌ vin̈ yedꞌ ebꞌ vin̈ yucꞌtac. A ebꞌ vin̈ yucꞌtac vin̈ chiꞌ, aton ebꞌ vin̈ yuneꞌ ix Bilha yedꞌ ix Zilpa, ebꞌ ix chabꞌil yetbꞌeyum vin̈aj Jacob. A vin̈aj José chiꞌ tzꞌicꞌancot abꞌix dꞌa vin̈ smam tato man̈ vachꞌoc syutej sbꞌa ebꞌ vin̈ yucꞌtac vin̈ chiꞌ.

3 Te xajan vin̈aj José chiꞌ yuj vin̈ smam dꞌa yichan̈ juntzan̈xo ebꞌ vin̈ yucꞌtac chiꞌ, yujto yolxo yichamvinaquil ix alji vin̈. Yuj chiꞌ ix sbꞌo jun spichul vin̈, tzꞌibꞌiltac yilji. 4 A ix yilan juntzan̈xo ebꞌ vin̈ yucꞌtac vin̈ chiꞌ to yelxo val te xajan vin̈aj José chiꞌ yuj vin̈ smam chiꞌ, ix te chichon scꞌol ebꞌ vin̈ dꞌa vin̈, te chuc slolon ebꞌ vin̈ dꞌa vin̈.

5-8 Ay jun svayich vin̈aj José chiꞌ ix ochi, ix yalan vin̈ dꞌa ebꞌ vin̈ yucꞌtac chiꞌ icha tic:

—Abꞌec val in vayich. Ix in vayichej to van co jochvi trigo, junjun on̈ quedꞌ junjun manoja quicoꞌ. Dꞌa jun rato chiꞌ ix qꞌue lin̈an ixim vicoꞌ yedꞌ ixim eyic chiꞌ, axo ixim eyic chiꞌ ix em n̈ojan ixim dꞌa spatic yichan̈ ixim vic chiꞌ, xchi vin̈.

Ix tacꞌvi ebꞌ vin̈ yucꞌtac vin̈ chiꞌ icha tic:

—¿Am syalelcꞌoch jun tzal chiꞌ to ol ach och co reyaloc? ¿A ach am ol alaꞌ tas ol co cꞌulej? xchi ebꞌ vin̈. Ix te cot yoval ebꞌ vin̈ yuj svayich vin̈ ix yal chiꞌ.

9 Ix lajvi chiꞌ ix och junxo svayich vin̈aj José chiꞌ, ix yalanxi vin̈ dꞌa ebꞌ vin̈ yucꞌtac chiꞌ icha tic:

—Ay val junxo in vayich ix ochi. A dꞌa jun in vayich chiꞌ ix vilaꞌ, to a cꞌu yedꞌ qꞌuen uj yedꞌ uxlucheꞌ cꞌanal ix em n̈ojan dꞌayin, xchi vin̈.

10 Ayic ix yalan svayich vin̈ chiꞌ dꞌa vin̈ smam yedꞌ dꞌa ebꞌ vin̈ yucꞌtac chiꞌ, ix cot yoval vin̈ smam vin̈ chi, ix yalan vin̈ dꞌa vin̈ icha tic:

—¿Tas syalelcꞌoch jun a vayich chi? ¿Tom ol in em n̈ojan yedꞌ ix a nun yedꞌ ebꞌ vin̈ ucꞌtac tic dꞌa ichan̈? xchi vin̈.

11 Icha chiꞌ ix aj sqꞌue vaan schichoncꞌolal ebꞌ vin̈ yucꞌtac vin̈ chiꞌ dꞌa spatic, palta axo vin̈ smam vin̈ chiꞌ, ix snaubꞌtan̈ej val vin̈ tas val syalelcꞌoch jun svayich vin̈ chiꞌ.

12 Ay jun cꞌual ix bꞌat ebꞌ vin̈ yucꞌtac vin̈aj José chiꞌ dꞌa Siquem say bꞌaj vachꞌ sva nocꞌ scalnel vin̈ smam ebꞌ vin̈ chiꞌ. 13 Ix lajvi chiꞌ, ix yalan vin̈aj Israel dꞌa vin̈aj José chiꞌ icha tic:

—A ticnaic a ebꞌ vin̈ ucꞌtac, a dꞌa Siquem ayecꞌ ebꞌ vin̈ tan̈voj calnel, tzin nibꞌej tzach bꞌat il ebꞌ vin̈, xchi vin̈.

—Inye, ol in bꞌatoc, xchi vin̈aj José chiꞌ.

14 —Vachꞌ jun, ixic, yic vachꞌ tzilaꞌ chajtil yaj ebꞌ vin̈ yedꞌ nocꞌ calnel chiꞌ, tzul alan vabꞌi, xchi vin̈ smam vin̈ chiꞌ.

Dꞌa schꞌolanil lum Hebrón ayecꞌ vin̈aj José chiꞌ ayic ix checjibꞌat vin̈ yuj vin̈ smam. Axo yic ix cꞌoch vin̈ dꞌa yol yic Siquem, 15 ix ecꞌchaj vin̈ sayecꞌ ebꞌ vin̈ yucꞌtac chiꞌ taꞌ. Ay jun vin̈ vinac ix schalaj sbꞌa vin̈ yedꞌoc, ix scꞌanbꞌan vin̈ vinac chiꞌ icha tic:

—¿Tas tzecꞌ a sayaꞌ? xchi vin̈ dꞌa vin̈aj José chiꞌ.

16 —To tzin ecꞌ in say ebꞌ vin̈ vucꞌtac. ¿Maj am ilaꞌ bꞌajtil stan̈vej nocꞌ calnel ebꞌ vin̈? xchi vin̈aj José chiꞌ.

17 —Toxo ix bꞌat ebꞌ vin̈ dꞌa tic. Ix vabꞌ yalan ebꞌ vin̈: Vachꞌ tzon̈ bꞌat dꞌa Dotán, xchi ebꞌ vin̈ ix vabꞌi, xchi vin̈ vinac chiꞌ.

Ix bꞌatn̈ej vin̈aj José chiꞌ, ix ilchaj ebꞌ vin̈ yucꞌtac vin̈ chiꞌ yuj dꞌa Dotán chiꞌ. 18 Ayic ix yilanbꞌat vin̈ ebꞌ vin̈ dꞌa najat, ayto val scꞌoch vin̈ dꞌa ebꞌ vin̈, ix slajtian sbꞌa ebꞌ vin̈ tas syutej ebꞌ vin̈ smilancham vin̈. 19 Ix yalan ebꞌ vin̈ icha tic:

—Ina sja vin̈ svayichani. 20 Co mileccham vin̈, ol co julancanbꞌat vin̈ dꞌa yol junoc jul, ol calani to a am junoc nocꞌ nocꞌ chium anima ix chianbꞌat vin̈. Ol quilan bꞌian tas ol aj yelcꞌoch juntzan̈ svayich vin̈ chiꞌ, xchi ebꞌ vin̈.

21 Ayic ix yabꞌan juntzan̈ lolonel chiꞌ vin̈aj Rubén, ix snaan vin̈ tas vachꞌ syutej scolanel vin̈aj José chiꞌ dꞌa yol scꞌabꞌ ebꞌ vin̈, ix yalan vin̈ icha tic:

—Maay, man̈ co milecchamlaj vin̈. 22 Mocabꞌ och schamel vin̈ chiꞌ co muloc. An̈ejto scaqꞌuem vin̈ dꞌa yol junoc yedꞌtal aꞌ joybꞌil dꞌa tzꞌinan lum tic. Mocabꞌa junoc on̈ tzꞌoch co cꞌabꞌ dꞌa vin̈, xchi vin̈.

Ix yal jun lolonel chiꞌ vin̈aj Rubén chiꞌ, yujto snibꞌej vin̈ scolcan vin̈aj José chiꞌ, yic vachꞌ syacꞌ meltzaj vin̈ vin̈ dꞌa vin̈ smam. 23 Axo ix cꞌoch vin̈aj José bꞌaj ayecꞌ ebꞌ vin̈ yucꞌtac chiꞌ, elan̈chamel ix tzacꞌjicot vin̈ yuj ebꞌ vin̈. Ix yicꞌanel spichul vin̈ ebꞌ vin̈ ayochi, aton jun tzꞌibꞌiltac yilji. 24 Ix lajvi chiꞌ ix acꞌjiem vin̈ yuj ebꞌ dꞌa yol jun yedꞌtal aꞌ jul yich, malaj a aꞌ dꞌa yool. 25 Ix lajvi chiꞌ ix em cꞌojan ebꞌ vin̈ vael.

Yacbꞌan chiꞌ jun, ix yilan ebꞌ vin̈ scot jun n̈ilan̈ ebꞌ vin̈ ismaelita ix cot dꞌa Galaad. A perfume, bálsamo yedꞌ mirra ayoch yibꞌan̈ scamello ebꞌ vin̈, sbꞌat ebꞌ vin̈ schon̈ dꞌa Egipto. 26 Ix yalan vin̈aj Judá dꞌa ebꞌ yucꞌtac chiꞌ icha tic:

—¿Tas scacꞌ ganar sco milancham vin̈ cucꞌtac tic, sco cꞌubꞌaneli to maj quilaꞌ bꞌaj ix cham vin̈? 27 Vachꞌ ama to sco chon̈bꞌat vin̈ dꞌa ebꞌ vin̈ ismaelita van sja tic. Mocabꞌ co milcham vin̈ yujto cucꞌtac co bꞌa yedꞌ vin̈, xchi vin̈.

Ix schaan scꞌol ebꞌ vin̈ chiꞌ tas ix yal vin̈aj Judá chiꞌ.

28 Axo yic ix ecꞌ ebꞌ vin̈ aj Madián chiꞌ, elan̈chamel ix icꞌchajqꞌueta vin̈aj José dꞌa yol jun jul chiꞌ, ix schon̈anbꞌat vin̈ ebꞌ vin̈ dꞌa ebꞌ vin̈ chon̈vajum chiꞌ. 20 siclo plata ix yacꞌ ebꞌ vin̈ dꞌa ebꞌ vin̈ stojoloc. Icha chiꞌ ix aj yicꞌchajbꞌat vin̈aj José chiꞌ dꞌa Egipto.

29 Ayic ix jax vin̈aj Rubén chiꞌ, ix bꞌat vin̈ yil dꞌa stiꞌ jun jul chiꞌ, man̈xalaj vin̈aj José chiꞌ ayeqꞌui. Ix sn̈icꞌchitanbꞌat sjaj spichul vin̈ yuj scuscꞌolal. 30 Ix bꞌat lemnaj vin̈ dꞌa ebꞌ vin̈ yucꞌtac chiꞌ, ix yalan vin̈ icha tic:

—Man̈xo ayoquem vin̈ cucꞌtac dꞌa jun jul chiꞌ. ¿Tas vachꞌ tzin cꞌulej ticnaic? xchi vin̈.

31 A dꞌa jun rato chiꞌ, ix smilancham jun nocꞌ yuneꞌ chiva ebꞌ vin̈. Ix yicꞌanelta schiqꞌuil nocꞌ ebꞌ vin̈, ix sbꞌon̈anoch ebꞌ vin̈ dꞌa spichul vin̈aj José chiꞌ. 32 Ix yacꞌanbꞌat jun pichul chiꞌ ebꞌ vin̈ dꞌa vin̈ smam, ix yalanbꞌat ebꞌ vin̈ icha tic: Ix ilchaj jun pichul tic cuuj, ilnabꞌi talaj a spichul vin̈ uninal, xchibꞌat ebꞌ vin̈.

33 Ayic ix yilan vin̈aj Jacob, to aton spichul vin̈aj José, ix yalan vin̈ icha tic: Ay... aton val spichul vin̈ vuninal tic. Ay am val junoc nocꞌ schiꞌan anima ix tzilchitanbꞌat vin̈, ix schianbꞌat vuninal, xchi vin̈. 34 Ix lajvi chiꞌ, ix sn̈icꞌchitanel spichul vin̈, ix yacꞌanoch jun pichul vin̈ yic cuscꞌolal. Te nivan tiempo ix ocꞌ vin̈ yuj vin̈ yunin chiꞌ. 35 Masanil ebꞌ yuninal vin̈ yedꞌ ebꞌ ix yisil vin̈, ix yacꞌlej ebꞌ yacꞌan snivanil scꞌol vin̈, palta max yal-laj scꞌol vin̈ tzꞌacꞌji snivanil scꞌool. Tzꞌocꞌn̈ej vin̈ yuj vin̈ yuninal chiꞌ. Ix yalan vin̈ icha tic: Ol te cusn̈ej val in cꞌool yuj vin̈ vuninal masanto ol in bꞌat bꞌaj ayecꞌ vin̈ dꞌa scal ebꞌ chamnac, xchi vin̈.

36 Axo ebꞌ vin̈ aj Madián chiꞌ, ayic ix cꞌoch ebꞌ vin̈ dꞌa Egipto chiꞌ, ix schon̈anxibꞌat vin̈aj José chiꞌ ebꞌ vin̈ dꞌa vin̈aj Potifar, yajal ebꞌ stan̈van vin̈ rey dꞌa Egipto chiꞌ.