—Mamin, octom bꞌat a cꞌan jun ix cobꞌes tic. In gana svicꞌ in bꞌa yedꞌ ix, xchi vin̈.

5-8 Vachꞌchom ix yabꞌ vin̈aj Jacob to toxo ix ixtaj ix yisil vin̈ yuj vin̈aj Siquem chiꞌ, malaj tas ix yal vin̈ masanto ix jax ebꞌ yuninal vin̈ tan̈voj calnel. A ix yabꞌan ebꞌ vin̈ yuninal vin̈ chiꞌ tas ix uji, ix meltzajcot ebꞌ vin̈, ix te cus ebꞌ vin̈. Ix cotpax yoval ebꞌ vin̈, yujto te qꞌuixvelal ix utaj ebꞌ yin̈tilal vin̈aj Israel, aton vin̈aj Jacob, yuj vin̈aj Siquem chiꞌ, yujto ix ixtaj ix yisil vin̈. Man̈ vachꞌoc tas ix scꞌulej vin̈aj Siquem chiꞌ. Axo vin̈aj Hamor chiꞌ ix bꞌat lolon yedꞌ vin̈aj Jacob chiꞌ. Ix lolonpax vin̈ yedꞌ ebꞌ yuninal vin̈, ix yalan vin̈:

—A vin̈ vuninal aj Siquem te ay val sgana vin̈ dꞌa ix eyanabꞌ, yuj chiꞌ elocabꞌ dꞌa e cꞌool yic syicꞌlaj sbꞌa ix yedꞌ vin̈. 9 Ichato ol co cꞌabꞌcoquej co bꞌa. Ol quicꞌlaj co bꞌa yedꞌ ebꞌ ix eyisil, a ex xo ol eyicꞌlaj e bꞌa yedꞌ ebꞌ ix quicoꞌ. 10 Cajnajan̈ec dꞌa co cal tic, colan tzex aj dꞌa sat co luum tic, aqꞌuecoch e chon̈, manec e luum, xchi vin̈aj Hamor chiꞌ.

11 Ix yalanpax vin̈aj Siquem chiꞌ dꞌa vin̈ smam ix Dina chiꞌ yedꞌ dꞌa ebꞌ vin̈ snulej ix:

—Yaln̈ej tas tze cꞌan dꞌayin ol vacꞌ dꞌayex. 12 Vachꞌchom nivan tas svacꞌ dꞌa yibꞌan̈ tas syacꞌtaxon ebꞌ anima yedꞌ pax tzijtumoc silabꞌ syal vacꞌani, palta malaj tzꞌochi, an̈ej tato scha e cꞌool svicꞌ in bꞌa yedꞌ ix, xchi vin̈aj Siquem chiꞌ.

13 Yujto toxo ix yixtej ix yanabꞌ ebꞌ vin̈ chiꞌ vin̈, ix tacꞌvi ebꞌ vin̈ dꞌa chabꞌsatil dꞌa vin̈ yedꞌ dꞌa smam vin̈ chiꞌ. 14 Ix yalan ebꞌ vin̈ icha tic:

—Max yal cacꞌan ix canabꞌ tic dꞌa junoc vinac to man̈ acꞌbꞌiloc circuncidar, qꞌuixvelal tzon̈ ajcan icha chiꞌ. 15 An̈ej tato scha e cꞌol icha caj a on̈ tic, tecan am scacꞌ ix dꞌayex, yujto a on̈ tic, circuncidado on̈. Tato syal e cꞌool tzex acꞌji circuncidar yedꞌ masanil ebꞌ vin̈ vinac ay dꞌa e cal chiꞌ, 16 ichato chiꞌ syal eyicꞌan ebꞌ ix quisil a on̈ tic, syalpax quicꞌan ebꞌ ix eyicoꞌ. Ichato chiꞌ syal caj dꞌa e cal, junxon̈ej chon̈abꞌil tzon̈ aj eyedꞌoc. 17 Tato max scha e cꞌol tze cꞌanabꞌajej jun circuncisión chiꞌ jun, ol on̈ el dꞌa tic, ol quicꞌanbꞌat ix canabꞌ tic quedꞌoc, xchi ebꞌ vin̈.

18 Yuj chiꞌ ix scha scꞌool vin̈aj Hamor yedꞌ vin̈ yuninal tas ix yal ebꞌ vin̈ chiꞌ. 19 Majxo ecꞌ val nivan tiempo, yujto ay sgana vin̈ dꞌa ix yisil vin̈aj Jacob chiꞌ. A vin̈aj Siquem chiꞌ an̈ej vin̈ nivan yelcꞌoch dꞌa scal ebꞌ yuninal vin̈aj Hamor yedꞌ dꞌa scal ebꞌ scꞌabꞌyoc. 20 Dꞌa elan̈chamel ix bꞌat vin̈ yedꞌ vin̈ smam chiꞌ dꞌa spuertail chon̈abꞌ bꞌaj smolbꞌej sbꞌa ebꞌ anima, ix och ijan ebꞌ yalan icha tic dꞌa ebꞌ vin̈ vinac:

21 —A juntzan̈ vinac tic vachꞌ spensar ebꞌ, ol cajnaj ebꞌ dꞌa co cal tic, ol yacꞌanoch schon̈ ebꞌ dꞌa co chon̈abꞌ tic. Te ay lum luum bꞌaj vachꞌ yaj ebꞌ vin̈. Syal quicꞌan co bꞌa yedꞌ ebꞌ ix yisil ebꞌ vin̈, syalpax yicꞌan sbꞌa ebꞌ vin̈ yedꞌ ebꞌ ix quicoꞌ. 22 An̈ej to snibꞌej ebꞌ vin̈ to co masanil a on̈ vinac on̈ tic, sco cha jun circuncisión icha yaj ebꞌ vin̈, icha chiꞌ junn̈ej chon̈abꞌil tzon̈ aj yedꞌ ebꞌ vin̈. 23 A masanil stastac ebꞌ vin̈ yedꞌ masanil nocꞌ smolbꞌetzal nocꞌ ebꞌ vin̈, quicxo smasanil, an̈ej tato sco tacꞌvej dꞌa ebꞌ vin̈, yic vachꞌ scan ebꞌ vin̈ dꞌa co cal, xchi vin̈aj Hamor yedꞌ vin̈aj Siquem chiꞌ.

24 Masanil ebꞌ vin̈ tzꞌacanxo spensar ix scha scꞌol ebꞌ vin̈ tas ix yal ebꞌ chavan̈ chiꞌ, yuj chiꞌ ix acꞌji circuncidar ebꞌ vin̈ masanil. 25 Axo vin̈aj Simeón yedꞌ vin̈aj Leví, yuninal vin̈aj Jacob, snulej ix Dina chiꞌ, ix bꞌat ebꞌ vin̈ dꞌa chon̈abꞌ chiꞌ dꞌa schabꞌjial. Yacbꞌan yato ay ebꞌ vin̈ vinac chiꞌ yuj bꞌaj ix acꞌji circuncidar chiꞌ, ix cꞌoch ebꞌ vin̈ chavan̈ chiꞌ dꞌa yol chon̈abꞌ chiꞌ. Ix och ijan ebꞌ vin̈ smilancham ebꞌ vin̈ ya yaj chiꞌ smasanil dꞌa qꞌuen espada, yujto man̈ naanoc yuj ebꞌ aj chon̈abꞌ chiꞌ. 26 Ix miljicham vin̈aj Hamor yedꞌ vin̈aj Siquem yuj ebꞌ. Ix lajvi chiꞌ ix yicꞌanelta ix Dina ebꞌ vin̈ dꞌa yol spat vin̈aj Siquem chiꞌ, ix paxta ebꞌ vin̈. 27 Ix lajvi chiꞌ ix cꞌoch masanil ebꞌ vin̈ yuninal vin̈aj Jacob chiꞌ, ix yicꞌanelta masanil tastac ay dꞌa ebꞌ chamnac chiꞌ ebꞌ vin̈. Icha chiꞌ ix aj spactzitan ebꞌ vin̈ yuj bꞌaj ix ixtaj ix yanabꞌ chiꞌ. 28 Masanil tas ay dꞌa yol chon̈abꞌ chiꞌ yedꞌ tas ayel dꞌa najat ix yicꞌbꞌat ebꞌ vin̈, nocꞌ calnel, nocꞌ vacax yedꞌ nocꞌ bꞌuru. 29 Ix yelcꞌanbꞌat ebꞌ vin̈ masanil tas ay dꞌa yoltac pat, ix icꞌjipaxbꞌat ebꞌ cotac unin yedꞌ ebꞌ ix ix yuj ebꞌ vin̈. 30 Palta ix yalan vin̈aj Jacob dꞌa vin̈aj Simeón yedꞌ dꞌa vin̈aj Leví chiꞌ icha tic:

—Tic val a ex tzeyacꞌ somchajel in cꞌool. A ticnaic, masanil ebꞌ vin̈ cajan dꞌa juntzan̈ lugar tic, aton masanil ebꞌ vin̈ cananeo yedꞌ ebꞌ vin̈ ferezeo, ol te och chian scꞌool ebꞌ vin̈ dꞌayon̈. Tecan ol smolbꞌej sbꞌa ebꞌ vin̈, ol yacꞌan oval ebꞌ vin̈ quedꞌoc. Jayvan̈n̈ej co vinac ayecꞌ quedꞌoc, tecan ol on̈ smilcham ebꞌ vin̈ co masanil, xchi vin̈aj Jacob chiꞌ.

31 Ix tacꞌvi ebꞌ vin̈ icha tic:

—¿Tom ay sleyal syixtej ix canabꞌ tic vin̈, syutan ix vin̈ icha junoc ix ajmul ix? xchi ebꞌ vin̈.