Ix och vin̈aj Jacob juncꞌolal yedꞌ vin̈ yucꞌtac
33
Axo ix yilan vin̈aj Jacob to van sja vin̈aj Esaú yedꞌ 400 svinac, ix spojanecꞌ ebꞌ unin vin̈ dꞌa scal ebꞌ ix ix, aton ix Lea yedꞌ ix Raquel yedꞌ pax ebꞌ ix chavan̈ scriada ebꞌ ix. 2 A ebꞌ ix criada chiꞌ, ix bꞌabꞌlaj bꞌat ebꞌ ix yedꞌ yuneꞌ chiꞌ. Ichato chiꞌ ix bꞌat ix Lea yedꞌ ebꞌ yicoꞌ. Tzacꞌanto ix bꞌat ix Raquel yedꞌ vin̈aj José. 3 Dꞌa elan̈chamel ix bꞌabꞌlajbꞌat vin̈aj Jacob dꞌa yichan̈ ebꞌ ix. Uquel ix em n̈ojnaj vin̈ masanto ix cꞌoch vin̈ dꞌa yichan̈ vin̈ yucꞌtac chiꞌ. 4 Ix javi lemnaj vin̈aj Esaú chiꞌ, ix och lacꞌnaj vin̈ dꞌa sjaj vin̈ yucꞌtac chiꞌ, ix och tzꞌubꞌnaj vin̈ dꞌa stiꞌ vin̈, ix ocꞌ ebꞌ vin̈ schavan̈il. 5 Ix lajvi chiꞌ ix yilanoch ebꞌ ix ix yedꞌ ebꞌ unin vin̈aj Esaú chiꞌ, ix scꞌanbꞌan vin̈ icha tic:—A juntzan̈ ebꞌ tic, ¿mach ay yic ebꞌ? xchi vin̈.
—Vuninal ebꞌ, ix yacꞌ Dios dꞌayin yuj svachꞌcꞌolal, xchi vin̈aj Jacob chiꞌ.
6 Ichato chiꞌ ix snitzancot sbꞌa ebꞌ ix criada yedꞌ ebꞌ yuneꞌ dꞌa yichan̈ vin̈aj Esaú chiꞌ, ix em n̈ojan ebꞌ dꞌa sat luum. 7 Ix snitzanpaxcot sbꞌa ix Lea yedꞌ ebꞌ yuneꞌ, ix empax n̈ojan ebꞌ. Tzacꞌanto ix javi vin̈aj José yedꞌ ix snun, aton ix Raquel, ix empax n̈ojan ebꞌ. 8 Ix scꞌanbꞌan vin̈aj Esaú dꞌa vin̈aj Jacob chiꞌ icha tic:
—¿Tas tza na dꞌa yibꞌan̈ juntzan̈ nocꞌ nocꞌ ix in cha dꞌa yol bꞌe? xchi vin̈.
—Ic yaj nocꞌ smasanil yic tzꞌoch juncꞌolal dꞌa co cal, xchi vin̈aj Jacob chiꞌ.
9 —Maay vucꞌtac, te tzijtum pax nocꞌ vicoꞌ, canocabꞌ nocꞌ edꞌoc, xchi vin̈.
10 Palta ix och ijan vin̈aj Jacob chiꞌ yalan dꞌa vin̈ icha tic:
—Maay vucꞌtac, tato vachꞌ in dꞌa ichan̈, cha juntzan̈ silabꞌ svacꞌ tic dꞌayach, icha val to a Dios svilochi ayic tzach vilan tic, yujto dꞌa vachꞌcꞌolalil ix in a chaꞌa. 11 Tzin tevi dꞌayach to tza cha juntzan̈ silabꞌ ix vicꞌcot dꞌayach, yujto a Dios ix el dꞌa scꞌol yacꞌan in bꞌeyumal tic, malaj jabꞌoc tas syacꞌ palta dꞌayin, xchi vin̈aj Jacob chiꞌ.
Ix ochn̈ej tean vin̈ dꞌa vin̈ yucꞌtac chiꞌ, yuj chiꞌ ix scha nocꞌ silabꞌ chiꞌ vin̈. 12 Ix yalan vin̈aj Esaú chiꞌ icha tic:
—A ticnaic, coyec. A in tzin bꞌabꞌlaj dꞌa eyichan̈, xchi vin̈.
13 Ix tacꞌvi vin̈aj Jacob chiꞌ:
—Ach vucꞌtac, ojtac to a ebꞌ unin, cꞌun scꞌunbꞌi ebꞌ, tzin naanpax yuj nocꞌ calnel yedꞌ nocꞌ vacax nenetacto yuneꞌ, tato tzin pech nocꞌ ay smay junn̈ej cꞌual scham nocꞌ smasanil. 14 Yuj chiꞌ vachꞌ tzach bꞌabꞌlaj vuuj. A inxo tic, cꞌojancꞌolaln̈ej ol in bꞌatoc, icha syal sbꞌey ebꞌ unin yedꞌ nocꞌ nocꞌ tic. Olxo ach vilcꞌoch dꞌa Seir, xchi vin̈.
15 —Yicꞌocabꞌ icha tzal chiꞌ. Syal scan jayvan̈oc ebꞌ vin̈ in checabꞌ tic yic scolvaj edꞌoc, xchi vin̈aj Esaú chiꞌ.
Palta ix yalan vin̈aj Jacob chiꞌ icha tic:
—Maay, yuj val dios, man̈ acꞌ pensar vuuj, xchi vin̈.
16 A dꞌa jun cꞌu chiꞌ, ix meltzaj vin̈aj Esaú dꞌa lum Seir. 17 Axo vin̈aj Jacob, ix jacan vin̈ dꞌa jun acꞌlic. Ataꞌ ix sbꞌo spat vin̈, ix sbꞌoanpax juntzan̈ yunetac lechpat vin̈ bꞌaj ix och nocꞌ smolbꞌetzal nocꞌ. Yuj chiꞌ Sucot ix yacꞌ vin̈ sbꞌiej jun lugar chiꞌ.*
18 Ayic ix paxta vin̈aj Jacob dꞌa Padán-aram masanto ix javi vin̈ dꞌa yol yic Canaán, malaj tas ix icꞌan vin̈, vachꞌ scꞌol vin̈ ix jaxi. Ix sbꞌoan scampamento vin̈ dꞌa yichan̈bꞌat chon̈abꞌ Siquem. 19 100 qꞌuen plata ix yacꞌ vin̈ yic smanan jun lum luum chiꞌ vin̈ dꞌa ebꞌ yuninal vin̈aj Hamor, vin̈ ix icꞌanel yich chon̈abꞌ Siquem. Ataꞌ ix sbꞌoqꞌue scampamento vin̈. 20 Ix lajvi chiꞌ ix sbꞌoanqꞌue jun altar vin̈, El-Elohe-Israel* ix yacꞌ vin̈ sbꞌiej.